金豬好彩頭 Kim Ti Hó-chhái-thâu

(請安裝Taigi Unicode字形,配合Firefox瀏覽器來讀)

作者:吳春滿

金豬來到好年頭 Kim-ti lâi-kàu hó nî thâu
豬年好運用袂透 Tī-nî hó-ūn ēng-bōe-thàu
報馬仔來開金口 Pò-bé-á lâi khai kim-kháu
喜事相隨攏全包 Hí-sū siong-sûi lóng choân-pau
福氣滿滿捀規斗 Hok-khì boán-boán phâng kui-táu
氣運上旺現金厚 Khì-ūn siōng ōng hiān-kim kāu
到老猶原真 gâu 走 Kàu lāu iû-goân chin-gâu cháu

春暖花開心歡喜Chhun-loán hoe-khui sim hoaⁿ-hí
滿心祝福誠心意 Móa-sim chiok-hok sêng sim-ì
懇求上帝來保庇 Khún-kiû siōng-tè lâi pó-pì
年年順序閣如意 Nî-nî sūn-sī koh jû-ì
祝賀逐家食百二 Chiok-hok ta̍k-ke chia̍h pah-jī
福份飽滇好運氣 Hok-hūn pá-tīⁿ hó ūn-khì
留下美麗的記持 Lâu-hā bí-lē ê kì-tî

祝福所有好朋友 Chiok-hok só͘-ū hó pêng-iú
恁愛認真加研究 Lín ài jīn-chin ke gián-kiù
平時練習智慧修 Pêng-sî liān-si̍p tì-hūi siu
安心認證免憂愁 An-sim jīn-chìng bián iu-chhiû
健全思維做議量 Kiān-choân su-uî chò-gī-niū
康健身體四界遊 Khong-kiān sin-thé sì-kè-iû
老神在在無煩憂 Lāu-sîn chāi-chāi bô hoân-iu

事業大展賰家伙 Sū-gia̍p tāi-tián chhun ke-hé
事事項項攏好勢 Sū-sū hāng-hāng lóng hó-sè
順利考試無問題 Sūn-lī khó-chhì bô-būn-tê
心頭清爽萬事齊 Sim-thâu chheng-sóng bān-sū chê
好心好話配好茶 Hó-sim hó-oē phòe hó-tê
彩頭百面綴你坐 Chhái-thâu pah-bīn tòe lí-chē
頭人就是你一个 Thâu-lâng tō-sī lí chi̍t-ê

廣告/美好腳蹤368認購

我有話要說