(請安裝Taigi Unicode字形，配合Firefox瀏覽器來讀)
作者：Koa Khé-an
Chhòng-chō múi chi̍t ê Hiong-káng-lâng koh thiàⁿ Hiong-káng ê Sam-it Siōng-tè, goán lâi kàu lí ê bīn-chêng khún-kiû lí ê lîn-bín kap kong-gī kàng-lîm tī Hiong-káng.
Koan-ài só͘-ū ê sèⁿ-miā ê Siōng-tè, Lí thó-ià chiáng-koân-chiá ēng khúi-chà khi-ap pa̍t-lâng ê khoân-lī! Só͘-í tng hiān-chú-sî ‘Tô-hoān Tiâu-lē’ siong-hāi siā-hōe chèng-lâng ê lī-ek ê sî-chūn, goán chhim-sìn Li bó ì-ài chit-ê Tiâu-lē hō͘͘ thong-kè. Goán chò Lí ê chú-bîn tī chia tùi Lí ho͘-kiû, goān Lí hō͘͘ Siu-tēng Chháu-àn thiat-hôe, hō͘͘ Hiong-káng-lâng chin-chiàⁿ ū bián koh kiaⁿ-hiâⁿ ê chū-iû.
Kong-pêⁿ kong-chèng ê Siōng-tè, múi chit-ê lâng lóng sī Lí só͘ chhòng-chō ê, lóng ū Lí ê hêng-siōng. Tng ū lâng siū siong-hāi iah-sī chhim-hoān ê sī, Lí ê hêng-siōng chiū siū-tio̍h sún-hāi. Tùi 6 ge̍h kàu taⁿ chi̍t hē-lia̍t ê khòng-cheng hêng-tōng tang-tiong, Hiong-káng kéng-chhat chē-chē sú-iōng kòe-hūn ê pok-le̍k kap bú-le̍k kong-kek khòng-cheng-chiá, in ēng kéng-kùn, chhiū-ni chhèng-chí, hái-mî chhèng-chí, pò͘-tē chhèng-chí kek-thè khòng-cheng chiá, koh ēng chhui-lūi-gá-suh kong-kek khan-thoa tio̍h hù-kīn chhù-the̍h, che lóng tùi Hiong-káng-lâng ê sin-khu kap sim-lêng chō-sêng giâm-tiōng ê siong-hāi, mā hō͘͘ Lí ê hêng-siōng siū giâm-tiōng sún-hāi, goán chhim-sìn Lí iā kap Hiong-káng-lâng saⁿ-kap thî-khàu. Goán chò Ki-tok-tô͘͘ ê lâng bêng-pe̍k khòng-cheng-chiá kó-jiân sī siū-hāi ê chi̍t-hong, iáu-koh kéng-chhat mā sī hō͘͘ chit-hō siâ-ok chèng-koân kap chè-tō͘ só͘ siong-hāi ê lâng, só͘-í goán khún-kiû Lí hō͘͘ Hiong-káng chèng-hú bêng-pe̍k chit-ê tō-lí. Kiû Lí hō͘͘ To̍k-li̍p Úi-goân-hōe ē-sái sūn-lī sêng-li̍p. Goān Lí ho͘ só͘-ū siū siong-hāi ê lâng tit-tio̍h pêng-hoán, goān Lí hō͘͘ só͘-ū khi-ap jio̍k-sè ê lâng tit-tio̍h pò-èng, goān Lí ê kong-pêⁿ tī tiong-kan tit-tio̍h chiong-hián.
Phó͘-sè ê Siōng-tè, Lí chhòng-chō jîn-lūi tùi chhut-sì tio̍h pêng-téng, múi chit-ê lâng lóng sī Lí só͘ ài ê kiáⁿ-jî, bô-lūn chéng-cho̍k, sèng-pia̍t, siā-hōe tē-ūi, múi chit-ê siū Lí chhòng-chō ê lâng lóng èng-kai ū pêng-téng ê koân-lī kap chū-iû, tong-tiong pau-koat pêng-téng ê tâu-phiò kap chham-soán ê koân-lī. Tān-sī tī Hiong-káng hiān-sî ê Li̍p-hoat-hōe kap hêng-chèng tióng-koaⁿ soán-kí chè-tō͘ hō͘͘ Hiong-káng chèng-hú m̄-bián tùi jîn-bîn hū-chek, sīm-chì biáu-sī kúi pah-bān lâng ê ì-kiàn. Siōng-chú, goān Lí siúⁿ-sù Hiong-káng-lâng ū chin-chiàⁿ ê bîn-chú soán-kí chè-tō͘, hō͘͘ múi chit-ê lâng ē-tàng ūi ka-kī chhut-siaⁿ, tùi chèng-hú chèng-chhek chò-chhut koh-khah lī-ek bîn-chiòng ê chè-hêng, pó-chiong “Lâng-lâng chhut-sì tō pêng-téng”. Siōng-tè, iā kiû Lí thong-kòe chin-chiàⁿ ê bîn-chú soán-kí chè-tō͘ hō͘͘ Ki-tok-tô hoat-hui tē-bīn koán-ke ê kak-sek, kiám-cha tē-bīn chèng-koân kám ū hó-hó-á tùi-thāi jîn-bîn, koh chhiok-sú chèng-hú péng-chhî kong-gī, siúⁿ siān hoa̍t ok.Am-en!
