比賽

(請安裝Taigi Unicode字形,配合Firefox瀏覽器來讀)

作者:郭奕妮(苗栗縣苑裡鎮致民國中一年二班)

苗栗縣苑裡致民國中肉球隊(躲避球)非常有名,我真歡喜會當加入肉球隊,舊年教練講全民運動會肉球賽佇阮苗栗縣頭屋國中舉辦,愛拚第一,所以我拚命練球,絕對 bē 放棄任何練球 ê 機會。

9 月 30 日彼工,阮第一場對新竹縣,第一局阮 kā in 剃光頭,第二局贏 2 分,雖然贏,但彼陣我 ê kha-thâu-u 小可會痛,我無要意。10 月初一,對手是台南,兩隊實力有差,阮真輕鬆 tō 贏。10 月初二對高雄,我對裁判 ê 判決小可有意見,無啥認同,第一局阮贏,但是第二局輸去,決賽賽程是採取三戰二贏制度,好家哉阮第三局最後一分鐘烏龍 se̍h 桌,反敗為勝。

10 月初三彼工,逐家壓力真大,贏 tō 拚第一,輸者爭第三爾,所以比賽前阮真細膩練習,驚會受傷,因為比賽比 hiah 濟工,真濟人帶傷比賽,但是不管按怎疼,阮會認真拚第一。下晝對台北比賽,比賽前大會司儀放送全隊隊員 kap 教練 ê 名,彼時我感覺親像佇世界盃比賽。賽程進行到一半,我對裁判判決不滿,裁判判我紅牌,我無法度繼續比賽,我 ku 佇 hia 哭,一直哭到比賽結束,結果比賽輸去。比賽後,教練對我講:「你有後悔無?以後莫 koh 按呢!」整個比賽結束,阮名次是第四名,我認為這遍比賽,裁判判決無公平,態度 mā 無好,裁判真正愛認真檢討。

路尾教練對我講:「咱無赫爾差,mā 是愛練球,才會有這 ê 成績。」過幾工,教練佇線頂表示全民運比賽莫計較赫爾濟,咱愛變強才會 hō͘ 對方教示。我認同教練這句話,我一定會提升家己 ê 實力,hō͘ 裁判講 bē 出話。我欲佇遮向比賽選手呼籲:「若欲怪裁判亂判,家己愛拍拚,hō͘ 裁判對這場比賽改變判決。」

備註:致民國中台語社指導老師是山腳國小郭燕霖老師。

廣告/手到心至抄寫本-箴言

我有話要說