起厝按半料 Khí-chhù àn pòaⁿ liāu

(請安裝Taigi Unicode字形,配合Firefox瀏覽器來讀)

作者:李南衡

頂日看「新眼光電視台」製作、張德鱗牧師主講 ê《我有一個台灣夢》系列,講到吳威廉(William Gauld)牧師按怎 16 歲立志 beh 去東方作宣教師。按怎 kah 牧師娘結婚無偌久 tio̍h 離開加拿大來台灣,1892 年 10 月 22 來到淡水。隔轉年,馬偕牧師全家轉去加拿大休假,1894 年甲午戰爭、第二年台灣割 hō͘ 日本,佇台灣動亂中,人心浮動,伊按怎照顧馬偕牧師留落來 ê 60 間教會、驚惶中 ê 2600 外名信徒,充分表現出伊 ê 勇氣、才調 kah 領導力。而後,閣講起伊按怎創辦學校、神學院,按怎起教堂、建立台北中會、建立教會體制,建立雙連宣教區等等,對台灣北部長老教會 ê 貢獻誠大。但是我卻特別注意張牧師講起 ê 磚仔。

日本明治維新以後,引進西方建築技術,同時引進以蒸汽作動力 ê「乾式機械製磚」技術,生產出來 ê 紅磚「煉瓦」(renga)規格標準化,無論產量、品質攏大大贏過傳統「濕式製磚」技術。日本本土有真濟出名 ê 紅磚建築,上出名 ê 是東京火車頭。日本殖民統治台灣以後,mā kā 西式紅磚引進入來台灣,而且 tī 20 世紀頭 20 年興起一陣紅磚建築熱潮。

日本建築師森山松之助設計起造台北州廳(今監察院,1915)、台南州廳(今台灣文學館,1916)、台灣總督府(今總統府,1919)、專賣局(今公賣局,1922),日本建築師近藤十郎設計起造台北西門紅樓(1908)、台北第一中學(今建國中學,1909)、台北病院(今台大病院舊館,1816)。吳威廉牧師有赴 tio̍h chit-ê 熱潮,伊設計起造 ê 姑娘館(1906)、牧師館(1907)、婦學館(1910)、台北馬偕病院 kah 宿舍(1912)、北投教會(1912)、大稻埕教會(1915)、台北神學校(今台泥大樓址、1918),攏總是紅磚建築。

張牧師講,吳威廉牧師是一位傑出 ê 建築師,聽講伊計算磚仔足清楚,到起厝尾仔,所算出來 ê 磚仔精差無偌濟。確實 hō͘ 我驚一 tiô。因為 kah 咱台灣俗語話講 ê「起厝按半料(khí-chhù àn pòaⁿ liāu)」那會差 hiah 濟?

「起厝按半料」ê 意思是講,起一間新厝預估材料攏無真正確、掠一個大概仔 ê 數字,等到厝開始起了後,才發現 chiah mā 欠、hia mā 欠,愈起欠愈濟,到厝起好 ê 時才知影當初干單按一半 ê 料niā-niā。

2017 年 6 月 12 《信傳媒》報導,台灣 ê 公共工程有九成追加預算,m̄ 是烏白講。2013 年 10 月 23《財訊》雜誌報導,台北捷運信義線完工延期兩擺,2006 年到taⁿ 預算追加五遍,經過 8 年等待,短短 6.4 公里,開納稅人將近 400 億;北捷工程局精算,平均每公里造價 42 億(抑是62 億?)。照按呢看起來,台灣 ê 公共建設「起厝按半料」那像猶 bē 煞,此後無人敢講 chit 句俗語話。

李南衡《那teh褪色的台灣俗語話》(1-2冊 )已經出版,歡迎來交關,做伙進步

廣告/手到心至抄寫本-箴言

我有話要說