(請安裝Taigi Unicode字形，配合Firefox瀏覽器來讀)
作者：陳柏壽
性命回復平靜
阮阿母 80 外猶會記得細漢 ê 時佇教會主日學學著 ê 彼條囡仔歌：
「來信耶穌，來信耶穌，來信耶穌，現在！現在來信耶穌，來信耶穌，現在！」
真簡單 ê 歌，但是佇伊 80 幾歲老人 ê 心懷中，是一條永遠新新 ê 故事，永遠 ê 懷念彼條幼年時代主日學 ê 歌，永遠袂袂記得，永遠記佇伊心肝，這條歌陪伊行到人生 ê 落尾。
這個老母今佇上帝遐，我想伊 koh 繼續咧唱這條主日學 ê 歌互上帝聽。
我想咱 ê 人生無論按怎輝煌燦爛，成就真大 ê 事業，但是及阮這位平凡 ê 老母比起來，in 攏及伊袂比。人講圓仔花毋知 bái，大紅花 bái 毋知。但是阮彼位平凡 ê 老母，一世人親像一蕊路邊細細蕊 ê 圓仔花，也親像厝角頭 ê hibiscus（芙蓉），雖然無人關照，無人看有到目，但是 in 家己開開開，無人請家己來，伊一世人恬恬照顧這個家，無出聲，佇我心中伊就是世間上偉大 ê 人。
蔣中山醫師是我真敬愛 ê 先輩，我一世人差不多攏是 tòe 佇伊尻川後咧行：伊對福音 ê 堅持，對台語 ê 疼惜，特別是對台灣故鄉 ê 獻心及貢獻，攏是我 ê 心目中 ê 典型。伊差不多每禮拜攏佇橫濱台灣教會講道。伊嘛勉勵我著繼續這個台語文 ê 工程。但是二個月前 in 先生娘過身去以後，伊煞變做一個真安靜、無愛講話 ê 人。伊 ê 大囝 Meishiu san 共我講，欲及伊講話著愛親像囡仔，著講真簡單 ê 話，伊才聽有。
蔣醫師 ê 人生已經進入一個新 ê 坎站，就是變做及古早伊做囡仔仝款，變做真單純 ê 人。咱一世人大概可以用 7 年做坎站：0～7 歲是天使期，7～14 歲半天使期；14～21 歲青年期；21～56 歲壯年期；56～63 歲半老年期；63～77 歲老年但是煞漸漸退入青少年、幼年期，koh 一擺進入天使 ê 境界。進入天使期就毋免 koh 再煩惱智識、學問、競爭、趁錢、鬥爭、怨嘆、不平種種 ê 代誌。性命會 koh 回復平靜。
人生有坎站
我 bat 去以色列地中海海邊 ê Haifa（古早 ê 約帕），聽講是先知約拿去互大魚吞去 ê 所在。海邊歸片攏是咱台灣 ê 大紅花、吊燈仔花，風吹來 ê 時 hàiⁿ–來 hàiⁿ–去，風景實在真 súi。無想到約拿愛坐船去西邊西班牙（古早 ê 他施），但是上帝不准，派一隻海翁給吞落去肚腹內。約拿去互海翁吞去 ê 時表示伊 ê 人生 ê 進路有站節，上帝叫伊行無仝路。
三日三暝約拿佇魚仔肚腹內祈禱上帝，上帝憐憫伊就命令大魚給伊吐出來陸地。第二擺，上帝叫伊去往東 ê 尼尼微（大概是敘利亞 ê 大馬色周圍）傳福音，伊心中 ê 對敵竟然全部悔改。約拿坐佇樹仔腳，拜託上帝互伊死，但是上帝叫伊毋通死，因為世間真濟人需要伊做工，大馬色就有 12 萬散赤人，毋捌字，連正手倒手 to̍h 分袂清 ê 人。按呢約拿接受新 ê 使命，就歡喜 koh 活落來啦。
我真喜愛這個聖經故事。咱一生就是想愛逃閃上帝 ê 命令，一直欲走路，一直愛脫離上帝 ê 管轄，欲行家己 ê 路。但是一擺 koh 一擺，咱攏 koh 互上帝掠倒轉來。約拿 ê 人生就是親像一粒球，上帝 sa̍k 伊往西，就往西，往東，就往東，結果來看，伊無選擇 ê 自由。咱 ê 人生就是按呢經過一個坎站去到另外新 ê 坎站，由在上帝安排。
我一直感覺基督教影響咱 ê 生活最大 ê 所在，就是規定「安歇日」。一禮拜 ê 安歇日，一年 ê 安歇月，作物 ê 安歇年，千年 ê 安歇禧年，攏是要求咱知影人生有坎站，咱生活著有站節，毋是日日過了接別日，年年過了接別年，親像河水長流，無時停。
守安歇日、守安歇年變做咱人生必要 ê 坎站。不但每禮拜著愛有 Stop，每年愛 Stop，年紀若到，咱著 Stop，歇睏變做咱做人 ê「過程」及「定律」。除了永遠不變 ê 輪迴宗教以外，世間其他大部分 ê 宗教攏有尊重安歇 ê 規矩。安歇意思是講咱 ê 人生，雖然有永遠做嘛做袂了 ê 代誌，但是上帝愛咱會曉 Stop。時間若到，咱著看破世間，超越世間，將世間一切攏放後面，向頭前行，超越世間 ê 紛擾。佇安歇日 ê 中間，咱 to̍h 會小可看著上帝 ê 面，咱 teh 安歇 ê 時陣 to̍h 會小可看著永生 ê 存在。
勇敢 pôaⁿ 過向前行
最近有幾擺去為著臨終及過身 ê 人主持告別禮拜，時時會迫我去看著另外彼邊，同時嘛強迫我注目咱這邊。時時佇這種場合我煞毋知欲按怎講道理，因為我本身嘛真毋知「死」ê 道理。我只有用平常 ê 心，用平常 ê 語言，坐佇喪家 ê 邊仔，及 in 做伙流目屎。講真濟技術性宗教 ê 語言，豈真正有法度添滿 in ê 空虛？我只有講：咱著手牽手，做伙來 pôaⁿ 過這個坎站，這是咱人人生 ê 站節，咱著勇敢共伊 pôaⁿ 過，向前行，去另外彼邊。
主耶穌有勸人：「出在死人去 tâi in ê 死人，活人只有繼續向前行。」（馬太福音 8 章 22 節）「向前行」，毋是停佇人生 ê 某一個坎站停步，輪迴不前。主耶穌 ê 意思是愛咱 pôaⁿ 過人生逐段 ê 站節，跳過一 gám koh 一 gám ê 階段，行向 koh 較 súi ê 將來。人生 ê 頭前實在真 súi，有真充實 ê 境界，有真濟新 ê 性命 ê 意義，咱著去充實彼個世界，咱著繼續行落去。
