(請安裝Taigi Unicode字形，配合Firefox瀏覽器來讀)
作者：Kùi-lân
每一个國家攏有 in ê 紙票 kap 銀角仔。紙票、銀角仔頂懸 ê 錢額 kap 彼个國家 ê 錢 ê 大細有關係。親像印尼 ê 錢就較細圓，印尼盾（IDR）ê 錢額就足懸，以 2018 年 11 月 16 ê 匯率來講，1 萬箍 ê 印尼盾干焦會使換 21.0697 箍 ê 台票（TWD）。歐元（EUR）就足大圓，以 2018 年 11 月 18 ê 匯率來看，1 萬箍 ê 歐元會當換著 34 萬 9257.90 箍 ê 台票。仝 11 月 18 ê 匯率，1 萬箍 ê 菲幣（PHP）會當換 5817.45 箍 ê 台票。
菲律賓現此時用 ê 紙票是 2010 年 ê 版本，面額有 20 箍、50 箍、100 箍、200 箍、500 箍和 1,000 箍披索（peso）這 6 種。另外 1998 年，有出紀念性 ê 紙票，面額是 2,000 箍披索和 10 萬箍披索，但是這干焦會當使用到 2018 年 7 月 31 進前，時間過就失效矣！10 萬箍披索 ê 紙票是菲律賓發行過錢額上懸，mā 是上大張 ê 紙票，這是為著欲紀念菲律賓共和國獨立 100 冬所發行 ê，數量干焦有 1,000 張。2,000 箍披索 ê 正面是菲律賓第 13 任總統約瑟夫．埃斯特拉達（Joseph Ejercito Estrada）宣誓就職 ê 畫面，後壁面是總統就任了後，ia̍t 國旗向集會 ê 民眾致意 ê 畫面。
銀角仔佇 2017 年拄換過新 ê，有 8 種：1 分、5 分、10 分、25 分、1 箍、2 箍、5 箍和 10 箍披索。銀角仔因為面積較細，會使囥 ê 圖、符號較少，所以囥佇頂懸 ê 一定是重要、有象徵意義 ê。比論講會囥銀角仔 ê 錢額、菲律賓中央銀行（Bangko Sentral ng Pilipinas, BSP）ê 圖（Logo）、頭人 ê 像抑是物產等。1 箍後壁面 ê 人頭就是菲律賓國父黎剎（José Protasio Rizal Mercado y Alonso Realonda）ê 人像。
紙票 ê 面積較大，會使囥 ê 物件、元素就較濟。紙票 ê 正面主要攏是囥頭人 ê 像，後壁面 ê 變化就較豐富。親像 20 箍 ê 後壁面是囥巴拿威（Banaue）樓梯田和椰子貓；200 箍 ê 後壁面是囥薄荷島（Bohol）ê 巧克力山（Chocolate Hills）和目鏡猴（Tarsier）；500 箍 ê 後壁面是巴拉望省（Palawan）ê 普林塞薩港地下河公園（Puerto Princesa Subterranean River National Park）和藍色頷頸仔 ê 鸚哥（Blue-nqped Parrot）。這寡仔攏是這个國家重要 ê 文化、自然資產和動物。欣賞、認捌一个國家 ê 紙票、銀角仔，mā 是熟識彼个國家誠好 ê 入門方法之一。
2017年菲律賓新出的銀角仔（一部分：10箍、5箍、1箍、25分披索）。
