(請安裝Taigi Unicode字形，配合Firefox瀏覽器來讀)
作者：林益彰
一‧南國囡仔
─葉石濤：阮心內 ê 浪漫蟲永久攏袂散去。
轉來南寧街
黃金雨猶原徛佇遐
踮在溫馴 ê 寒熱
阮若像有聽著
有人，恬靜咧咻喝
聲嗽對稀微 ê 街巷傱出
南國囡仔轉
來矣：轉厝
眼而前 ê 南寧街
血母鄉所牽挽 ê 批字
火金蛄般 ê 辭文
二‧南寧夢獸
─葉石濤：作家本底是食夢 ê 夢獸。
阮坐佇南寧街
雄雄文學 ê 肢骨展翼
跟綴冊紙飛出妖物
娘親 ê 心跳
彼號做文獸
名字叫南寧街
莫恫嚇，免驚惶
伊袂咬人
會使挲看覓
看矣，字辭沓沓仔
化做文獸 ê 肢骨
聽矣，言語沓沓仔
刻出文獸 ê 溫馴 ê 面模
文獸伊是古錐 ê
永世欲護守幼路 ê 性命
恬恬靜靜眼影南寧街 ê 冊紙
夢獸珠淚 ê 血路
三‧南國文火
─葉石濤：無土地，文學會佇佗位。
南國囡仔踅頭
南寧夢獸徛佇邊仔
做伙眼影風聲中
彼葩毋捌失眠，眾火燈
尾後靜靜揹起
坐佇漁光島 ê 海翁仔
宛然白翎鷥踮佇拋荒所在
飛出空色 ê 雲尪血
雲尪：山形抑是人形 ê 大片雲
