教大學部基礎漢語這門課

(請安裝Taigi Unicode字形,配合Firefox瀏覽器來讀)

作者:MnL Huī-bîng

佇菲律賓大學部 kap 台灣 ê 大學選課時間無仝。佇台灣是猶袂開學進前就已經先選課完成,毋管是必修抑是選修課,大部分開學了後就真清楚知影這學期愛去上 ê 課矣。毋過,佇遮煞是已經開學一段時間矣,才開放系統問學生欲選修啥物課,等選修一段落了後,確定有夠額 ê 人數才會開這門課。也就是因為這款無仝 ê 選課背景,一直到下學期開始 ê 三禮拜了後,我才予人通知愛上「基礎漢語」(Basic Chinese 1)這門課。

「基礎漢語」是予完全零基礎 ê 大學生來上課,也就是連上基本 ê「早安」、「再見」攏無知影欲按怎講 ê 學生來上–ê,佇我這班內底 ê 學生真大部分攏是菲律賓人,干焦有 2 位是華人學生。

另外,學校規定 ê 教材是中國出版 ê《新絲路基礎商務漢語》,教漢字 ê 時陣會使自由選擇欲教繁體字抑是簡體字,毋過若是教拼音就規定愛教漢語拼音,所以對台灣來 ê 先生一開始會有一點仔袂慣習。而且上課 ê 時陣會使講是全英語 ê 教學語言,閣較是一款挑戰,愛用家己有限 ê 英語詞彙來教漢語,一開始 ê 時陣實在有影緊張。毋過,這對家己來講也是一个英文進步真緊 ê 機會,毋管驚抑是毋驚,時間到矣就是愛徛起立台頂教冊,一擺二擺,慢慢仔就袂遐呢緊張矣。

這門課對上基礎 ê 漢語拼音開始教,聲母、韻母、聲調一項一項教,一字一字 tòe leh 唸,到這陣一寡學生已經有法度將拼音正確寫出來矣,甚至閣會使判斷這 ê 詞是第規聲!雖然有一寡較特別 ê 音猶是無法度真正確 ê 讀出來,譬論講:漢語拼音 ê「yü」也就是注音 ê「ㄩ」,毋管是英語抑是 Tagalog 內底攏無這 ê 音,所以對 in 來講實在非常食力。但是佇咧上課過程中,也有法度感受著遮 ê 菲律賓學生上課 ê 專心 kap 認真。

有人講做先生趁無錢閣食力,是一 ê 真辛苦 ê 頭路。毋過對我來講,做一 ê 先生 ê 成就感煞是這呢強烈!看著學生對完全袂曉到會使 kap 其他 ê 人自然對話,這 ê 過程總是需要付出真濟心血來備課,想講愛按怎教 in 才聽有,一點一滴累積起來才會當看著學生有明顯 ê 進步,這款一步一跤印 ê 成就感,予我特別感動。所以逐改若是下課了後欲離開教室 ê 時,我攏會想,佇這門課內底我敢有認真教予好?學生敢真正有法度吸收?若是感覺某一部分效果無好,我應該愛按怎調整?然後才閣佇後一節課 ê 時來改進。

雖罔講我是咧教冊,看起來是付出 ê 部分較濟,毋過佇教冊 ê 過程中我所學著 ê,才是我想欲得著 ê 精彩人生 kap 人生智慧!

廣告/聖經充滿我-經文填充本

我有話要說