(請安裝Taigi Unicode字形，配合Firefox瀏覽器來讀)
作者：凍露水
我是濁水溪，你 kám 捌聽過我 ê 聲音
年久月深 ê 擋皮 á kā 時間 liô cht chōa
深深 ê 空 chhùi
Soah soah 去，留予秋風去空思夢想
咒讖 kah 抗訴 lóng tòe 四季輪迴 hō͘ 人放袂見
Kan-taⁿ kō͘ 強欲臭 ta- ê 目屎 tiām-tiām hoah 聲
水流柴 tī 溪底疊做厚厚 ê siáu 貪
無定著 che 是 siōng 好 ê 底蒂
水崩山流 lo̍h ê 石頭一粒一粒排列
成做創造經濟 siōng 有力頭 ê 賊仔古
我 soah 聽做是農村 siōng 無力 ê 狀詞
Kàu taⁿ 三百冬，強 beh ta-pó͘ ê 胸坎
是 siáng hiau-hēng koh 討食 bē soah
Hit 粒月娘已經無法度浮漂
面頭 á 紅 hòaⁿ á 紅 hòaⁿ tám-tám
向望 chhōe 有人 thang 對指
沙埔 ê 蘆竹早 tio̍h thèng-hāu kah 吐大喟
是 siáng 為 tio̍h 漲懸價 ê 芭藥票準當
Lán ê 筋肉。薄情放 sat hia 黃 gìm-gìm ê 稻 á
Siâng 時濁水溪反濁
南門媽祖宮香火發爐賴和仙險險 mā 燒–死
咱 koh leh 致意佗一間 ê 肉圓 khah 好食
西門蘭醫生 koh 再 gia̍h 刀 liô 血筋向望洗清 chit 片主人
Ê 穢涗。Hit 隻鹿 hō͘ 一陣一陣 tài 冤屈 ê 風飛沙
Hò͘–出-來。Hit 雙怨恨無神 ê 目仁將世間看透
Babuza 平埔族 ê 骨骸用失傳 ê 言語 chǹg 入夢
可惜 ê 是無我掣流引 chhōa……in 猶原一暝足眠
佇夢–lih，浸 tī 濁水溪 ê 記持愈來愈濁
你出手 hô soah mā poa̍h lo̍h
Bâ-bū-kng 睏過頭，精神 ê 時已經是 21 世紀
所致，起造烽火塔才袂新經濟 ê 方向 phah 無-去
創世紀 ùi hit 日開始倒踏……土地空喙愈裂愈大孔
天流 ê 目屎是烏–ê
In koh 騙講濁水 tiāⁿ-tio̍h 會有坐清 ê 一工
我是濁水溪，脈律ê變化已經離經
Chit-má kan-taⁿ 注心奉待 GDP ê 成長
逐工遠遠看見農田 ê ta 裂 ê pit-sûn bùn 血
Tiām-tiām 吞食空氣 ê eng-ia
Hiông-hiông 一隻魚跳–出-來
滴 2 滴目屎……下願……
