(請安裝Taigi Unicode字形，配合Firefox瀏覽器來讀)
作者：陳柏壽
阮老爸對日本讀冊轉來，揣無頭路。伊 ê 一生 thang 講是佇政治 ê 衝擊 kah 家己內心 ê 抵抗中經過。因為一直毋願加入國民黨，所以伊做國民學校教員 45 冬，互雲林縣 ê「督學」每年給伊調遷到深山林內 ê 學校：將伊看做眼中釘。每年伊 chhōa 阮這六 ê 囝，對溪邊厝予人調到古坑、崁頭厝、大湖底、樟湖、草嶺、棋盤厝、麻園仔，最後佇石牌仔國校退休。我國民學校六年讀五間學校。逐年 ê 同學攏生份面，但是 hiah-ê 童年經過 ê 山野，是留佇我生命 ê 一部分。老爸 ê 學生有人轉來做伊 ê 學校校長，有人做台大教授，但是伊猶是做最低級 ê 教員，只教生物及化學。Chit-má 我發現伊「抵抗」ê 生涯，煞傳互我。「抵抗」變做我生命基因 ê 一部分，是我人生 ê 動力。
畢業以後，開始去長榮大學教冊，我就用台語教學，要求學生用台語文寫作業，用母語討論、發表心得。起初雖然反抗真大，但是經過一、二學期了後，學生一個一個發現因使用母語會 chhōa in 轉來，揣著 in 家己心靈及靈魂 ê 母胎。佇離開 ê 時 ê 紀念冊內面，in 寫真濟真予我感動 ê 留言，互我看著 in 一個一個良心發現，看著 in 青年心靈生長 ê 過程。Chiah-ê 攏是咱 thang 安慰 ê 台灣種子。
Kah 阮阿爸仝款，我對紐約哥大畢業，開始 mā 是揣無頭路。Chhōa 牧師娘 kah 四個囝，佇紐約 ê 街路茫茫渺渺，毋知欲行去叼位。但是天公疼戇人，上帝安排我去做台灣人長老教會 ê 牧師。封立做牧師以後到今 mā 已經 30 幾冬啦。
開始會曉用電腦寫台語文是對鄭良光兄 ê 開竅。彼時開始到今無論週報、禮拜、講道以及所有行事，攏用台語文。有好處 mā 有歹處。好處是我活佇良心內面，離開上帝較近；歹處是會友較少，有人看著台語就驚。我彼本教會羅馬字聖經，永遠是我最信賴 ê 寶貝。
佇衛鄉教會我 kah 黃聲宏醫師設立聰美記念基金會（www.chhongbi.org），從事台語活動：包括 1993 年 11 月到 2006 年 1 月 12 年中間對良光兄轉來接辦 ê《台文通訊》，總共 117 期（25～142期）；500 幾期 ê《台灣青年》，以及各種台語生活座談會等等。遮 ê 事工到今仔日猶佇賴柏年兄 kah 黃宮元兄手下，每日繼續拍拚。
對現此時台灣來講，台語文運動是屬佇反抗運動 ê 一部分──反抗既成 ê 政治 kah 文化 ê 霸權。執政者掌權家庭、社會、教育 ê 機器，產生一代一代袂記母語 ê 無根 ê 台灣人。
母語是咱一生生活 ê 最重要工具，也是咱生命 ê 內涵。我一生用母語交朋友、寫作、教冊、傳道理。台語文就是道理。我嘛相信有一日咱轉去上帝遐，我一定會用咱 ê 母語台灣話 kah 上帝講話，因為我知影咱 ê 上帝聽台灣話，聽 khah 有。願上帝賜福台灣母國、台灣文化、台灣母語早日出頭天。
