(請安裝Taigi Unicode字形，配合Firefox瀏覽器來讀)
作者：黃政枝
透早天才打普光 thàu-chá thiⁿ chiah phah-phú-kng
橫心共阮挖起床 hoâiⁿ-sim kā goán ó͘-khí-chhn̂g
想起舊年幼稚園 siūⁿ-khí kū-nî iù-tī-hn̂g
若無睏飽無出門 nā-bô khùn-pá bô-chhut-mn̂g
翻身爬起猶愛睏 hoan-sin peh-khí iáu-ài-khùn
洗面穿衫若失魂 sé-bīn chhēng-saⁿ ná sit-hûn
饅頭入嘴昧赴吞 bân-thô ji̍p-chhùi bē hù thun
趕緊上路閃車陣 kóaⁿ-kín chiūⁿ-lō͘ siám chhia-chūn
國語數學六七項 kok-gí sò͘-ha̍k la̍k chhit hāng
冊包強欲五斤重 chheh-pau kiông-beh gō͘-kin-tāng
垂佇背後若鐵桶 sûi-tī pōe-āu ná thih-tháng
揹著啥人的盼望 phāiⁿ-tio̍h siáⁿ-lâng ê ǹg-bāng
