台文生涯

(請安裝Taigi Unicode字形,配合Firefox瀏覽器來讀)

作者:陳柏壽

我 ê 人生是真簡單,無啥物理論,只有向一个理想 kap 目標,一發進前,對別人 ê 評價 kap 批評 khah 無囥佇心內。古早阮老爸,包括高俊明牧師在內,攏無贊成我放棄事業去讀神學院。今四、五十冬經過,我嘛做人 ê 牧師四十外年了退休,猶閣佇這世間「流浪」。講流浪 ê 意思是講萬事一切靠上帝𤆬路(chhōa-lō͘),逐日「時到時擔當,無米才煮番薯湯」,過一个真平凡 ê 人生。

A-Tông 兄叫我寫一寡《台文通訊》30週年感言,我想這是較大 ê 任務,因為我只是一个平凡 ê 人做一項平凡 ê 代誌。雖然是按呢講,台語文這代誌,佇我人生 ê 中間,除了傳道理、飼某囝 kap 顧家以外,實在占我人生 ê 真大部分。到今為止每日咧無閒 ê 代誌,嘛只有是台語文,連眠夢嘛是。

彼年神學院畢業,我佇 New York Westchester ê 台灣教會做牧師,歸教會攏是有台灣心 ê 人才會來禮拜,會使講「歸盤魚脯仔全全頭」,因為人若聽講是陳某人彼个台獨牧師,人 toh bē-giàn來,抑是毋敢來。我真知這是我 ê 宿命,總是嘛可能是上帝安排我 ê 好命,hō͘ 我行路 khah 順嘛 khah 坎坷。佇長榮大學教冊 ê 時,我攏用台語教,學生 ê 報告嘛著用台語,起頭學生 ê 抵抗真大,但是學期過了,有人寫批 hō͘ 我,感謝我 hō͘ 怹揣著母語 ê 母胎 kap 靈魂,實在 hō͘ 我真安慰。

鄭良光兄1991年7月初一創刊並發行第一期《台文通訊》,到第25期才交 hō͘ 我繼續負責發行 ê 工課。我設立「聰美姊紀念基金會」(www.chhongbi.org)來負責這項工課直到第142期,總共12年。Westchester ê 台灣教會名叫「衛鄉教會」,這是一个真細間 ê 教會,親像一个紅嬰仔,欲承擔這項重大 ê 代誌,實在 sim-lāi tám-tám(心內膽膽)。佳哉上帝有安排一位黃聲宏醫生,黃醫生 ê 令尊黃鯉吾醫生是咱台灣人無教會主義信徒,怹對台灣人運動非常熱心,黃醫生有一個阿姊叫黃聰美。黃聰美嫁日本人醫生伊藤邦幸,二人結婚後去 Nepal 做日本海外醫療傳道十幾年。佇彼个 Himalaya 山國,聰美姊思思念念 ê 代誌猶是故鄉台灣,伊共翁婿講:「我雖然嫁你做日本人,但是我 ê 心內猶是台灣人。」聰美一世人無出名,但是我看是一位真偉大 ê 台灣女性。聰美基金會就是欲繼承伊 ê 意志 kap 理想來設立。

未來 ê 世界毋是 George Orwell 佇《1984》冊內所描寫 ê Big Brother 統治 ê 世界,嘛毋是中國人歷來執政 kap 權力者所提倡 ê「世界大同」ê 世界,親像今仔日中國人按呢宣傳。我 ê 信仰是未來 ê 上帝國是「世界大不同」ê 世界。當初上帝就是交代世間人毋通留戀,著「出出去!到世界逐角落生湠濟濟」(創世記9章1節)。未來 ê 世界,上帝互世間「各族、各民、各方」來 ê 人攏用怹家己 ê 腔口,唱怹家己 ê 歌,來頌讚慈悲 ê 主宰上帝 ê「永遠的福音」(啟示錄7章9節,14章6節)。彼就是新天新地 ê 世界。Covid-19 已經欲二年 lah,魔鬼親像烏雲遮蓋全球,毋知當時欲結束。總是天愈黑,咱著愈需要用耐心來等待,等待新天地到來,尤其是咱做母語運動 ê 人,更加著按呢。

牧師做愈久,我愈感覺咱 ê 母語語言運動,愈 kah 福音拆 bē 開,母語是做一个人心靈 ê 根本部分,咱做一个人所有 ê「生活、行動 kap 存在」,包括咱 ê 語言,攏是上帝賞賜(使徒行傳17章28節),這叫做「天賦人權」。所以咱 ê 母語運動也是咱揣上帝 ê 運動,咱 ê 心靈更新 ê 運動,咱每日 ê 生活 ê 草根運動。咱著堅持到底,知影這條路咱愈行會愈闊,愈行會愈遠,愈有希望,會當得著生命樹 ê 果子,因為佇咱頭殼碗頂,攏有上帝賞賜 ê 記號,就是「母語人」ê 記號(啟示錄22章1~4節)。

我有話要說