(請安裝Taigi Unicode字形，配合Firefox瀏覽器來讀)
作者：柯三益
五塊餅兩尾魚是咱基督徒真熟識 ê 故事，主耶穌行神蹟互五千人吃飽閣有 chhun，通常對這件事咱 ê 印象就是一个囝仔、五塊大麥餅、二尾魚以及十二个 kheng，往往咱攏無注意著這件事關鍵 ê 人物──安得烈。聖經記載，大約五千人 tī 山頂聽耶穌講道，當主耶穌問學生腓力欲怎樣買餅來互眾人 chia̍h，腓力看著人真 chōe，一時想無辦法。我想當時眾學生亦攏 teh 想欲怎樣來解決主耶穌所提 ê 問題，可能有學生開始準備錢，可能有學生 teh 想欲去 toh-ūi 買 chia̍h-mi̍h，也可能有學生開始 tī 眾人中間 chāu-chhē chia̍h-mi̍h。當時耶穌 ê 學生安得烈，伊發現一个囝仔手中有五塊大麥餅、兩尾魚，而且願意將家己準備 ê chia̍h-mi̍h 分享互眾人，所以安得烈將囝仔介紹互耶穌。
約翰福音 1 章 35～40 節有記載安得烈是怎樣成做主耶穌 ê 學生，安得烈本來是討海 ê 漁夫，但是為了欲追求真理，跟 tè 行洗禮 ê 約翰，成做行洗禮約翰 ê 學生。有一日，當行洗禮約翰看見耶穌經過，就真歡喜向兩个學生介紹講︰「看啊！這是上帝 ê 羊羔。」這兩个學生就去跟 tè 耶穌，安得烈就是這兩个學生其中一个。安得烈是熱心傳福音 ê 人，所以當伊離開耶穌了後，就趕緊去將這个好消息報互伊 ê 大哥彼得，向彼得講︰「阮已經拄著彌賽亞。」然後就 ín-chhōa 彼得去見耶穌。
安得烈只是單純傳福音，將親人帶到主 ê 面前，伊應該料想 bōe 到，日後彼得會成做主所重用 ê 學生，成做耶穌十二个使徒中上傑出 ê 領袖，所以安得烈這時 sêng-chiū 了一件偉大 ê 工作。
約翰福音 12 章 20～25 節也記載，當時主耶穌騎驢入耶路撒冷，彼時有幾 nā ê 希利尼人來耶路撒冷過 pôaⁿ-kè-choeh，聽見耶穌 ê 事蹟，就想欲見耶穌。In 找著腓力，總是腓力是真謹慎 ê 人，面對外邦人 ê 要求沒法度做決定，所以去 chhē 安得烈參詳，當安得烈聽見，馬上就 kap 腓力去將 hiah ê 希利尼人介紹互耶穌。後來耶穌講︰「人子得榮耀 ê 時到了。」閣講︰「我若受 kú-khí，就欲 ín-chhōa 眾人就近我。」初代教會為著福音是毋是欲傳互外邦人，有真大 ê 爭論，總是此時 ê 安得烈已經將外邦人 chhōa 到耶穌 ê 面前。安得烈雖然無親像彼得會曉講道，或是其他學生會曉用文字來傳道，但是卻是會曉用實際 ê 行動「將人 chhōa 到主面前。」
主耶穌十二个學生 bat 彼此爭論什麼人地位 khah 大，但是當耶穌問學生 teh 爭論啥物，攏無人敢講。照理講安得烈應該是十二个學生中間排名頭一个才對，但是咱看聖經 ê 記載並毋是按呢，馬太福音將伊排佇彼得 ê 後面，馬可福音將伊排第四位，路加福音 ê 記載與馬太福音同款。Tī 學生彼此爭論 ê 時，安得烈是上有資格講話 ê 人，但是咱看見安得烈並無因為這件事奮鬥，伊所奮鬥 ê 乃是看見別人 ê 心思 kap 需要，將 in chhōa 到主耶穌面前。安得烈並無驚別人比他 khah 優秀，伊反轉將濟濟優秀 ê 人介紹互耶穌。當有人渴慕救主，有人願意為主奉獻 ê 時，伊就隨時鼓勵 in，chhōa in 到主 ê 面前。彼得後書 3 章 9 節講︰「主毋愛有人沉淪，是愛人攏反悔。」安得烈就是有這款使命感，所以咱會通看著伊真積極傳福音。
當咱將人帶到主 ê 面前，咱毋知以後 ê 發展或是改變是啥物，親像安得烈一樣。西門彼得、奉獻五塊餅兩尾魚 ê 囝仔以及 hiah ê 渴慕 jīn-bat 耶穌 ê 希利尼人，攏因為安得烈 ê ín-chhōa jīn-bat 耶穌，也有真 súi ê 見證 kap 服事，Chiah-ê 人攏因為安得烈得到領受救恩 ê 福氣。成就偉大工程 ê 安得烈真正是基督 ê 精兵，願咱眾人攏成做安得烈，愛引導人來信耶穌，為主得到 chōe- chōe 靈魂。
