火車駛來 田中央

(請安裝Taigi Unicode字形,配合Firefox瀏覽器來讀)

作者:陳金順

咱人初三,氣候燒烙甲親像熱人。

新正年頭有所望,向望行踏初次探訪 ê 地頭。

頭一站來田中央。這个人口量約 4 萬捅,徛佇彰化縣東南爿 ê 小鎮,毋但有設火車頭,區間、莒光、自強攏有停跤 ê 二等站;尚且對 2015 年 12 月起,高鐵彰化站嘛設踮龍潭里。按呢,交通敢無利便?

早起 8:12 對台南坐海線莒光號,10:16 閣延遲 4、5 分鐘才到田中站。

事實上,舊年 11 月 11 就該當踏跤到矣。煞因為電腦抽鬮摃龜,無緣參加「台灣米倉田中馬拉松」走標賽。
出門看天勢。穿 ZEPRO RUN 走標賽 kah ê 青色 T-shirt,面頂疊角格仔 siat-chuh 起行。

落車頭袂赴探聽,nǹg 過幾落位計程車運將,面頭前這間「田頭水文史館」關門閂戶。

向東行中州路倒斡。行無偌遠,倒手爿一段 177 號,就是早前號做田中央公學校 ê 田中國小。我量約知影,台語文前輩蕭平治老師,毋但是這間百年小學 ê 卒業生,20 外冬前嘛對這搭退休。

這回來田中央,自本就按算家己行踏,無事先共人講起,當該然不便攪擾在地鄉親。

歇寒行入校園,無看著警衛仔。顛倒看著兩位奧巴桑,坐佇孔子銅像就近咧開講、食點心。雖罔出入無管制,毋過,正中央過水仔 ê 鐵門挩落來,極顯明無比。

踅對正爿行來運動埕。校園踅踅咧,干焦看著兩家口仔來遮行春。倒轉來校門口,tn̄g 著奧里桑手抱孫。停跤借問佗位好行踏?奧里桑講市區無啥景點,郊外鼓山寺好𨑨迌,不而過行路僫到,坐客運較四序。

看手錶仔,欲倚11點,規氣先治 iau 較頭路直。

紲落,行對員集路老街。現代人重歇假,猶年節時仔,多數店家閣咧 o͘ⁿ-o͘ⁿ 睏。看著新宮街口「集雲旅社」彼幾間古早厝,才淡薄仔有老街 ê 款勢。

較臨 200 公尺,斡過復興路,看著「如意素食」khâng-páng。店面淺間,三个查某頭家咧 hōaⁿ 店。點一碗雜菜湯麵,配一盤山苳蒿,80 兩銀暫時止飢。

食晝飽,徙跤就近乾德宮。行入廟內,廟埕舞台頂三位姿娘咧扭尻川花,歌聲放送 1970 年代 ê 華語流行曲。二、三十位信眾,散坐咧鐵椅仔頂,享用廟方供應 ê 麵羹。

踅翻頭行中州路,想欲行來車頭邊坐客運。賰無 300 公尺,影著倒爿一間「8 豆珈琲」,臨時臨曜 nǹg 入內面覕日頭。共少年頭家點一甌燒 ê Cappuccino,這期間,佇面冊裡請逐家臆我來佗位行踏?臆著 ê,送一本散文集《海角恆春》。

紲落,掀開筆記簿仔罔寫詩。坐咧成點鐘久,詩寫無成,顛倒予冷氣冷甲共 siat-chuh 閣提出來穿。

納 80 箍銀,順紲問頭家咱田中敢有冊店?伊想兩秒鐘,應講阮遮無甲半間冊店。我閣問按怎坐客運去郊區,伊講客運久久仔才一幫,寧可車頭邊租鐵馬較贏。

行來車頭前。遮看遐看,倒看正看,按怎看攏看袂出有人咧租鐵馬,連租 O͘-tó͘-bái ê 影跡嘛無。好喙借問徛佇樹跤 ê 運將,伊講租鐵馬攏收了了矣,看欲去佗,坐計程仔較緊。

我隨翻頭,行來客運車牌仔跤。相規晡,看無會當坐到佗一跡田中 ê 景點。點開電子地圖,搜揣過晝會當行跤到 ê 所在。無意中,影著田中車頭 ê 東北爿,有一个「風車步道」。無番薯,芋仔嘛好;管待伊咧曝日、流汗。

導航揤落,才知愛行 1.7 公里。福安路直行 350 公尺,入去 7-11 買一塊紅豆麭佮一矸冰茶,siat-chuh 褪落來囥踮揹仔裡;正斡行復興路,這節佮食晝彼節無仝向,沿路干焦我孤人步輪,愈行愈有郊區款;無偌久,看著塗跤用紅漆噴「田中馬」三字,頂面用水藍色噴箭頭,我有翕相會當證明猶未落漆;行到半路,一間人家厝前 chhāi 一塊柴桌仔,頂面排十外隻手工做 ê 豬仔囝,大中小攏有,毋過無人看顧,我提兩隻起來目睭前看看咧,囥倒轉閣繼續行。

復興路行咧 900 公尺,倒斡路口 chhāi「東興社區」ê 金字牌仔。向前行一塊仔,總算看著雙爿田園 ê 景緻,咱不便行入田中央,閣行量約 300 公尺,正斡成 10 公尺就是「風車步道」。

這條沿田園邊起造 ê「風車步道」,小可彎來斡去無甲 200 公尺。石欄杆邊鐵管鬥起來 ê 風車,毋但無一絲仔美感,風車葉仔早就斷甲無全屍。

行到步道盡尾。踮路邊歇喘,啉兩喙仔茶,順紲食紅豆麭。

了後,順原路行倒轉來復興路。路裡,tn̄g 著百姓公萬應祠。行到中山街口倒斡,紲落正斡倒斡三、四擺,來到一排人家厝邊仔 ê「環保公園」。佇這个無偌闊 ê 社區公園,坐欲半點鐘,寫一首〈田中短歌〉。

下晡三點外,時間無早,冗早回程。

一伐一伐沓沓仔行轉來田中車頭。

車頭前 ê「田頭水文史館」,這回開門迎接阮。

入內,一位奧里桑佇報紙頂面寫大字。伊講:遮無啥物通好看。有影就著,壁頂一領鬃蓑、一幅 1977 年對空中翕落來 ê 市街相片,邊仔玻璃櫃囥一寡以早查某人 ê 幼項物。

雖罔物件無濟,毋過,彼張掛佇壁頂 ê 文史館沿革,對外地人來講就誠有價值矣。上蓋無會當知捌,這搭往過是五分仔車站,斯當年對彰化平原南部 ê 民眾有袂少利便 ê 幫贊。

16:04 ê 區間車幫。佇月台等車,日頭猛炎炎。

17:40 跤兜,火車過善化站無偌久,佇未到南科站路裡,對車窗相出去,一粒紅紅 ê 西照日掛踮遠遠 ê 天裡,真媠!

18:04 火車停佇台南站。足足兩點鐘久,phēng 早起莒光車幫較緊快。

後逝 tang 時拜訪田中央,全然無按算。

用跤行路,行遍毋捌踏跤到 ê 台灣地,是我心所望。

是遠是近無要緊,心情輕鬆上清閒。

暗頭仔,卓彥亨兄共我講:伊蹛佇昭陽書局隔壁,另日來看咧賣啥款冊?

我有話要說