(請安裝Taigi Unicode字形，配合Firefox瀏覽器來讀)
作者：温兆遠
今仔日是 2019 年 2 月 28 日。小生按算借用刊佇 1947 年 4 月 1 日，公報第 700 號 1、2 面 ê 社論，詳細講「光復印書局」（Kong-ho̍k Ìn-su-kio̍h）ê 代誌 hō͘ 諸位知。向望少年輩加瞭解二二八事件進前，社會大眾生活艱苦、教會受大影響 ê 實情。深刻思考、反省事件 ê 本質，檢采是往時（éng-sî）制訂「和平紀念日」ê 本意。
講起「光復印書局」，是高金聲牧師（1873～1961）為著復刊公報兼印道理冊所設 ê 。終戰彼時 73 歲 ê 高牧師，位疏開地玉井轉到台南，隨表明承辦公報 ê 意願。卻是南部大會未復原，南大常置委員會聚集同意「將公報社印冊 ê 家私及厝借高金聲牧師，來發行公報」。結局，高牧師個人獨力料理，另外招印工宋水琴、林百萬、會計兼販賣林錄璁（高德章先生娘）來開始。
「工場荒廢，販賣所親像糞埽堆，四界黑汁汁（o͘-chap-chap），窗仔蓋濟拍歹，連連清掃兩禮拜」，閣開辦 ê 公報社改名「光復印書局」，時間是 1945 年 11 月初 2。對 án-ni 公報通佇 1942 年 3 月發行第 684 號，閣去受日本人壓迫停刊以來，位 1945 年 12 月重新發刊第 685 號。每月尾發刊 ê 報紙，按照市政府 ê 規定，頭先有宣布換名《台灣教會月刊》，尾仔猶原號做《台灣教會公報》。
書局一開始 ê 資本額是一萬箍，來到寫「無講，無人知」這篇文章个時，拍算是 1947 年 3 月初，財產有 16 萬。「看是大趁錢，實在是虛譀（hi-hàm）。前 1 萬實實是 1 萬，今 16 萬，lím-lím 仔千六箍……錢直直無價，阮遮，一箍銀買無一條油炸粿。」Tng 當時，公報 ê 價錢一年 30 箍；比較 1946 年，人買報紙一年 3 箍半，加成貴。但是彼 chām 物件逐項起價，今「一份 ê 報紙，紙錢著 2.25，12 份是 27 箍……工錢無算，thài 有通趁？」
總是，位 1945 年 ê 年頭到 kah 1950 年底，台灣 ê 躉售物價指數（tún-siū bu̍t-kè chí-sò͘）上升 218455.7 倍，平均每年物價上漲率是 676.1%。近來學者講含當初時政府濫糁印銀票有大關係──照現時國語 ê 講法 tō 是「惡性通貨膨脹」。財界不安、經濟秩序破壞，致到生活比戰爭 ê 末期閣較艱苦，對眾人是大試練。M̄ -nā「光復印書局」受累，有人著用衫仔褲換物來食，嶄然引起民怨佇全島逐所在，成做二二八事件發生 ê 重要原因。
「已經活，hō͘ 伊閣死–去，敢無可憐代？」高牧師 ùi 1945 年 12 月發行第 685 號，到 1948 年 1 月發行第 709 號。頭先 8 面，對 1947 年 1 月起，加添（ke-thiⁿ）到 12 面。有影是咬嘴齒根強強 teh 做。佳哉海內外有志相佮相挺、獻金出大氣力，同著磨（tâng tio̍h-bôa）ê 5 名職員獻身奉仕（hōng-sū），甘願領無外面人 ê 一半薪津，書局閣再賣雜冊來添補，chiah 通維持逐月日 ê 所費。閣有濟濟用心神、了時間、勞苦寫稿 ê 朋友，以及無嫌白話字 ê 讀者愛買愛讀，chiah 通無失志繼續宣傳天國 ê 文化佇通台灣。
尾手 1947 年 5 月 8 日南部大會 ê 事業局對書局經營困難 ê 危機有當做急務鬥設辦法，鼓吹讀者贊助書局脫出印報 ê 困苦。1948 年 1 月 6 號正式歸南部大會直營。
