暑假pha-pha走, 服事開眼界

(請安裝Taigi Unicode字形,配合Firefox瀏覽器來讀)

作者:A-siok

每一年,攏愛為 tio̍h 服事 ê 福音機構出外請安,tī 逐所在 pha-pha 走,bē 輸 leh 唱安可曲,一曲過一曲。干單 7 月,定定愛連走 4 个無仝 ê 所在,講 bē thiám,實在是騙人–ê。但是 thiám bóng thiám,嘛有真價值 ê 所在,就是會當 tī 無相款 ê 教會,看 tio̍h 無相款 ê 事工特色、感受會友 ê 熱情或閉思、對小所在觀察牧者和會友 ê 互動,一方面感覺真心適,另外一方面嘛 hō͘ 服事 ê 眼界 kah 對教會 ê 認捌 koh-khah 開闊。

跳越時空 來到美麗所在

今年暑假,有機會到北部一間教會請安。因為參與讀經事工 ê 緣故,和這間教會 ê 牧師有熟似。彼工,我和另外一半早早就出門。因為是拜六,路 nih 車真濟,所以沿路若遇 tio̍h 休息站,就愛停落來歇一下,tī 高速公路頂 ê 時間 tōng 真久。彼日 ê 天氣真特別,對南到北,經歷大焱日、烏雲罩霧、siàng 大雨、雨過天青,若像 leh 洗三溫暖。

當天色漸漸暗,阮 ê 車猶 bē 駛到位。猶 tī 路 nih ê 時,就接 tio̍h 牧師兩通電話,關心阮車駛到叨位ah,koh 幫阮報路,講到叨位愛接某一條路。提 tio̍h 手機看 google map ê 衛星導航,阮 ê 車已經接近教會,發現街路有夠鬧熱。

若按照衛星導航 ê 指示,阮 ê 車應該越正 pêng 就馬上會到,但是若安呢行,阮 ê 車真有可能會卡 tī 巷仔內,進無步,退無路。莫怪,牧師連叩兩通電話來,報阮講愛行叨一條路 khah 好。想 tio̍h 牧師 hiah-nih 搭心,歸身軀 bē 輸有一个電流通過去,感覺燒烙燒烙。

Tī 日頭 tú-tú 掛 tī 山尾溜欲 tńg 去歇睏 ê 時,阮 ê 車嘛駛到教會頭前 ê 彼條小路。和外面鬧熱 ê 街巷相比,這條小路 ke 真清幽,路 ê 一邊是一間學校,另外一邊是一个公園。公園內 ê 樹仔真大叢 koh 茂盛,樹仔頂 koh 生滿長片蕨、垂葉書帶蕨、瓜子草、山蘇……;逐叢樹仔 ê 形體攏真特別,好親像穿插 fashion ê model,排規排 khiā tī 時裝秀 ê 伸展台。公園內 koh 有一寡日式建築物,和一身軍人雕像,好親像一目𥍉 á,跳越時空,來到另外一个世界,感覺真神奇!

牧師可能早就 teh 等阮,阮 ê 車一到門口,牧師隨 kā 大門 sak 開,hō͘ 阮入去。牧師簡單介紹教會環境,chhōa 阮到教會 ê 厝尾頂看風景,無論對叨一个角度遠遠看去,攏是一片青綠 ê 山,近近 ê 所在就是有一片大樹海 ê 公園。當日頭欲落山 ê 時,金黃 ê 光 chhiō tī 教堂 ê 鐘塔,形成一幅真美麗 ê 畫面。心中忍不住喊出彼得 tī 變貌山頂所講 ê 彼句話:「咱 tī chia 真好……。」

風景看煞,牧師真好禮招待阮食暗頓,嘛分享服事 ê 時遇到一寡趣味 ê 代誌,tī 餐廳講 bē 煞,轉去教會 koh 繼續講。一日 ê 厭倦,攏 tī 笑聲中消失 loh!因為隔轉工牧師嘛愛去別間教會講道,就請阮 khah 早歇睏,若無,可能會講 bē 煞。

委身服事 kah牧師同做工

主日禮拜中,我和教會兄姊分享阮機構 ê 福音事工,講起早期宣教師為 tio̍h 福音 ê 緣故,tī 台灣逐所在 pha-pha 走,當時交通無方便,宣教師除了行路、坐牛車,嘛愛坐竹排仔、坐火船,甚至坐轎盤山過嶺。「和當時比起來,咱實在有夠幸福 ê。」下面 ê 兄姊,有 bē 少人 leh tìm 頭,表示認同。

主日禮拜結束,續接是兒童主日學。早起指揮聖歌隊 koh 司會 ê 長老,若變身超人,koh 變做主日學老師。出席 ê 小朋友,hām 一个 3 歲 ê 查埔囝仔算在內,加上家長,一隻手伸出來算,差不多 tú-tú 好。雖然是安呢,老師猶是真認真教,一點仔攏無馬虎。Tī 教室後面,koh 有兩三个配搭 ê 少年人,協助操作電腦 PPT,嘛 kah 主日學 ê 囝仔做伙唱 tio̍h 古錐 ê 台語詩歌。

「小朋友,今天教 ê 詩歌攏會曉唱 à 嗎?」長老問學生。

「老師,你教 ê 詩歌,我攏背起來 ah!」穿一 su 白色洋裝,笑起來甜甜,bē 輸白雪公主 ê 查某囡仔,今年 tú 升去幼稚園大班,iù-chíⁿ ê 聲音,透出滿滿 ê 自信。當老師 tī 講台頭前透過 PPT 投影教唱詩歌 ê 時,查某囡仔唱 kah 真大聲、聲音真好聽,節拍嘛攏有 tòe-tio̍h 鋼琴,表示她所講 ê 話並無虛假。

主日學結束,隨時展開信徒造就課程。這時,長老 koh 對主日學老師化身作台語老師,教大家唸歌詩。這禮拜,長老分 hō͘ 逐人一張寫滿白話字 ê 詩句,教大家唸出來。牧師娘真厲害,一下就唸對幾偌句。坐後面 ê 幾位少年家,嘛真用心拼音,努力唸出詩句。大家認真學習白話字 ê 模樣,hō͘ 人真感動。

長老所教 ê 詩,內容描寫台灣逐个節氣 ê 景像,除了描寫自然風景 ê 變化,嘛提到人文風情,真有意思。連少年家嘛感覺唸台語詩真趣味,你一句我一句 leh 討論。

過去,因為有名人 tī 這間教會做禮拜,人數 bat 到八、九十人。但名人後來因為身體 ê 緣故,無 koh 來禮拜,一寡慕名來 ê 人嘛 tòe leh 離開。留落來下 ê 人,tī 牧師慢慢培育之下,信仰更加實在。雖然教會人數無親像過去 hiah 濟,但是每一个人攏非常認真追求信仰,樂意受造就。牧師除了感謝上帝帶領之外,嘛特別感謝長老 ê 委身 kah 同心服事。

各司其職 教會健康成長

一个教會是 m̄ 是健康,同工真正足重要。看 tio̍h 教會長老 tī 禮拜中,司禮 koh 指揮聖歌隊,接續 koh 教主日學、信徒造就班,用喜樂 ê 心服事,成作牧師 ê 好助手,莫怪牧師一直感謝上帝賜 hō͘ 他真好 ê 同工。其實,當那些長執身兼數職無盈真濟事工時,其他 ê 人並無閒閒冷眼旁觀,是各司其職,投入各種服事。所以,當牧師外出講道 ê 時,教會對細漢到老大人,每一个人攏照原本 ê 目標向前行。

我看到一个美好 ê 畫面:當牧者堅守信仰原則,順服上帝旨意,凡事以身作則,被帶領 ê 人嘛會甘心樂意委身,逐人按照上帝賞賜 ê 恩賜,各司其職,歡喜為主來做工!

我有話要說