(請安裝Taigi Unicode字形，配合Firefox瀏覽器來讀)
作者：MnL Huī-bîng
.
萬聖節（All Saints’ Day）是菲律賓 ê 國家節日，佇這工 ê 後一日也會放假，號作萬靈節（All Souls’ Day）算是一个連續假期。這是阮來到菲律賓了後，拄著 ê 頭一个節日。
佇菲律賓主要 ê 信仰是天主教，萬靈節 ê 意思就是天主教 ê 信徒會佇這工來懷念家己 ê 親人，毋過因為工商時代 ê 演變，這个假期煞成做逐家轉去家鄉掃墓 ê 日子。在地 ê 華人也「入門綴人意」綴著in ê 風俗，提著蠟燭、花 kap 家己想欲紮 ê 物件去義山（在地人將先人長眠 ê 所在號作義山）掃墓，閣將這個節日用咱人話號作「亡人節」。因為歷史背景 ê 關係，上濟華人出入 ê 所在攏佇大馬尼拉地區，所以遮个華人義山也是全菲律賓上大規模 ê 一个。也因為華人來菲律賓開墾 ê 時間真早，所以佇19世紀 ê 時陣就已經有義山 ê 文獻紀錄矣。
除了祭拜先人以外，另外一个較特別 ê 所在就是店頭會妝點一寡仔鬼怪 ê 氣氛，來增加這个節日 ê 主題性。有 ê 是店員扮演無仝 ê 鬼怪角色，有 ê 是將店个電火改做閃閃爍爍、抑是牽蜘蛛網做布置，予來用餐 ê 人客攏會當感受著過節 ê 氣氛。其實若是有來過菲律賓 ê 旅客應該攏會知影，菲律賓對 9 月 ê 時陣就開始咧放送聖誕 ê 歌曲矣，等到 11 月萬聖節 ê 時陣已經真有過年節 ê 氣氛，四界攏咧放 We wish you a Merry X’Mas……，嘛咧賣年節相關 ê 商品，逐家也開始大包細包咧款物件，就是欲開始來準備布置家己 ê 厝矣。所以阮認為雖然萬聖節 kap 聖誕節是無仝 ê 節日，毋過菲律賓人若親像將這段假期成做是「小聖誕」來過 ê 款，實在真趣味！
