(請安裝Taigi Unicode字形，配合Firefox瀏覽器來讀)
作者：李南衡
五、六年前，有一工去拜訪阮鄉前輩吳老先生，雖然 90 外歲 ah，身體健康頭殼清楚，逐早起睏精神第一項代誌 tio̍h 是看報紙。
吳老先生看 tio̍h 我，氣-phut-phut the̍h 報紙 hō͘ 我看，罵講：你看 chit-ê 台中高等法院分院民事庭法官胡景彬，伊 ê 薪水準講一個月有 20 萬，攏 mài 食 mài 用，一年有 240 萬，10 年有 2400 萬，作 30 年法官準有 7200 萬，那有可能 chhōa 三個某？報紙寫講大某一個月生活費 6 萬、二房一個月 20 外萬、三房 5 萬，伊有 6 個子女攏已經長大成人 ah，攏真 gâu lù 信用卡，橫直簽簽咧攏叫 in 老父去付。Chiah 呢大 ê 生活負擔，chit-ê 法官應該 thàn 無夠開、散 kah 鬼仔 beh 掠去才 tio̍h，顛倒反，伊足有錢咧！檢調查出來，胡景彬法官 ê 資產有 3 億外。問題是伊 ê 3 個某咧？大某 kah 子女所有 ê 資產有 9865 萬，包括銀行存款 851 萬、金角 18 塊，佇台北市大安區精華地段 kah 台中市南區攏總有 9 間厝。二房總資產有 6310 萬，佇雲林縣西螺有土地 kah 台中市南區有豪華住宅攏總有 7 筆。三房是胡法官 ê「大數櫃」，總資產有 1 億 7812 萬，佇台中市西區有房地產 5 筆。檢調猶 koh 佇伊 ê 保管箱 kah 伊 ê 厝裡查扣現金 2653 萬。吳老先生愈講愈大聲，精神愈好。伊講，chit 個法官那會有 hiah 濟錢？真有可能是一個「有錢判生，無錢判死」ê 法官！
我趕緊 kā 解說，民事庭 ê 法官無 teh 判人生死，伊是審判人 kah 人之間錢財、契約糾紛 ê 法官。
吳老先生聽一下大聲講：按呢 koh khah 有機會食錢！
我問講，政府官員貪瀆是按怎講是「食錢」？
吳老先生講，日本時代真少聽 tio̍h官員貪瀆，有可能當時 ê 官員有影 khah 清廉，mā 有可能是新聞媒體無夠力 m̄ 敢報。總是戰後中華民國政府來台灣以後，hông 感覺那像是「無官不貪」。阮 hit 陣攏講 in 穿「中山裝」、中山袋大大 ê tio̍h是 beh「食錢」。停戰了後，日本人轉去，留真濟公家、私人 ê 工廠機械設備、資材落來，in 看 tio̍h 逐項 mā 合意、逐項 mā 愛，當時 in 來台灣 ê 名義是「接收」，事實上那像是用搶 ê「劫收」，台灣人真受氣、真失望，m̄ 才會講 in 是「食銅食鐵食 Alumi！（chia̍h-tâng chia̍h-thih chiah-Alumi！）」（Alumi 漢字寫作「鋁」）。
我刁工問講，in 嘴齒誠勇 ô͘ ？吳老先生聽一下大聲罵講，m̄ 是嘴齒勇，是胃口好、啥物都食。Hit 當時咱台灣人攏按怎講 in 貪食你敢知？「有毛 ê 食到粽簑，無毛 ê 食到鐵錘；有腳 ê 食到樓梯，無腳 ê 食到桌櫃。」中國官員 kā 戰後 ê 台灣食 kah 臭青荒！
若講「食銅食鐵食 Alumi！」真濟少年人聽無，以後 mā 真少人會曉講。
李南衡《那teh褪色的台灣俗語話》（1-2冊 )已經出版，歡迎來交關，做伙進步
