(請安裝Taigi Unicode字形，配合Firefox來讀)
華語原著：張瑞雄。台語翻譯：陳士彰
編按：作者張瑞雄牧師 tī 11 月 2 日安息主懷，享年 87 歲。張牧師生前致意宣教史料整理，間接促成《李庥與伊麗莎白‧李庥宣道書信集》出版。伊臨終前向望公報讀者會當透過這篇文章，認 bat 李庥這位英國宣道會第一位真正駐台 ê 牧師。
李庥生平簡歷
1840 年 9 月 1 日，李庥出世 tī Cumbrae ê Millport。 tī Greenock ê 學校接受基本教育。15 歲 ê 時接受基督教信仰。直到 19 歲去做賣衫生理人 ê 助理。然後伊 tī Freenock 受派做北宣教會學校 ê 老師。2 年後去Glasgow 大學讀 3 年 ê 文理學院。1865 年 10 月伊 tī 倫敦 ê 英格蘭長老教會神學院接受神學教育。
李庥受派做宣教師 ê 時間通講是真緊急。原本受派 ê 馬大闢（David Masson）， tī 1866 年 11 月初 10 船欲到清國沿海進前，受海湧捲去過身。當接到歹消息，英格蘭長老教會海外宣道會，就連邊招募有使命感 ê 牧職候補差遣前往清國 ê 台灣。受揀選 ê 就是當時 tī 倫敦長老會神學院第 3 年 ê 學生李庥。
宣道會 kah 神學院合作，互李庥速成 ê 訓練。Tī 神學院接受約略 10 個月 ê 訓練了後，1867 年 5 月 29 日受南倫敦中會（London Presbytery）按立，6 月 17 日封立做牧師。仝年 7 月 14 日及婦仁人對倫敦出發，經過 117 日 ê 海路旅行， tī 11 月 18 日來到廈門。1867 年 12 月 13 日 tī 打狗登陸。
照看，若 tī 廈門有學習語言 ê 機會，也只有不過一個月 ê 時間。做海外宣教師干單準備一冬久，koh 學習語言將近一個月，就 tī 離故鄉英國遠遠 ê 台灣，投入全然生疏 ê 打狗以南地區 ê 宣教； tī 學習當地 ê 歷史、文化、語言，通講非常艱苦。1879 年 9 月 29 日，李庥 tī 台灣府別世，享年 39 歲，葬 tī 打狗外國人墓地； tī 台灣做宣教師總共 12 年。
第一位來台牧職宣教師
李庥是第一位受英格蘭長老會差派到台灣 ê 牧職宣教師。咱想伊來台灣進前，無有鬍鬚 ê 歐洲白人（白種蕃仔），又 koh 是 tī 打狗以南 ê 地區。基督教互人 ê 信息，是 bat 有失迷，受上主找倒轉 ê 囝兒，知影家己是啥物款蒙恩 ê 人。
1867 年 12 月李庥來到台灣 ê 打狗，大大受著馬雅各醫生歡迎。來台灣進前， tī 廈門學習廈門話約略 1 個月。伊一下到打狗，就無 koh 有機會學習；李庥 bat tī 英格蘭讀神學及宣道學，來台灣以後，通講是馬雅各等待、期待 teh 欲 3 冬久，才得著 ê 牧職同工；李庥連邊進入宣教 ê 田園。他完全無有樣本通看、可通學習，凡事著愛家己去適應。
李庥未來台灣進前 ê 兩冬半，馬雅各醫生前後有邀請 tī 廈門 ê 牧師宣教師，來台灣舉行洗禮 5 擺，頭一擺是宣為霖牧師，tī 1866 年 8 月 12 日來打狗洗禮，並 tī 下晡舉行聖餐，當日受洗，台灣最初 ê 4 名信徒是：陳齊、陳清和、高長及陳圍。
第二擺是請 tī 廈門美國歸正教會 ê 汲灃瀾牧師（Rev. Leonard William Kip）tī 打狗禮拜中 kā 莊清風及 2 名埤頭人洗禮。
第三擺 tī 1867 年 4 月 19 日來打狗 kā 3 位洗禮。按呢，全台灣當時只有 9 名受洗入教 ê 信徒。
李庥所開拓 ê 南部台灣教會
李庥 tī 台灣起初 ê 4 年，kah 馬雅各醫生合作 tī 南部宣教。所設立 ê 教會有：阿里港（1869）、東港（1870）、阿猴（1871）、竹仔腳（1871）、杜君英（1872）、鹽埔仔（1872）、加蚋埔（1873，現高樹、鹽埔）、楠仔坑（1873）、橋仔頭（1873）、南岸（1874）、琉球（1879）以及建功庄和劉厝庄等，共 13 間福音站，thang 講不里有成果。
除了伊一個人開設 ê 宣道站以外，tī 其他 ê 區域猶有埤頭（鳳山）著照顧，閣有馬雅各醫生 tī 宵為北爿所開拓 ê 平埔族，有木柵、拔馬、岡仔林等教會。逐擺出去巡迴就著開費一個月ê 時間，thang 知他 ê 著磨。
傳教者養成所
1869 年開始，李庥牧師 kah 馬雅各醫生 tī 旗後、府城設立 ê「傳教者養成所」，就是現今台南神學院 ê 前身。此個時陣，林兼金是一個重要 ê 角色，伊後來成做傳教者訓練 ê 重要職員──教導及解釋者。
聖靈 ê 引導——林兼金對澎湖來就李庥得基督教道理
1870 年 2 月，李庥牧師聘請來自澎湖 ê 林兼金擔任助理。賴永祥 bat tī《台灣教會公報》2055 期 （1991 年 7 月 21 日 ）刊出（編按：原文是華語）：
萬榮華牧師 tī 伊 ê「英國長老教會海外傳教百年史」裡，記載 tī 下面。林兼金，澎湖人，來自讀冊人 ê 家庭，老爸是學者（Graduate）。伊學習中國經典，發現有一套倫理 ê 純理論，總是伊想欲去行好，時常感覺無法度行出來（親像保羅 tī「羅馬書」第 7 章所講 ê）。伊聽著有一個新宗教傳入台灣，就去拜訪 bat 聽過福音 ê 人，這個新 ê 教到底是啥物教？此個人所知也無濟，就將傳教者分 ê「十誡」（The Commandments）傳單互兼金。伊一條一條去讀，總是得著 ê 結論攏總仝款。遮個誡命誠好，若是人無法度遵守有啥路用？然後伊讀到十誡 ê 細字註解，講：「十誡是上帝 ê 誡命，總是人卻無法度遵趁。」是啦！不過註解中閣進一步講：「上主憐憫世間人，就將伊獨生囝送互世間作救主，按呢人若相信救主，毋若罪得赦免，也會通從伊得著氣力來遵守上主 ê 誡命。」伊感覺講了有道理，想欲加學習瞭解，就坐戎克船前往旗後找傳教者。當時李庥拄 tī 埤頭（鳳山），所以伊也趕去埤頭。及李庥談道了後連邊加入信教。伊對早期 ê 台灣宣教貢獻非常大。（Edward Band： Working His Purpose out I, p.84-85）
李庥報告內底，也有寫著林兼金爸囝 ê 一段對話。老爸講：「你為啥欲棄捒聖賢 ê 道理，反轉去請教番仔教？聖人 ê 道理豈毋是修身齊家治國 ê 根本？你敢棄捒自古以來聖賢 ê 道理？」兼金應講：「讀冊 ê 目的是欲求知識，若是番仔冊論真理及得福氣 ê 道理，是非讀不可。我以前信服孔子 ê 道理，總是得著基督福音了後，發現孔子袂 thang 互我內心平安，因為孔子並無指出怎樣才會得著平安，也無指出怎樣才能真正遵趁誡命。」（The Messenger, July, 1870, p.161. ct. April,1880 ,p.73-74）
林兼金相信基督了後，成做李庥牧師大大 ê 幫助。伊擔任「傳教者訓練班」 ê 老師，擔任拄來台灣宣教師 ê 語言老師，1875 年旗後府城兩地傳教者訓練班，集中 tī 府城上課成做「福音書院」了後，伊猶擔任老師。後來伊做傳道師，負責嘉義、大社等地區。1882 年（？）因為破病 tī 澎湖過身。
李庥 ê 傳教師訓練所及年俸 ê 記錄
1872 年 6 月 4 日，李庥致馬狄森書記錄了李庥 kah 宣教師聘用 ê 助手名單：
1. Kiam Kim = Pure gold（兼金） £21.12/. 林兼金
2. Ka-ti = Excellent wisdom（嘉智） £21.12/. 黃嘉智
3. Chhim-ho = Deep river（深河） £16.4/. 黃深河
4. Seng = Perfection（升） £16.4/. 葉清？
5. Kin = Root（根） £16.4/.
6. Ko = Ancient（古） £16.4/. 胡古
7. Ki = Remembrancer（記） £16.4/.
8. Ti = Knowledge（智） £16.4/.
9. Gióng-hòa = Hope for the family（仰化） £16.4/.
林兼金 kah 黃嘉智是薪資上懸 ê，只是李庥並無交代資深 kah 資淺 ê 標準。比對台南神學院合併前 tī 台南 kah 旗後兩傳道養成所 ê 校友名冊，thang 發現助手群有幾位 bat 就讀 tī 傳道師訓練所，分別是胡古、黃深河，若 Kin=彭根、Ti=吳老智等四位；總是林兼金卻無 tī 校友名冊頂面，若像是漏交去。
後繼宣教師 ê 導師
李庥來台灣滿 4 年了後，tī 1871 年 12 月 10 日甘為霖牧師（Rev. William Campbell）對打狗登陸來台灣，隔日坐船來到安平，了後 tiàm tī 台灣府城。伊是英格蘭長老教會海外宣道會，派來台灣第二位 ê 牧師職宣教師。對伊來台灣以後，宣教點分做台灣府城及打狗兩站。
李庥來台灣 4 年 ê 1871 年 12 月 20 日，甘為霖拄來 10 日，加拿大長老教會派來台灣第一任 ê 宣教師偕叡理牧師（George L. MacKay）也來台灣，伊 mā 也是對打狗登陸。偕牧師於 1872 年年初從打狗前往阿里港，訪問李庥牧師做李牧師，兩個月 ê 人客。（待續）
