Ai-Thiàⁿ ê Hun-Bī

(請安裝Taigi Unicode字形，配合Firefox瀏覽器來讀)

作者：陳俐雯

Tīⁿ-boán ê oan-khut tiám-to̍h sí-bông ê chiàn-hóe
Hun-ian phiau-sàn ai-kiû ê lêng-tī siaⁿ
Ín lâi káu-thâu-eng chù-ba̍k tán-thāi
Thèng-hāu Tê-hâng ê chhèng siaⁿ
Tò͘ chhut hùn-nō͘ ê hoeh-kng

Tâi-oân-lâng ah! Tâi-oân-lâng!
Cháu-cheng ê kî-thāi ōaⁿ bô-chêng ê chhòng-tī
Siān-liông ê lêng-hûn tit-tio̍h nńg-thô͘-chhim-ku̍t ê thún-tah
Kóng-hó ê tiâu-kiāⁿ goân-lâi sī khang-chhùi po̍h-chí ê chiù-chōa
Kāu-hēng ê sim chiah-sī chhut-bē Tâi-oân ê bīn-tà

1947 ê “Formosa” bí-lē put-chāi
Bia̍t-bông ê sông-hong hō͘-lâng bē-hù cháu-siám
Piáng, piáng, piáng!
Lí tó tī ní âng ê tāi-tē
Lâu-lo̍h chòe-āu cht-tih toān-tiông ê ba̍k-sái

Tâi-oân ah! Tâi-oân!
Ai-thiàⁿ ê hun-bī iáu leh phiau-sàn
Tô͘-sat ê chhèng-chí iáu-bē chhú-hā
Sèng-chiàn-sū ê lêng-hûn iáu-bē an-hioh
Le̍k-sú ê hoeh-jiah sī éng-oán hú bē tiāu ê siong-thiàⁿ