(請安裝Taigi Unicode字形，配合Firefox瀏覽器來讀)
作者：陳金順
3 月初 3，古都馬拉松 ê 大日。
我無報名。早時六點跤兜，運動轉來 ê 路裡，佇南門路頂面看著選手沓沓仔前進 ê 形影。明年這陣，向望有才調參加半馬。
八點十外分，行來台南車頭邊彼間7-11。家己操作機台，印出「2019 橋頭星光夜跑」納款單，納 830 箍予櫃台，等待 6 月 22 下晡 5 點 15 分，參一陣生份人做陣走標。
行入第一月台，開 18 兩銀買一粒菜包，佇車班來進前共消化掉。8 點 38 分上區間車，9 點 10 分落菝仔林車頭，有共月台告示牌「拔林」翕起來做證。
台南地區攏總 17 个火車站，遮是唯一 ê 招呼站，無人顧守，干焦停區間車。毋通看伊殕殕，人有 117 冬的歷史。
頭擺搪著這款情形，揣無卡欲鑢佗位，閣無人通借問，只好輕步出站。
出站，揤手機仔定位。徛踮日頭跤，愣愣看無按怎行？遮行，遐行，煞行來一條無尾路。佇邊仔做穡 ê 奧里桑眼一下，隨看出我 ê 範勢，照伊指示踅翻頭先來車站補過卡，才袂造成重擔。
紲落，行過天橋彼爿頭。落天橋，順倒手爿 171 縣道直行，經過一間社區型kám 仔店、拔林派出所，閣過無偌遠就是渡拔國小。徛佇校門口，看著關門閂戶，本底淡薄仔失望欲往回行。無意中，行對正手門邊探看覓，原來會當對遐入來校園。
入來校園，正手爿一座嶄然仔現代感 ê 裝置藝術。這座藍色 ê 裝置藝術，號做「凌波水立方」，2018 年由藝術家胡閔堯創作，成做渡拔國小建校 60 週年紀念雕塑。
這間小學專收渡仔頭佮拔仔林兩个庄頭 ê 囡仔。自古早到今，曾文溪、官田溪佮渡仔頭溪，做伙流入這兩个相隔界 ê 庄頭，遮實在是一塊寶地。
行來過水仔，正爿公告欄「本土教育」下底，有兩張學生囡仔根據台灣俗語畫 ê 彩色圖。規个校園細罔細，有一項唌我目光 ê 做法，特別講出來參逐家分享。
學校共自 1961 年第 1 屆到 2018 年第 58 屆畢業生 ê 相片放大，對過水仔延續到甲所有教室雙爿外面，一張一張照順序好禮仔貼，對烏白到彩色，對 20 世紀到 21 世紀，毋但保存學校 ê 記持，嘛見證時代 ê 遷變。
設使你是渡拔國小 ê 畢業生，的確會為母校感覺不止仔光榮，連我這个頭擺踏跤到 ê 外地人，心肝穎仔都足燒烙。
另外，由地方人士捐款起造 ê「勵學堂」，嘛成做校園裡 ê 美麗景緻。
離開學校 ê 時，十點外矣。日頭漸漸光猛，參早起 ê 涼意有影強烈對比。沿 171 縣道往回行，經過拔林派出所，小可斡一下，閣再經過拔子林活動中心，向前行一塊仔，樹林那來那茂，「川文山森林生態保育農場」到囉！
管伊農場抑林場。上蓋要緊 ê 是，地主免料提供遮爾曠闊 ê 地場予人行踏，腹腸毋但普通 ê 開闊爾。聽講遮往過是 14 公頃 ê 檨仔園，落尾，配合政府獎勵造林計畫來改做森林。
行入園區，搪著一大陣對高雄、屏東相招駛車來 ê 朋友。怹家己紮食 ê 物件佮家私來這搭煮晝，確實鬧熱滾滾。咱不便踮遮鬥鬧熱，跤步徙振動體驗森林 ê 美意。
這座小山崙沿路齊樹葉仔。無論早就焦蔫抑是拄輾落來猶青翠青翠，雙跤輕略仔踏過，sōa、sōa、sōa……袂輸一款自然 ê 輕音樂。
佇樹林佮樹林之間，有看見兩口無偌大 ê 埤仔，詩意、畫意、涼意……在人佮意。
欲起來 ê 山路邊 théng 好停車，園區裡嘛設一个停車場。停車場裡，chhāi 兩間流動便所，嘛有四、五个在地人排 ê 擔仔位。有賣手工鞋、果子、塗豆佮僫得分類 ê 綜合擔。我買兩粒對澎湖過鹹水 ê 米芳球，一袋阿婆翁某咧賣 ê 菝仔。買無濟，煞參怹開講規晡久，感受滿滿 ê 人情味。
過晝 12 點半，天咧變面一目nih。拄才日頭猶光澄澄，連鞭隨烏陰透風。
欲坐火車進前，先就近參觀慈安宮，這搭是菝仔林 ê 庄廟。未曾行到廟埕，天就咧滴雨。參觀了後行出廟埕，搪著對大橋來 ê 翁仔某，佇雨裡做伙行向火車站。
菝仔林，川文山，我的確會閣再踏跤到遮。
