(請安裝Taigi Unicode字形，配合Firefox瀏覽器來讀)
作者：陳秋華
兩年疫情影響無法度出國，所以進前逐家佇國內揣熱門好耍 ê 所在耍。阮愛𨑨迌 ê 當然早就安排好勢：2月武陵農場露營兼賞花，3月天祥錐麓古道佮拄好新開幕 ê 山月吊橋，4月溪頭 peh 山，5月上著時 ê 馬祖看藍色 ê 目屎。
所以，食母親節 chhe-chhau（腥臊）隔工就全家歡歡喜喜欲來去看大自然美麗 ê 景色，因為有朋友對馬祖𨑨迌 ê 經驗，知這段時間馬祖時常罩霧，買旅遊不便險較袂食虧。彼工早早就出發去台中機場，辦好手續到候機室聽候時，電視有報導對台北出發飛馬祖 ê 飛龍機，降落時不明原因輪仔破去，緊急飛轉來台北，台中十點起飛 ê 亦飛轉來，致使阮11點班機取消，聽著這个廣播 hō͘ 阮真失望，亦無其他辦法，只好包袱仔款款咧轉去厝。毋過心肝又閣 ngiau-ngiau 毋甘願，就隨時連絡阮規陣愛𨑨迌 ê 好朋友，隔工來去合歡山看滿山紅（杜鵑花）、蹛暝，後日才轉來。
隔工大家歡歡喜喜欲來出發，我發現身軀正爿親像針咧揻（ui），趕緊去 hō͘ 醫生診斷，結果是「皮蛇」（帶狀皰疹）。朋友笑我「帶屎」，若無哪會攏𨑨迌袂成，我嘛感覺真失望，難得安排全家旅遊洗溫泉、朋友賞花亦「帶屎」閣著皮蛇。為啥物？為啥物？代誌哪會連紲 hō͘ 我失望咧？
後來想想咧，上帝攏有伊 ê 安排，若毋是飛龍機破輪，佇馬祖才發現生皮蛇我就耍袂放心，三工後轉來皮蛇毋知飛到啥所在，早發現食兩禮拜 ê 葯仔，猶未完全好，不時身軀若針揻，若 iân-chhiân（延延）就毋知欲加疼偌久咧，甚至病毒湠開傷著目睭、耳空 ê 神經亦無 tek-khak（的確）。所以，在人看是跋一倒，背後卻是抾著一隻金雞母。
