(請安裝Taigi Unicode字形，配合Firefox瀏覽器來讀)
作者：凍露水
「詩集是 chhit 過 ê 1 thia̍p chho͘ 紙」
「詩集是 chhit 過 ê 1 thia̍p chho͘ 紙」
Kán！He koh 是詩人 ê 白賊話
Phùi 1 chhùi chhùi-nōa tī 詩 ê 第 1 chōa
Kán！憑 toeh 1 條講你是詩人！
你 m̄ 敢承認。據在我 chhoh、kàn、kiāu
Koh 欲虛構 siáⁿ-mih 款 ê 情愛 kap 偉大 ê 功德！
你 he 左派 ê 動詞是 án-chóaⁿ tiām–khì
右派 ê 名詞聽講是 lín 賞賜–ê
Siáⁿ！Lān-chiáu sioⁿ 粗袂講–chit
你 kám 無讀過 K ê 詩「看海 ê 日子」
無注 kha，敢袂曉 péng 字典？
免怪罪 Ku-go̍͘h 先生袂曉！
Kám tō ài 爭論 chāi-châng-n̂g kap hiān-lâu-á ê 精差
Koh kō͘ hit lō 現代 kap 後現代主義 ê 學術名詞。我袂 giàn 聽！
我。干焦有時
Kō͘ 非理性 ê 思想 ioh lín ê 面腔頂遺留 ê 浮字
有時佇街路收集行路人 ê 煩惱
有時 kō͘ Fourier 展開 ê 人生
Chhiau-chhōe 對應 ê 係數
落雨時看路面 ê 水 khut-á 激 1 个 1 个細細 ê 水花
看 kah 神–去
Koh 有
頭殼內 koh 遺留幾幕昨暝無清 ê 畫面
為 chia 小寡大代誌寫寡 m̄-chiâⁿ 短句 niâ
我無文學、學問，毋是詩人–lah
我。干焦捌
用薰紙寫 1 首短短 ê 詩
落尾…… koh kō͘ 來捲薰
Mài 問我寫 siáⁿ？
我。干焦會使 kā 你講。（你袂當 kā 別人講）
He 是欲 hō͘ 未來 ê ka-tī ！
你愛知我對薰味過敏
過敏 ê 目 chiu hō͘ 薰 chhiàng kah 流目屎
無的確詩 ê 情感會 khah 加
Siōng 少有 tām-po̍h-á kiâm-chiáⁿ
所致，我 ê m̄-chiâⁿ 詩應該有寡味才著
蛀空 ê 詩集
有寡詩注定永遠無人讀–過
Hoān-sè 讀過 mā 讀無
Chhan-chhiūⁿ 一寡無人知 ê 花草
佇城市內無人致意 ê 角勢喘喟
就算花期到清芳 ê 味 thòaⁿ–出-來
人 soah 對 in 過敏……
Siáng kā 詩 chōa 刻佇車龍來去 ê 路邊
你 pháiⁿ-chhèng-chhèng 講：「He 是對詩 1 種侮辱！」
敢有人讀，敢有人來唸
Che 城市敢 tio̍h 愛增加 1 條虛華 ê 罪名
袂輸講你 ê 詩無愛買賣
Hit 日
掠文學秤斤量兩 ê 舊冊店頭–ê
九去一進一計算詩人 ê 純度
He 看起來 sin-tiám-tiám koh 鼻起來臭 phú ā 臭 phú 味
冊皮影–一下
He m̄ tō 是你家己出版 ê 詩集
你 kan-taⁿ 苦笑講「算 kah 差不多 leh」
「這是你 ê 全集，出版 tō 是絕版」
我偷偷 á gia̍p 1 本 tī kha-chiah 後
你笑笑看–我問講：「你有 leh 寫詩無？」
我一時躊躇 m̄ 知 án-chóaⁿ ìn
Mā 躊躇欲 hō͘ 你簽名無
我的確無應該害你有虛華 ê 罪名
一斤 2 kho͘ 半是目前市場行情
做生意袂使擾亂市場自由競爭
你我無句赤身露體見證詩人 ê 落魄
你 200 kho͘ sa leh 大 hoa̍h chông–起-去
我 ǹg 你行出去 ê kha-chiah-phiaⁿ
大聲 hoah：「我有 leh 寫詩……」
詩，漲懸價
詩人 ah，mài koh 浪費紙稿
（我 m̄ 是環保沙文主義，mài 五、六會！）
He ê 短句
（M̄ 知是有話無句 á 是筆墨無水？）
Hia ê 空白
（袂記 hē 插圖來配合大舌？）
無應該 tàn hō͘ 予讀者激頭殼
（詩人 kám m̄ 是 siōng tah-sim ê kâu-san-á？）
因為 in ê 心已經滇 ah
（Tī 我做實習詩人時，我捌剖過 200 人 ê 心）
因為短句散 iā-iā ê 線索
（Hiah 短 ê 詩 chōa kám 是 chián-liú-á chián–khì？）
想像空間爆炸無法度收 soah
（Chhan-chhiūⁿ 殖民者吐蛇鬚噴毒汁 am-khàm 人 ê 雙目）
規氣 lah，留一疊白紙
（Siáⁿ-mi̍h 款 ê 白，pe̍h-phông-phông ê pe̍h，pe̍h-siak-siak ê pe̍h，茭白筍 ê 白，魚肚白 ê 白……）
予讀者寫家己 ê 話
（只要超過詩人詩 ê 字數…… tō thang 證明有出版 ê 法度）
橫直，詩集出版 to̍h 隨 tiām-tiām tī 壁角
（來，親 chiâⁿ 五十，朋友一百，過路人百五……來，價數好講……）
Ta̍uh-ta̍uh-á 生菇
（阿婆 á，chia 字紙 hō͘ 你 khioh……詩集仝款一斤 2 kho͘ 半）
詩人注該 che̍h-chéng
（未來 ê 讀者 ah，緊去 chhōe 阿婆，無，伊的確會 tiùⁿ 懸價……）
(PS: 參加嘉義文學獎 ê 感想。)
Chhiūⁿ-chhî ê 詩集
Phiaⁿ tī 桌頂逐工 kâm 澹 lō͘-chúi
He 是孤單
我已經 thiám kah 失去思考 ê 法度
Kan-taⁿ 想欲行 ǹg 向陽 ê 所在
重新感受時間 ê 定義
He ui–khì ê 筆尖
Tiāⁿ-tio̍h thàng 袂過人 ê 心
免刁工 chhiau-chhōe ā-sī 分拆 he àu 臭 ê 話母
我已經 lán–ah
Mā m̄-káⁿ 望
來，一頁一頁 li̍h–tiāu
獻祭
Chhan-chhiūⁿ kap 前世人 ê 對話
Ùi 誤解 kàu 認捌
He phû-phiò 無 tiāⁿ ê 心情
He oaiⁿ-chhoa̍h ê 詩句
Hō͘ 你像斷線 ê 風吹一下仔 tō 走 kah 看無人
放你自由
我 tu 1 支薰 hō͘–你
Soah 鼻著我酸澀 ê 汗
最後 1 首
講無愛 koh 寫詩 ah
你當作我是 leh 講笑 khoe
詩，敢有法度 tháu-pàng 伊咬死死 ê 目 sái
無 gōa 大 ê 心悶 beh tháu lah
Kan-taⁿ 是小寡 á 感動
一時 hiâu-kha-chhng
Thiau-kang kō͘ 文字 chng-thāⁿ
好 thang siâⁿ 伊 chheⁿ-léng ê 目 chiu 仁
你 koh 當作我是 leh 起神經
我講（空 phàⁿ ê 心 leh ǹg-bāng 結 chí）
無 tiāⁿ chit 首詩 ē 起風
Kā 伊心肝頭 ê eng-ia
Pûn hō͘ 散……
Sui-bóng 今年刺桐無紅
寫詩血 chiah ē 滾
Chiah thang 繼續我 ê 無知
你。Tiām-tiām 無話。讀我最後 1 首……
詩人告白
Tī chi̍t ê tǎ-tǎ-bí 大細 ê 監牢
起 áu-ut ê 報頭風是我 lo̍h 筆做 gī-niū ê 時
免問 ài 用 siáⁿ-mih 手法來勸世 á 是 po-so hia 有–ê 無–ê
知影 lín 已經 ià-siān 測度詩人白賊 ê 相關指數有 gōa koân
M̄ -thang 怪我 kan-taⁿ siàu 數 beh chhèng lín 目屎有 gōa 重
Lín ē ēng 得講我罪 kòa 重 a
是講 lè-táu ê 詩 chōa khiú-la̍k lín 無 tiāⁿ ê 心魂
直透 kàu lín siōng 烏暗 ê 所在
內底 kan-taⁿ 我 ê ta 笑聲不時 leh tńg 回
Soah 無才調無法度 chhōe tio̍h 我變形 ê 面腔
M̄ -thang 批我雙面刀鬼 kàu taⁿ lín chiah 看現現
He 是 lín 色目 bái koh 不時 kā 詩人 phô͘ koân koân
Bat 聽人講半暝寫詩無細膩 ē kā 心 phah-ka-la̍uh
Kám 講 che thang 脫離魔鬼
Iā 是 kan-taⁿ koh 是 hia 寫詩 ê 人欺世三不等 ê nôa-thâu
Thèng-hó kā 憂國憂民 hit 條神經 koh 再 ká kah ân leh
Sio thiàⁿ-thàng ê 情緒牽 bán一字一字 ta̍uh-ta̍uh-á puh-íⁿ
請讀者目 chiu 皮 m̄-thang kā 目屎咬死死
放 hō͘ i 流 chhoah
洗 tn̄g 苦痛、救贖 hiau-hēng
大聲講 che chiah 是正港詩人 ê 義務
你 ài 知 tī 烏暗 ê 時代是詩人大出 ê 季節
Mā 有人 thiau-kang kā 靈魂放 sat tī 詩 chhōa
Hō͘ 人拈香祭拜
死後，boeh án-chóaⁿ hoah 懸 hoah 低
M̄ -thang 出 1 支 chhùi 講：「Lín lóng 是罪人」
「緊來緊來，人客 a，chi̍t 本 lī-á-gō，買 1 本送 1 本」
「好 thang 款錢項 hō͘ 詩人起行…… o͘h」
讀者看 kah 筆緊包包起來
目尾掃 tio̍h Hoah 場 ê 人 hoah kah ka-tī ê 影 lóng 走去 bih
Hō͘ 你 ê 詩集
「寫 1 本詩集 hō͘–你
做咱一生幸福 ê 交換條件」
詩人 pûn ê ke-kui 無 sè-jī 漏風
油 thong-thong ê 筆墨流–落-來
字句一字一字 kǹg 做 ê 鐵鍊
共心束縛
Kha̍p tio̍h 無情 ê 人 chiah 會 tài che 無藥醫 ê 相思
Koh 想袂開討債 lán ê 睏眠替你 nôa
人總算留一 kóa tāi-chì thang 後悔
Hia 你允 ê 人生旅行 Iáu-bōe 完成
Mā kan-taⁿ 放 i 去
你 hit 一疊厚厚 ê 向望
Khah 輸一杯冷–去 ê 烏咖啡
Tī bó͘ 一个無心情 ê ē-po͘
等待 chhio-chhìn 風
家己唸 hō͘ 家己 ê 影聽
Ta̍uh-ta̍uh-á 畏寒……
夭壽死 ê 青春
記持無疑誤來 chhiūⁿ-chhî
時間 ta̍uh-ta̍uh-á 在欉黃
詩人 bē 記按怎反抗……
