(請安裝Taigi Unicode字形，配合Firefox瀏覽器來讀)
作者：陳柏壽
2019 年 9 月，聯合國氣候大會上出現一位 16 歲瑞典來 ê 查某學生 Greta Thunberg，佇全世界 193 位 ê 代表面前發表演講，伊講：「恁 chiah-ê 大人，實在真敢死！How dare are you！聲聲句句就是欲趁錢，欲發展經濟，恁豈無看著這個世界 ê 環境漸漸惡化，海洋陸地攏是汙染及廢物，地球溫度不斷升高，人人攏咧受苦，人人攏咧行向死亡 ê 路，但是恁 kan-nā 咧講、kan-nā 知影經濟發展經濟發展！」世界百幾個代表，以及全世界各地億萬人收看電視現場轉播，大家攏耳仔 kha̍p-kha̍p，tiām–tiām-tiām，咧聽這個細漢查某囡仔給大人 ê 責備及講道。伊親像一個現代 ê 女先知，目睭真利，kàng 佇每人 ê 目睭，hō͘ 人毋敢講話。
│你 ê 錢佇 hia，心就佇 hia│
全世界有錢人攏將錢存佇美國、Bamuda、Virgin Island、Cayman Islands、巴拿馬、新加坡、瑞士各地。世界好額人 ê 錢攏會流去 hia，因為毋免納稅，閣無人會知。所以美國喝講欲將中國、蘇聯、土耳其政客 ê 存佇美國 ê 錢凍結 ê 時，所有 ê 紛爭自然消失，因為 in ê 錢攏屬美國銀行控制。聽講中國人儉佇這所在 ê 錢，濟少有二兆美金。這真正是「有錢會 hō͘ 鬼推磨」ê 世界，世界真正是主耶穌講 ê：「你 ê 錢佇 hia，心就佇 hia。」有錢 ê 所在就是人 ê 天國。
面對順息萬變 ê 烏暗世界，hō͘ 人對未來世界毋敢存希望。最近嘛有 39 位越南人（註：起先傳說講是中國人）hō͘ 人蛇集團 sa̍k 入去冷凍貨櫃箱，死佇倫敦附近。In 逃走 ê 目的是為著生活及自由。
但是世間 ê 烏暗，袂當遮蓋咱對將來 ê 期待及希望。世間親像老母欲生囝前 ê 陣痛，是未來世界出現前必然 ê 現象。
一般台灣人 ê 信仰中，存在有真大對未來世界 ê 十八層地獄 ê 森羅萬象、陰險、恐怖、刑罰 ê 驚惶及不安。因為對未來世界 ê 驚惶來產生在生 ê 道德規範，尤其錢財方面 ê 道德，逼人毋通做歹。
基督教咧講錢叫做「瑪門」（馬太福音 6 章 24 節），錢是魔鬼管轄 ê 所在，瑪門國及上帝國無仝國。基督教內面無親像民間描述地獄 hia 爾詳細及悽慘。保羅書信差不多無提起地獄 ê 詳情。馬太福音 25 章只有講一句：無憐憫人 ê 人欲往「永刑」去，義人欲往「永生」去（馬太福音 25 章 46 節）。耶穌毋捌講地獄有閻羅王主宰 ê 世界控制，只講歹人佇 hia，會親像乾 ê 稻 kó，用火來燒。伊嘛講 hia ê 袂赴婚姻 ê 慢來參加宴席 ê 在室女，去 hō͘ 人關佇門外面，袂當入去，表示因彼屬佇一個外面 ê 世界，彼個世界詳細按怎，伊無講，只講一句人人「咬牙切齒」，並無講到 hia 爾悽慘（馬太福音 25 章 30 節）。啟示錄內面有小可提起地獄 ê 代誌。
但是我佇教冊 ê 教科書「用人智學 ê 觀點解釋啟示錄」內面，努力欲解說 ê 方向是講：未來世界毋是「地獄」，是一個「新天新地」。
啟示錄內面，上帝對人真有信心。世間 ê 最後就是人及上帝 ê 結合，上帝及人世中間 ê 布簾已經除去，上帝對刺死伊 ê 敵人，嘛是用包容及平安來款待 in。人毋免閣生活佇無望 ê 風湧及受苦 ê 境界。彼個世界是一個真清淨透明閣美麗 ê 清氣、和平、調和 ê「玻璃海」ê 新世界（啟示錄 4 章 6 節）。佇彼所在所有宗教 ê 手寫 ê 教條及經典，包括基督教 ê 聖經，攏欲廢無。只有上帝 ê 話叫做「永遠 ê 福音」欲傳 hō͘ 各國、各族、各方、各民 ê 人。（啟示錄 14 章 6 節）
佛家講：寧可家己入地獄拯救眾生，毋願世間有一人沉淪。意思及基督教所講仝款：毋願一人沉淪，乃願人人得救（馬太福音 18 章 14 節）。基督教 ê 提綱，不在「審判」世間，是在「拯救」世間（約翰福音 12 章 47 節）。咱所信 ê 只有是一位永生救人 ê 上帝（提摩太前書 4 章 10 節）。
對未來世界 ê 遠景，保羅是按呢想：「彼時所有世間掌權 ê、執政 ê、有能 ê，攏會毀滅，世間一切攏欲交 hō͘ 上帝，上帝會毀滅所有仇敵，包括『死』。上帝佇未來世界，hō͘ 萬物攏服佇伊腳下。上帝在萬物之上，是萬物之王。」咱著用上帝賞賜 ê「靈眼」（以弗所書 1 章 18 節），來看透未來世界 ê 奧祕。咱看著 Greta Thunberg 對世界 ê 呼叫，應該認定 he 就是未來世界向前行 ê 希望，是世間 ê 光及世間 ê 鹽。咱 ê 世界就是有這種先知 ê 聲音，一步一步，向著美麗 ê 將來進前。世間一定會變到愈來愈好。
│ 新 ê 天及新 ê 地 │
未來世界是一個新 ê 天及新 ê 地 ê 世界（啟示錄 21 章 1 節），是一個超越現實世界 ê 再生，是超越五官，超越肉體 ê 新世界 ê 再生，是人間提升向上及上帝合一 ê 再生。是上帝 ê 子及人 ê 子 ê 合一 ê 再生。佇 hia，有新 ê 天城耶路撒冷，「耶路撒冷黃金城，有乳有蜜齊備；我心欣慕愛到 hia，享受城內福氣。可愛快樂 ê 土地，上帝百姓故鄉；福氣滿滿袂測度，言語難得形容。」（截錄自聖詩 352 首）未來世界是「地球再生」ê 現象，是地球「道成肉體」ê 現象，是咱靈魂世界擴展變做世間 ê 全部，是世間所有人種、空間、族群、文化 ê 綜合體。未來世界毋是欲毀滅，是欲更新，「看啊，我將一切攏換新啦！」（啟示錄 21 章 5 節）「新 ê 天及新 ê 地」是人對上帝賞賜 ê 智慧及能力所建立 ê 新 ê 世界，佇 hia 有上帝做主，上帝做人間共同 ê 天父，佇 hia 上帝欲擦去人間所有 ê 目屎，佇 hia 無閣有死亡、悲傷、哀哭，因為一切 ê 代誌攏已經過去啦。
世間一定會變到愈來愈好。咱台灣徛起這世界 ê 一角，台灣人嘛仝款會當出聲，看著一個 khah 高、khah 闊、khah 遠、khah 媠 ê 未來世界，咱攏來去 hia 相會。咱欲轉去 ê 彼個世界，就親像夕陽欲落山 ê 時看著淺藍色天空內面有美麗 ê 白雲咧飛，hō͘ 人真歡喜閣真意愛，新天新地 ê 美麗世界
