里龍山石沿路趒

(請安裝Taigi Unicode字形,配合Firefox瀏覽器來讀)

作者:陳金順

熟似二十冬 ê 阿榮,臨時臨曜相招 peh 里龍山,實在無理由共拒絕。

進前,伊無相棄嫌,共咱加入「咱攏是楓港囡仔」群組。這馬,挑戰楓港座標里龍山,成做咱袂當閃避 ê 責任感。

袂行進前,伊先注預防射,講這 chōa 山路,往回大概愛 6、7 點鐘。今,人 lóng 來矣,管待伊咧頭殼一空。

9 點車插好勢。做淡薄仔暖身運動,9 點 10 分跤兜起行,量約 0.6 公里才到登山口。

阿榮講:兩冬前風颱對楓港鑽入來。了後,伊攏毋捌 peh 過里龍山。這陣,山頂的地形、地貌大概差連天。

有影。我雖罔無來遮行踏過,毋過,沿路踏過 ê 山石予我強烈感受,頂回彼遍風颱共 in 挵 kah 弄家散宅。
山石弄家散宅散掖掖 ê 結局,就是咱遮 ê 登山客 ê 苦刑。朋友啊!咱雖罔逐日咧走標,不而過平埔佮山崎差大碼。尚且,這搭山路予風颱掃 kah 倒籬顛斗,莫怪行這 chōa 來回倚十公里 ê 山路,無輸咧弄險。

檢采咱罕咧 peh 山大驚小怪!事實上,連在地人原本咧牽水管,聽好騎 O͘-tó͘-bái 起來 ê 路都破鹽鹽矣,賰 ê 路況,用跤頭趺想嘛知。

天地誠趣味。佇這款春日尾 ê 天時,對離天七鋪路 ê 台南走來楓港 peh 山,毋是逐口灶有 ê。較按怎汗流沓滴,攏是一款美麗 ê 堅持。

山石有大有細,佇山谷裡秋凊。咱人家己欲上山練跤力,參 in 咧 chhia-poa̍h-péng。跤力敢練有成?恐驚無遐爾要緊?!佇練跤力、汗流沓滴 ê 坎站,會曉通欣賞自然景緻佮人情溫暖上蓋一等。

拜六時仔,千萬毋通掠準里龍山無幾隻貓。事實上,拄起步無偌遠,就出現三隻烏色土狗仔,佇遐咧浪溜嗹。遮無半个過路客,隨个仔隨个攏是食好膽藥仔 ê 登山客。無論像咱這款生手,抑是 peh 懸 peh 低 peh 袂 siān ê 高手,眾人踮這條狹勢 ê 山路相逢,定著有某種深緣。

1062 公尺的里龍山,是恆春半島唯一懸過 1000 公尺 ê 中級山。沿路看著濟濟驚險 ê 山壁佮大石,我佮阿榮量約開 3 點捅鐘 peh 到三角點,按呢毋知有 gió-toh 無?

遮爾飄撇 ê 所在,視野不止仔曠闊。天氣好 ê 時,會當共規个恆春半島看在眼內。可惜,阿榮講今仔日無大景,意思就是到位 ê 時,天色無夠清朗,有雲霧遮閘咱 ê 目睭前。

Tháu 放肩胛頭 ê 負擔。停睏一站,食麭(pháng)啉茶,小可秋凊。下晡一點,準時回程。

落崎參 peh 崎相 siāng 無輕可。跤腿無需要出大力,毋過,愛會曉踏擋仔。若傷鐵齒,一个無細膩會綴山石抛輾斗。

踮遮,特別感恩佇坎坷山路裡牽索仔 ê 兄姊。牽一條紲一條白色 ê 索仔,敢若牽一條真美 ê 平安路。斯當時,若毋是恁承受危險、展現善心,阮 ê 旅程定著無可能遮爾仔清閒。

清閒是心境,珍惜朋友情。

里龍山石沿路趒。趒 ê 敢是山石?是咱 phu̍t-phu̍t 趒 ê 內心。

向望來年山路鋪好了後,咱濟濟楓港囡仔,相招起來里龍山秋凊。

廣告/美好腳蹤368認購

我有話要說