(請安裝Taigi Unicode字形，配合Firefox來讀)
作者：蔡惠名
若是到菲律賓 chhit-thô ê 旅客，佇大馬尼拉地區行動，除了計程車、Jeepney （吉普尼）kap Sidecar（三輪車）這款類型 ê 以外，就是捷運上重要矣。菲律賓馬尼拉 ê 捷運系統（Manila Light Rail Transit System，LRT）自 1984 年開通，已經有 34 年 ê 歷史矣，kap 台北捷運比起來閣較早開通 12 年，是東南亞國家內底上早有捷運系統 ê 城市。
伊目前有 3 條線當咧營運，頭一條開通也是上重要 ê 是 LRT1，伊攏總有 20 个站，是南北向 ê 重要路線；第二條開通 ê 是 LRT2，伊有 11 个站，是東西向 ê 路線；閣來就是第三條 ê LRT3，kap LRT1 仝款是南北向个。菲律賓政府拍算欲將 LRT1 kap LRT3 相接做伙，未來若是將 LRT1 ê Roosevelt 站 kap LRT3 ê North Avenue 站連做伙，若按呢就會當成做是一个大圓環，到時毋管是上北抑是落南就閣較方便矣。
若是價數 ê 部分，kap 台北捷運比起來是馬尼拉捷運較俗。比如講上新開通 ê LRT3 自頭站坐到尾站攏總 13 站干焦需要 28 箍 peso，差不多是 17 箍台票，對袂曉抑是毋敢坐 Jeepney ê 外地人來講，捷運會使講是非常俗 ê 交通工具。
而且伊嘛有推出捷運卡 beep Card，一張 100 箍 peso，會當使用 80 箍 peso，也就是講彼張卡干焦 20 箍 peso 爾爾。而且會當先儉錢入去這張卡內底，毋過伊干焦接受紙票，若是儉零星入去，機器就無欲接受。
菲律賓 ê 錢是對 20 箍開始是紙票，包含 20、50、100、200、500 kap 1000 箍，所以伊一 kái 上低會當加 20 箍 peso 就好，閣會使因為有這張卡就直接過卡入去車站，省掉真濟排隊買票 ê 時間。毋過較無方便 ê 所在是，因為 in 三條線攏是無仝 ê 系統，所以若是欲換線就愛需要先過卡出去，行去另外一个相接 ê 所在，才閣買票入去。這款 ê 轉運站每一條線攏有一站，若是欲 kap 台北捷運比起來，台北捷運這部分就方便濟矣。
另外一个需要注意 ê 是，有一寡仔捷運站有分無仝 ê 方向愛對無仝 ê 出入口進出，若無捷運站內底是無相通个，若是行毋著出入口就愛閣重行一改矣。總講一句，雖然馬尼拉捷運難免有無方便 ê 所在，毋過對外地人來講，這已經算是較安全閣方便 ê 交通工具矣。
