(請安裝Taigi Unicode字形，配合Firefox瀏覽器來讀)
作者：陳金順
斯當時，決志欲 thīn 戲齣《海江湧》ê 時，註該咱攏是台江人。《海江湧》ê 副標題，正正就是「咱 ê 日子」。這个「咱」用了誠讚！咱不得不謳咾導演 ê 在地情懷佮眼界。
開成千箍買自由座，目睭連 nih 一下嘛無。毋捌對家己遮慷慨，實在是這个戲齣咱足愛。自由座，其實就是「移動席」。這拆票彼時就真知，不而過，到底欲按怎移動？這，機關囥佇倉庫。
2019 年 4 月 19，拜五。《海江湧》首演 ê 時日，下晡煞絞大風、摔大雨。拄散學，咱彼雙寶貝紅布鞋，頭擺予雨水浸 kah 澹漉漉。心內有按算，這陣雨若毋歇喘，咱計程車錢愛攢予便。
佳哉，未曾 5 點，雨先斷點。O͘-tó͘-bái 緊猛催予行，照原底規劃 ê 路線：公園路、成功路、文賢路、海佃路、安吉路，一路直溜溜，順序揣著「台江文化中心」顯目 ê 形影。對外觀共看，伊 ê 形體不止仔特出，毋知欲用啥款形容詞來形容？
到位 ê 時，離開演猶點半鐘，離入場猶成點鐘。入鄉隨俗，入境滿足。滿足家己 ê 好玄，四界行行遶遶咧。
6 點 40 跤兜。入場進前，工作人員共一个青色捲尺，輕輕仔捲踮我 ê 倒手手目，捲尺頂面印「海江湧――咱的日子」。
入場坐定。座位就佇舞台邊仔，演員 ê 一舉一動，對這搭聽好看甲現現現。
7 點捅。導演廖若涵 peh 起去舞台頂講話，伊 ê 話句簡短明白，親像伊 ê 短頭鬃相 siāng，嶄然仔 a-sa-lih。
尻川坐猶未燒。咱掠準欲來一个大開幕，想袂到，工作人員請阮徛起來綴伊行。
這个「移動席」ê 概念，phēng 我想 ê 閣較 surprise！未曾未就來一个貓徙 siū，行出劇場，予人 chhōa 來一个家庭式 ê 工場。遮 ê 地毯佮阮 ê 手環仝款青色 ê。
開場進前，一位中年婦人人 Lily 徛出來引言。
紲落，《海江湧》所有演員，一个一个行入場景裡，有 ê 坐、有 ê 徛， 30 个人 kheh 踮遮爾狹勢 ê 所在，敢袂狹櫼櫼？！若講袂，恁敢欲相信？！
我真正感覺袂。因由這个開頭 ê 設計，予觀眾順其然成做「咱」。「咱」參這 30 个人是厝邊、是隔壁，是路頭路尾拄搪會著 ê 鄉親。
這 30 个鄉親，隨个仔隨个自我紹介。了後，眾人退場，賰 5 个留落來。
簡簡單單幾隻裁縫車，5 个女工，包含頭家娘金鳳，親像一家伙仔遐爾日常。車衫、車布邊，手那車喙那開講，慢來 ê 阿蕊佮阿惠，有少年人 ê 青春夢咧心內浮沉。
紲落，阮這陣觀眾予人 chhōa 來港墘。
駛手撐船 ê 牛角，明仔載就欲離開渡船頭，伊有航向世界 ê 心志，毋過，毋捌字 ê 伊，對勇伯 ê 喙裡，知影小小 ê 手撐船，無才調駛過太平洋。出台江了後，伊欲按怎行未來 ê 人生路？
台鹼安順廠，這个造成嚴重汙染案，予鹿耳門就近 ê 土地著癌，捌成做新聞主角 ê 地場，想袂到嘛進入戲齣裡。這个場景，設踮後場，工廠裡 ê 管線佮煙霧，實實在在展現佇阮 ê 目睭前。先來晏到這 4 位少年家，佇年久月深 ê 煙霧裡，逐日浸佇鑿鼻 ê 臭味，敢趁有生活佮向望？！
踏著沈重 ê 跤步離開安順廠，阮閣轉來鋪青地毯的女工廠。
這前後四場三景 ê 搬演，量約開 50 分鐘，規齣戲 ê 長度到遮過半。到遮，總算坐倒轉來成點鐘前 ê 座位。好戲一幕紲一幕……
佇主舞台頂，布景有甘蔗園、塭仔岸、蚵仔棚、鹽埕……綴劇情鋪排，一幕一幕自然替換。
有土地鹹纖鹹纖 ê 歌，有真愛熱情 ê 舞步。15 位專業青年演員、15 位素人中年演員，猶閣有幾落位天真 ê 囡仔演員；現場 5 位樂手，透過無仝樂器輕聲細說，替《海江湧》點脂畫眉。
濟濟幕後工作人員，佇咱看袂著 ê 所在拍拚，一直到煞戲猶未煞鼓。
《海江湧》毋是展現演技 ê 比賽場。
《海江湧》是比樸實閣較樸實 ê 所在。
規座台江劇場，是一个「記持博物館」。
行入《海江湧》，咱攏是台江人。
下回，海江湧若閣起，我嘛欲蹽落去。
