跋落子兒坑 Poa̍h lo̍h kiáⁿ-jî kheⁿ

(請安裝Taigi Unicode字形,配合Firefox瀏覽器來讀)

作者:李南衡

隔壁林阿媽講 in 外孫女阿梅無捨施,七少年八少年 tio̍h「跋落子兒坑」(poa̍h lo̍h kiáⁿ-jî kheⁿ),猶無 35 歲 tio̍h 已經生 5 個囝仔,若照伊 hiah 呢會生,生到 49,我看無生成 10 個 bē 煞。主要是 in 大家講 in 周家三代單傳,會生 tio̍h 拍拚生,講伊會鬥 chhōa 無問題。我真好奇,問講是按怎講是「跋落子兒坑」,查某囝仔敢無算?當然算當然算。早前咱猶無節育 ê 觀念 kah 方法,出在伊生,生 7、8 個囝仔那像真平常,大部分 ê 父母攏 mā「跋落子兒坑」。

早前 ê 人生真濟囝仔,那像 m̄ 是干單台灣按呢。我讀東海大學 ê 時,大學一二年必修英文,會記得美國老師發 ê 補充教材 hō͘ 阮讀一篇,已經由《讀者文摘》簡寫了 ê 英文叫作〈歸打買 khah 俗〉“Cheaper by the Dozen”,寫一個有 12 個囝仔 ê 老父 kah 伊 ê 囝仔 ê 故事,相當趣味。老父是一間公司 ê「效率專家」,專門去各大公司、工場指導按怎工作、生產才會 khah 有效率。人若問伊按怎證明伊是效率專家,伊 tio̍h 會 kā 身軀 khi 一旁,hō͘ 人看 tio̍h 伊 ê 12 個囝仔,而後哈哈大笑,問話 ê 人看了 mā m̄ 敢 koh 懷疑伊 ê 效率身分。阮父母生 12 個囝仔、抵抵查埔查某各 6 個,我讀 hit 篇文 ê 時陣有 teh 想,阮老父到底是效率專家、抑是貪 tio̍h 歸打買 khah 俗、抑是無意中跋落子兒坑?

戰後 ê 1946 年,台灣 ê 總人口大約有 600 萬,1949 年中國國民黨「拍輸走贏」「轉進」來台灣,大量 ê 軍人 kah 官員、平民作一睏溢入來台灣,加上全世界戰後 ê 嬰兒潮影響,一時之間台灣 ê 人口增加近 739 萬。1959 年當時 ê「農復會」主委蔣夢麟先生發表一篇〈咱來面對愈來愈迫切的台灣人口問題〉,提倡節育。當時有一寡人真受氣,講 beh 反攻大陸需要人,那會使勸人民節育,甚至有極端 ê 人,主張 kā 蔣夢麟先生用飛機載去中國大陸空投。總是政府開始重視人口問題,tī 1964 年開始推廣家庭計畫。節育 ê 口號,上流行 ê 是:「一個無嫌少,兩個抵抵好」。宣傳 kah 真澈底,農復會有拍影片說明節育 ê 重要性,加上護理人員深入到家家戶戶講解,勸已經有囝仔 ê 婦女 tio̍h 裝避孕器「樂普」“Lepu”,20 年間大大改變台灣 ê 人口結構。

因為慢婚 kah 少子化 ê 關係,2018 年 8 月,國發會預計台灣人口會 tī 2022 年開始出現負成長,致使人口結構老化、勞動力不足 kah 扶養負擔過重等社會問題。其實有 7 個縣市 tī 2008 年前後,人口 tio̍h 開始負成長。政府 tī 2005 年推動新 ê 口號:「兩個囝仔真幸福,三個囝仔 khah 鬧熱。」各縣市攏有獎勵生囝仔 ê 辦法。Koh 過幾年,你講「跋落子兒坑」,可能無人知影你講啥。

李南衡《那teh褪色的台灣俗語話》(1-2冊 )已經出版,歡迎來交關,做伙進步

廣告/美好腳蹤368認購

我有話要說