(請安裝Taigi Unicode字形，配合Firefox瀏覽器來讀)
作者：王桂蘭
宗親會是海外華人重要 ê 組織。拄拄來到一个所在，人地生疏、啥物人攏毋捌 ê 時陣，「關係」就非常重要。但是關係 ê 建立無遐爾緊，「人不親土親」上緊會使切入 ê 其中一个點就是 kám 是對仝一个所在來？若是有仝款 ê 土地記持、生活記憶，就會較緊。
若是地點無法度有關係，koh 來會當揣仝字姓 ê 人開講。菲律濱 ê 華人真重視字姓，若是拄著仝姓 ê 人，通常攏會加開講幾句仔，甚至是會特別照顧。真濟場合、活動攏看會著宗親會 ê 影跡。
譬論講若是佇學校做先生，教師節 ê 時陣除了學校會分獎金以外，各个字姓 ê 宗親會 mā 有獎金 kap 頒獎。接近中秋節 ê 時，社團、宗親會也會陸續舉辦「博中秋」ê 活動。
大部分 ê 字姓攏有家己 ê 宗親會，譬論講「菲律賓太原王氏宗親總會」、「菲律濱南陽葉氏宗親總會」……，mā 有聯合 ê 宗親會，親像是「菲律濱濟陽柯蔡宗親總會」、「菲律濱六桂堂宗親總會」、「菲律濱六蘭堂宗親總會」……。宗親會 ê 招牌，有 kan-taⁿ 囥漢字 ê，親像太原王氏。Mā 有加上英文 ê，譬論南陽葉氏「Yap Fraternity, inc.」；濟陽柯蔡「Philippine Che Yong Cua & Chua Family Association」；六桂堂「Philippine Liok Kui Fraternity」，這是由洪、龔、方、江、翁、汪氏這六姓組成 ê；六蘭堂「Philippine Liok Lan Foundation Inc.」，這是林、蕭、沈、葉、尤、鍾（章）氏這幾个姓組成 ê。
宗親會是海外華人聯絡感情、互相幫贊 ê 組織。若 beh 進一步了解海外 ê 華人，這是一个會使參考、進行訪問 ê 重要單位。
