文藝短篇

https://www.youtube.com/watch?v=tMmdKeulNMA

(請安裝Taigi Unicode字形,配合Firefox瀏覽器來讀)

作者:陳金順


1 生活藝術家 ê 日常

人生 ê 價值,kap 學歷、地位、財富無定著有底代。

2021年3月初4暗時,公視放送《獨舞者 ê 樂章》紀錄片。短短點半鐘,導演李立劭用相對客觀 ê 鏡頭 kap 歷史畫面,一格一格勻勻仔流動 ê 影片,鋪排林絲緞 ê 人生跤跡。

「林絲緞」三字名,佇台灣社會,往往毋是𠢕人 ê 代名詞。我想,80歲 ê 伊,大概嘛無咧要意外界 ê 眼光 kap 評價。

一甲子進前,20當青春 ê 林絲緞,佇當時嶄然保守 ê 社會引爆爭議 ê 火星,因為伊是頭一位人體 Model。
小學出業,做過女工 ê 林絲緞,無 hō͘ 家己 ê 出身 kap 爭議纏牢咧。伊真知家己 ê 人生欲行佗一條路。

伊學畫圖,koh khah 頂真學跳舞。幾十冬來,伊逐四界教人跳舞,對公園到舞蹈教室,對囡仔到老人,對弱勢者到文藝工作者,攏有伊 ê 學生。

伊教跳舞,無需要高深 ê 理論。運用咱人身體自然 ê 韻律,輕輕仔跳,勻勻仔跳,跳出自在,跳出康健。
80歲 ê 林絲緞,跤手猶誠猛掠。伊是一位恬恬仔舞出曠闊人生 ê 生活藝術家,嘛會當講是生活哲學家。

2 寶惜海洋 ê 景緻

「心靜落來,才會當看清楚海裡 ê 物件。」這是影戲《東經北緯》裡,主角顏賢軍講 ê 一句話。

戲文虛構大海裡沉覕三百外冬前 ê 寶藏,顏賢軍是海賊顏思齊 ê 後代。伊訓練「東經」、「北緯」兩個後生藏水沬,日思夜夢就是欲搜揣拍毋見 ê 寶藏。這齣戲 ê 故事線簡單。搜揣寶藏 ê 主線,包含父囝、兄弟 ê 親情佮衝突。支線分別有兩兄弟 ê 愛情代;顏賢軍掠魚仔伴失踪,對方 ê 查某囝來咧 khí-kau-peⁿ(起交繃)。

導演袁緒虎是水底攝影專家。澎湖、小琉球 ê 海洋景緻 kap 海底生態,透過伊設計 ê 鏡頭語言,展現佇世間人面頭前。咱目睭金金觀看美麗閣活跳 ê 大海波動,事實上,佇波動裡有一款 hō͘ 人內心平靜 ê 氣氛。
演員吳朋奉藉主角顏賢軍 ê 喙講出「心靜落來,才會當看清楚海裡 ê 物件。」有值得逐家思考 ê 生活哲學。

無論啥物角色攏搬甲不止仔上跤 ê 吳朋奉,舊年離開世間飛起去天頂矣。《東經北緯》是伊上蓋落尾 ê 作品,伊煞戲矣!

不而過,這齣影戲喝醒眾人寶惜海洋資源,走揣大海價值 ê 路程才拄欲開始。

我有話要說