(請安裝Taigi Unicode字形，配合Firefox瀏覽器來讀)
作者：吳春滿
日過日，年過年，歲月又閣留記持，想起囡仔時，爸母疼惜不管時，兄哥真愛來創治，我 ê 蘋果攏欲咬一喙，結果食甲無半滴，實在使我真受氣，哭甲目屎流閣鼻水滴，趕緊去 kā 阿母投，閣送兄哥一盤竹筍炒肉絲，這馬想–來真趣味，懷念彼陣好笑 ê 代誌。
Ji̍t-kòe-ji̍t, nî-kòe-nî, sòe-goa̍t iū-koh lâu kì-tî, siūⁿ-khí gín-á-sî, pē-bú thiàⁿ-sioh put-koán-sî, hiaⁿ-ko chin-ài lâi chhòng-tī, góa ê phōng-kó lóng beh kā chi̍t-chhùi, kiat-kó chia̍h kap bô pòaⁿ tih, si̍t-chāi sù góa chin siū-khì, khàu kap ba̍k-sái lâu koh phīⁿ-chúi tih, kóaⁿ-kín khì kā a-bú tâu, koh sàng hiaⁿ-ko chi̍t-pôaⁿ tek-sún chhá bah-si, chit-má siūⁿ–lâi chin chhù-bī, hoâi-liām hit-chūn hó chhiò ê tāi-chì.
目一 nih，青春花蕊當盛開，拍拚 ê 理想一大堆，想欲台頂唱歌穿媠媠，無疑開喙走音像刣豬，只好看破喙莫開，傷心無奈另發揮。閣想學習煮食刣刺䲅 ，上愛滷肉炸雞腿，紲–來因為食傷肥，體重數字一直追，趕緊運動 peh 樓梯，恢復健康結實才古錐。想想咧，抑是認真練習母語莫摸飛，善用時間無浪費，語言文化長流水，聽有意思袂克虧，傳教囝兒熟母語，明白道理捌是非，以後社會展權威。
Ba̍k chi̍t nih, chhing-chhun hoe-lúi tng sēng-khui, phah-piàⁿ ê lí-sióng chi̍t-tōa-tui, siūⁿ beh tâi téng chhiùⁿ-koa chhēng súi súi, bô-gî khui-chhùi cháu-im chhiūⁿ thâi-ti, chí-hó khòaⁿ-phòa chhùi mài khui, siong-sim bô-nāi lēng hoat-hui. Koh siūⁿ ha̍k-si̍p chú chia̍h thâi chhì-kui, siōng ài ló͘-bah chìⁿ ke-thúi, sòa–lâi in-uī chia̍h siuⁿ pûi, thé-tāng sò͘-jī it-ti̍t tui, kóaⁿ-kín ūn-tōng peh lâu-thui, hoe-ho̍k kiān-khong kiat-si̍t chiah kó͘-chui. Siūⁿ-siūⁿ–leh, ia̍h-sī jīn-chin liān-si̍p bó-gí mài mo͘-hui, siān iōng sî-kan bô lōng-hùi, gí-giân bûn-hòa tn̂g-lâu-chúi, thiaⁿ-ū ì-sù bōe khek-khui, thoân kà kiáⁿ-jî sek bó-gí, bêng-pe̍k tō-lí bat sū-hui, í-āu siā-hōe tián koân-ui.
手抱孩兒才知爸母時，原來飼囝無容易，寒–人驚伊衫仔褲毋知添，熱–人驚伊著痧 tō 注意，用心栽培加準備，望伊出脫過好日。感恩爸母辛苦 kā 阮飼，雖然我無趁大錢，毋過我會有孝恁規年，向望爸母健康食百二，未來一切攏順利。
Chhiú phō hâi-jî chiah chai pē-bú sî, goân-lâi chhī-kiáⁿ bó-iông-īⁿ, kôaⁿ–lâng kiaⁿ i saⁿ-á-khò͘ m̄-chai thiⁿ, joa̍h–lâng kiaⁿ i tio̍h-soa tō chù-ì, iōng-sim chai-pôe ke chún-pī, bāng i chhut-thoat kòe hó ji̍t. Kám-un pē-bú sin-khó͘ kā gún chhī, sui-jiân góa bô thàn tōa-chîⁿ, m̄-koh góa ē iú-hàu lín kui-nî, ǹg-bāng pē-bú kiān-khong chia̍h pah-jī, bī-lâi it-chhè lóng sūn-lī.
註：
刺䲅：chhì-kui，魚類，六斑刺河豚。
寒–人：koâⁿ–lâng，寒天時。
