(請安裝Taigi Unicode字形，配合Firefox瀏覽器來讀)
作者：王桂蘭
佇馬尼拉 beh 買菜毋是困難 ê 代誌，毋管是佇路邊抑是超市攏有通買，精差佇菜 ê 價數佮鮮沢（chhiⁿ-chhioh）ê 程度。今仔日 beh 介紹 ê 大市倚近中國城，佇「RECTO AVENUE」這條路頂。這个市場主要是咧賣菜，附近 ê 巷仔 mā 有咧賣水果、衫仔褲佮雜貨，但是肉砧、賣海產 ê 無幾攤。
伊是晏市，暗時 8 點才開始，一直到早起 6 點。8 點進前，陸陸續續就會有一車一車載滿菜蔬、水果 ê 大貨車來落貨，大貨車 ê 上頂懸會坐一个 beh 鬥拆貨（thiah-hòe）ê 人，看起來若親像是古早時代鏢局押標 ê 人。雖然車駛入來市場了後， mā 無當（tàng）pheⁿ 車，車速慢慢仔，但是看人坐咧 hiah 懸 ê 所在，看了心肝頭猶是真懂嚇，誠煩惱伊會無細膩摔落來。
會來 chia 買菜 ê 人，一般攏是小賣店仔、捒攤仔車 ê 販仔抑是開煮食店 ê 人，來 chia 割菜鮮 koh 俗。Chia ê 菜，上少攏愛買 1 公斤，對彼寡 beh 割貨 ê 人來講是小可仔代誌。但是若對人口較少、無 hiah 定煮食 ê 人來講，1 公斤負擔有較重。M̄-koh，有 ê 頭家人真好，猶是會當參詳，講看覓 kám 會使買半公斤。
台灣大市內底鬥相共拖菜 ê 人叫做「拖工」，但是佇 chia 可能號做「夯工」較適合。因為 in 慣習將貨夯咧肩胛頭，一改 beh 夯三、五袋攏無問題。Beh 送 ê 貨若正經較濟 ê，in 有一款專門載貨 ê 車，車 ê 頭前是 o͘-tó͘-bái 頭，但是車身若像是大型 ê 四角菜籃仔，會使囤足濟菜，mā 會當疊足懸，駛車 ê 人技術攏足好，猶毋捌看過駛 kah 反車 ê。
就阮目前佇大市買菜 ê 經驗來看，in 袂欺負外來客。仝款一種菜 ê 價數，佇無仝攤問 ê 結果攏相 siâng。有 ê 攤仔位 ê 磅仔是電子 ê，價數看現現，真透明。這个大市逐工攏有，貨源穩定、菜色 koh 濟。人客啊！雖罔人大市是暗時才開始，m̄-koh 若是 beh 買上鮮、上俗 ê 菜猶是著愛趁這陣囉！
