(請安裝Taigi Unicode字形，配合Firefox瀏覽器來讀)
作者：李南衡
阿明伯 kā 伊 ê 細漢孫講，恁哥仔無乖，恁阿爸佇庭裡畫一個箍仔，恁哥仔佇 hia hông 罰徛你敢無看 tio̍h？你 mài 烏白花惹恁阿爸受氣，補鼎續火（pó͘ tiáⁿ sòa hóe）你 tio̍h 加衰！細漢孫自按呢恬落來。
我問講你教示孫仔教 kah「補鼎續火」？連我都 m̄ 識，恁孫仔那會聽有？阿明伯笑講，有影，補鼎續火無講你 m̄ 知。
阿明伯講，早前咱台灣人勤儉慣勢、保惜物件，厝裡大口鼎細口鍋若有小可破孔，m̄ 甘 hiat 掉，囥 leh 等補鼎續火 ê 來。早前有專門「補鼎 ê」兼修理雨傘骨，久久才來咱庄裡一 chōa，伊會佇大樹腳抑是廟口空地囥一個火爐起火，火爐邊有一支細 ê 風櫃，風櫃柄 khiú 一下拺一下，風櫃嘴 kā 風拺去邊仔 ê 火爐，hō͘ 爐火愈來愈旺。師傅會先 kā 鼎鍋仔破孔 ê 所在用鐵撼仔（thih-hám-á）敲 khah 大孔一絲仔，看鼎鍋仔 ê 材質是鐵 ê 、鉎仔抑是 Alumi，準講鉎鍋，火大猛才 kā 幾片碎鉎仔下落去猛火中 iûⁿ，才 ùi 火爐嘴倒出來，用火匙 kā sîn 起來，用一塊厚布條 kā 適量 ê 鉎仔液體（叫作鐵水），ùi 鍋 ê 外面旁倒入去，才 ùi 鍋內用厚布條 kā ji̍h ân，冷去了後 tio̍h 那像用 lúi 釘 lúi-ân-ân，才 koh 用撼仔 kòng-kòng 敲敲一下。
我問講，補鼎 to̍h 補鼎，是按怎加一句「續火」？阿明伯講，烘爐火 beh 起 kah 會猛無簡單，tio̍h 靠風櫃拺風。火猛才有法度 kā 碎鉎仔燒 kah 鎔去，一口鼎一口鍋仔接續落去補，m̄ 才 bē 無采爐仔火。親像抵則阿孫仔無乖，in 阿爸火當著 kā 掠去罰徛，細漢 ê 若烏白花，惹 in 阿爸續火 koh 補一個去罰徛。
四、五十年前，阮大兄買一支上新 ê 電動剃嘴鬚刀送我，誠好用。有一站無用了感覺刀無利。我 tio̍h 去三洋電器行買電動剃嘴鬚刀 ê 刀片，店員講 hit 型 ê 過時 ah 無 hit 型 ê 刀片，tio̍h 買歸支新型 ê。我想講日本人是按怎 tòe 美國人流行「消費刺激生產」，濫糝浪費資源，全世界 ê 資源是屬於全世界 ê 人 ê。
1990 年代中期，有一遍去東京專工走去「秋葉原」電器街 sē-sē 咧，看 tio̍h 一塊大塊看板頂面寫：任何 SONY 故障 ê 產品，歡迎 the̍h 來修理。我抵抵有 chah chit 台歹去 ê Walkman（隨身聽）去日本，想 beh chhōe SONY 修理。店員講舊型 ê 零件 tio̍h ùi 倉庫調來，明仔下晡才會修理好。第二工去 the̍h，修理好 ah 講免錢。當時我認為日本人已經醒起來，知影保惜資源，日本有救 ah。
今仔日佇台灣有啥物電器類產品歹去 the̍h 去修理，店裡 ê 人攏會講買一台新 ê 比修理舊 ê khah 俗。聽 tio̍h 感覺真悲哀、真 bē 爽。
你若 kā 少年人講「補鼎續火」，伊干單聽 tio̍h「補鼎」tio̍h 笑 bē 煞，問講鼎 beh 按怎補？補鼎 beh 創啥？
李南衡《那teh褪色的台灣俗語話》（1-2冊 )已經出版，歡迎來交關，做伙進步
