五月雪

(請安裝Taigi Unicode字形,配合Firefox瀏覽器來讀)

作者:Tân Lo̍k-jîn

春天萬物生長,隨个 á 隨个吸收土地 ê 養分,予溫暖 ê 日頭光咧照顧,予家己更加大欉勇健,向望將來對水土保持有幫助,ē-tàng 予世間人,有樹蔭通坐涼歇睏。春天後母面 ê 尾聲,隱藏歹 chhǹg-chhǹg ê 波浪,漸漸穩定落來 ê 天氣,咱向望 ê 雨水紲毋來。是歡喜!歡喜逐工好天,出門做工課、𨑨迌攏是好日子。是煩惱!煩惱風不調雨不順,農作物無法度生長,工場袂當生產,人民生活欠缺。三不五時閣停電,加上疫情佇不知不覺中爆發。本來應該是一个,屬佇母親 ê 溫暖季節,若親像瓊花無一瞑彼一款,連鞭就 lian-lian–去矣。

佇咱台灣,今年 ê 五月算是上特殊,勞動節連續歇睏三工,出門去風景區人 chhah-chhah-chhah。月初是媽祖聖誕,真濟宮廟攏佇這時陣,肩胛著扛神尊,後壁綴著滿山滿谷 ê 信徒出巡 ûn 庄,第二个禮拜日是母親節,大家攏佇餐廳,或者是佇厝內慶祝,大部分是室內活動,佇較早是誠四常 ê 情景,不過佇這个時陣,是誠危險 ê 作為。

油桐花開 滿山雪
南風吹來 𪜶做客
堂上父母 面慈祥
成龍晟鳳 是序細

母親 ê 愛,對囝兒序細 ê 關心佮付出,親像無限閣無求回報,五月母親節,做囝兒序細 ê,攏會有一寡活動來慶祝,向父母表達敬疼佮有孝 ê 心,向望父母 ê 身體健康、無病無痛、心情爽快,來過每一工。佇全國攏沉醉佇快樂平安 ê 氣氛,一个無聲、無影、無形 ê 災難,用兇殘看袂著 ê 方式,無聲無說,侵入咱 ê 國家、社會、家庭佮每一个人 ê 身軀。

時間已經來到五月尾–ah,一年來因為疫情 ê 影響,全世界 ê 經濟受著打擊,人類為著欲發展經濟、科學,破壞地球 ê 生態環境,造成極端 ê 氣候,毋是真冷就是熱甲欲害–去,一年原底有春、夏、秋、冬四季,這時 chhun 夏、冬兩季 niâ。

台灣連續幾個月無落雨,也是以前毋捌有–ê,致到逐所在攏 teh 欠水、限水,閣有真濟人為因素,無張持就跳電。俗語說:「人若無照義理,天就無照甲子。」尤其是這 kái ê「新冠病毒」,ná 像上天咧譴責人類,病毒湠 kah 敢若每一个人攏閃 bē 過。毋過,台灣五月 ê 油桐花,照常開 kah 滿山遍野,彼爿山 ê 五月花,猶原颺颺飛。台灣 ê 母親,白色單純 ê 愛,親像五月雪,tī 災難來 ê 時,認真搶咧看顧台灣 ê 子弟。善良溫和 ê 台灣人,頭殼頂、身軀頂,ná 親像有五月雪 ê 存在。

我有話要說