(請安裝Taigi Unicode字形，配合Firefox瀏覽器來讀)
作者：李南衡
70 年前我作囝仔 ê 1940 年代，有一遍聽隔壁阿媽 teh 罵伊 ê 後生阿明叔：「連遷一個戶口都辦 bē 好勢，你 chit-ê 無效 ê 神通散（bô-hāu ê sîn-thong-sán）！」神通散到底是啥物？神通散是按怎會無效？我感覺真奇怪，阿明叔是按怎會變作 chit-ê 無效 ê 神通散咧？轉去問阮老父，伊解說講，神通散是一種藥仔，可能有真濟人食了無啥效果，久來，「無效 ê 神通散」煞 hông the̍h 來作罵一個人做代誌真 hān 慢、無效率 ê 用語。
咱攏知影，有病去 hō͘ 漢醫（m̄ 知 tang 時仔改叫作「中醫」）看了，伊會開藥方 hō͘ 咱，才去漢藥店拆藥仔轉去厝裡用幾碗水落去煎（choaⁿ），煎頭一遍 ê 叫作「藥頭」、第二遍 ê 叫作「藥渣」。有 ê 漢醫會替患者煎藥仔，有 ê 漢醫為 tio̍h hō͘ 患者方便，做「成藥」賣 hō͘ 患者。成藥有幾種形式：藥丸（有大細粒 ê 分別）、藥粉叫作「散」（有食 ê kah 外用 ê）、膏（mā 是有內服 kah 外用 ê）、丹大部分用佇外敷瘡傷腫痛、mā 有作成歸塊（像八卦丹）抑是細細粒（像仁丹）。
神通散記載佇明朝龔廷賢所著 ê《壽世保元》（萬曆 43 年、1615年）內底，主要治小兒小便 bē 通、腹肚脹痛，chit 帖藥食了會放尿若水泉。而後用來治大小便 bē 通 ê 症頭。300 外年前傳落來 ê chit 帖藥可能對台灣人無啥有效 ê 款，所以才會留落來「無效 ê 神通散」chit 句台灣俗語話。
1956 年美國 Paramount 電影公司邀請名導演 Cecil DeMille 根據舊約聖經 ê 出埃及記，先知摩西 chhōa 以色列人出埃及，而且接受上帝所頒布「十誡」 ê 故事拍作電影。有人問導演是按怎想 beh 拍《十誡》chit 部電影？導演應講：「已經廣告幾千年 ah，無拍作電影真無彩。」果然厲害，拍片費用美金 1300 萬，全世界賣 kah piáng-piáng 叫，干單美國 tio̍h 賣出美金 6500 外萬。
「閹雞趁鳳飛」，飛了會真歹看。
想講「神通散」已經廣告 300 外年 ah，無 kā 作「成藥」來賣真無彩。1970 年台灣有一間製藥廠生產販賣「陳家神通散 」，講是「居家旅行‧必備良藥」專治胃炎、消化不良、胃弱、慢性胃病、胃酸過多、胃痛。Chit 味「陳家神通散 」ê 頭家，號 chit-ê 藥名 ê 時，可能干單想講「神通散」真出名，可能無想講「無效 ê 神通散」佇台灣一直是負面 ê 意思，出名有影真出名，m̄-koh 是出無好 ê 名，甚至已經出名 kah hō͘ 人 the̍h 來作罵人 ê 用語。Chit-ê 藥名 beh 那會時行咧？果然 35 年後「陳家神通散 」tio̍h hō͘ 主管當局註銷掉。
真久無聽人講 chit 句「無效 ê 神通散」，此後 mā 有可能無人會曉講。
