(請安裝Taigi Unicode字形，配合Firefox瀏覽器來讀)
作者：姚志龍
阿母的疼比天懸
嬰仔哭聲袂厭煩
細囝家事逐項管
攏是阿母的疼痛
阿母的疼百百款
恬恬付出無寄望
攏是為囝咧操煩
只求長成會穩當
囡仔若起番
兄弟若相冤
阿母的箠仔
夯甲懸懸懸
無人敢歹款
走去邊仔喘
阿母教規矩
阿母的疼讚
A-bú ê thiàⁿ pí thiⁿ koân
Eⁿ-á khàu-siaⁿ bē ià-hoân
Sè-kiáⁿ ka-sū ta̍k-hāng koán
Lóng-sī a-bú ê thiàⁿ-thàng
A-bú ê thiàⁿ pah-pah-khoán
Tiām-tiām hù-chhut bô kià-bāng
Lóng-sī ūi kiáⁿ leh chhau-hoân
Chí-kiû tióng-sêng ē ún-tàng
Gín-á nā khí hoan
Hiaⁿ-tī nā sio-oan
A-bú ê chhôe-á
Giâ kah koân-koân-koân
Bô lâng káⁿ pháiⁿ khoán
Cháu khì pin-a chhoán
A-bú kà kui-kí
A-bú ê thiàⁿ chán
