Malunggay 辣木葉

(請安裝Taigi Unicode字形,配合Firefox瀏覽器來讀)

作者:Kùi-lân

菜市仔 ê 菜、魚、肉滿滿是,se̍h 菲律賓當地菜市仔 ê 時陣,除了原本就捌 ê 菜,譬論講高麗菜、白菜、花菜、茄仔、苦瓜等等,koh 有真濟種毋捌看過 ê 菜。親像是「Malunggay」,當地人 ê 發音是/Mã11 lɔŋ11 gai13/或者是/Mã11 lɔŋ55 gai11/,菲律賓 ê 塔加祿語(Tagalog)是無聲調 ê 語言,以上這兩種讀法攏會使,甚至 mā 可能有其他無仝款聲調 ê 讀法,但是意思攏相仝。

「Malunggay」ê 華語是「辣木」,這主要是食伊 ê 葉仔。葉仔摸起來真幼,形體圓圓,足細葉 ê,誠古錐,kap 咱新台票銀角仔 1 箍 ê 大細差不多。價數真俗,一把 5 箍 peso。Malunggay 是營養豐富 ê 植物,真濟菲律賓人若是破病、手術後抑是生產了後,攏會食 Malunggay 做 ê 料理來調養身體。

伊有豐富 ê 鈣質、鐵質、蛋白質……,予人叫做「植物中 ê 鑽石」。料理 ê 方式真多元,會使用來炒卵、煮湯、煮麵。我捌食過學校餐廳賣 ê Malunggay 料理,伊煮 ê 方式是佇綠豆肉燥內底 cham Malunggay,是配料 ê 角色,食起來 koh 袂䆀,袂扴(ke̍h)味。有人建議講煮魚仔湯 ê 時 mā 會當囥 Malunggay,毋 koh 有一个 mê-kak,著是愛佇欲起鼎進前才 cham 落去就好,因為伊 ê 葉仔真幼,較無耐煮,煮傷久會爛去,顛倒歹食。

我因為好玄,去 se̍h 菜市仔 ê 時有買一把轉來煮,我用簡單 ê 炒卵來料理。共煎予赤赤、芳芳,尤其是摻一寡仔胡椒粉落去,不止仔著味!Malunggay ê 華語雖然是「辣木」,毋 koh 食起來一點仔都袂薟,炒卵 mā 誠幼味。每一个所在攏有合伊種 ê 植物,食著時、食在地 ê 菜蔬就是上天然、上好食 ê 料理。

廣告/手到心至抄寫本-箴言

我有話要說