阿魯教我 ê 代誌:用問問題來做神學

(請安裝Taigi Unicode字形,配合Firefox瀏覽器來讀)

作者:王美書

最近我 teh 讀全聲洙 ê《提問與討論的教育奇蹟》(新北市:木馬,2015)。當作者探討是啥物 hō͘ 猶太教育即呢特別 ê 時,哈柏露塔(Havruta)ê 概念跳出來,意思是「兩人一組,kah 對方進行提問、對話、討論及辯論 ê 過程」。

而且,對象不管是啥物人,lóng 會通成做對話 ê 同伴。猶太人認為教育本身就是一種屬靈 ê 工作,因為教育會通對生命帶來本質 ê 變化。所以,父母及囡仔之間,是互相對話、彼此教育 ê 同伴;當囡仔問問題 ê 時,直接提供答案是一種 pîn-tōaⁿ ê 疼。

欲問問題,就愛好好聽及觀察。欲討論,就愛按捺內在想欲講話 ê 慾望。我用面冊記錄「阿魯教我 ê 代誌」,為我開啟一條新 ê 學習神學 ê 路徑。以下是對2018年12月28日摘錄 ê 對話,是阮做伙做神學 ê 吉光片羽。

佇去新樓幼兒園 ê 路上,阿魯 khû teh khioh 台灣欒樹 ê 種子。總是已經是上午九點外。我心裡真向望伊緊結束 khioh 種子 ê 活動。伊 khioh 一粒,就閣走去將種子丟入去樹林區,邊丟邊講,種子愛落去土裡,才會閣 puh-íⁿ oh……khioh 一粒 soah,koh 繼續同款 ê 行程。

我知影這個代誌對伊 ê 重要,毋閣,我也真緊張時間緊緊過,我會趕袂赴我 ê 行程。趕時間 ê 我,看著 hō͘ 工友掃成堆 ê 糞埽。

佇時間中 ê 伊,看著–ê,sī 種子,sī 活命,sī 一粒籽包台灣欒樹。

思考一:一粒籽包台灣欒樹

新《聖詩》630 首〈球根內有一蕊 súi 花〉,有一粒籽包蘋果樹;阿魯卻是一粒籽包本地台灣欒樹。佇加拿大伊有 bán 過蘋果,看過蘋果樹。總是佇遮,伊 ê 生活經驗中,日日看到 ê 是台灣欒樹 ê 變化,對開花到結果實。伊 ê 講法,成做新《聖詩》630 首 ê 阿魯 ê 台灣註解。

這段對話也開啟面冊頂面新 ê 對話及思考。明漢牧師講:「有囡仔了後,時間變成另一種向度 ê 奧祕,咱會趕時間,毋閣真歹勢,he 一點仔也不是 in ê 問題。」我講:「所以,我趕時間,但是阿魯佇時間中,或者時間佇他中間,他 ê 時間及我 ê 時間成做兩個無同 ê 時間。多謝你指出這點。有囡仔以後,我 ê 神學重新解構及建構。」

伊閣續接:「in 是上好 ê 導師,常常容許咱 ê 發怒,甚至也是主動來及咱和好 ê 人……這點及上主一樣。」我講:「心有戚戚焉。」

Koh 思考:

時間 ê 奧祕,點出我及阿魯無同 ê 時間經驗。阮 kap 時間 ê 關係無同。這個差別是我將生命當作糞埽;阿魯看出「糞埽」中 ê 生命。當我趕時間,阿魯活地彼個當下。

閣 khah 趣味 ê 是,這個抽象 ê 時間概念,是表現佇阮 ê 種種關係之上。我,有濟濟結構性 ê 行程,我 beh 去完成一個接一個 ê 行程,啥物時間做啥物代誌,為了滿足這個設定,我愛趕時間。阿魯,伊猶未有這種結構概念,伊 ê 心向這個世界開放,所以常常「分心」,注意環境中各種事物,觀察、承認、擁抱、體會無同事物中 ê 生命及趣味。

對話,是對話 ê 人互相交流、學習,成為同伴。這講出對話者彼此之間權力 ê 關係。做父母 ê,若是單方面教導,回答囡仔 ê 問題,會 hō͘ 自己得著較高 ê 位置,權力 ê 運用及流動,就走到自己身上。不過,問問題及討論,卻將父母 ê 位置囥到及囡仔同款 ê 高度。這種高度 hō͘ 我愛用卡濟 ê 氣力、時間,來 kap 阿魯交通。而且,為著問問題,大量 ê、好好去聽是上基本 ê。為著討論,就愛用彼此對話中間 ê 材料,這是一種佇 hit 時刻彼此 ê 臨在 kap 陪伴。這豈不是一種靈性 ê 操練及工作?

廣告/美好腳蹤368認購

我有話要說