(請安裝Taigi Unicode字形,配合Firefox瀏覽器來讀)
作者:蘇晏德
一鼠精明排頭名 It-chhú cheng-bêng pâi thâu-miâ
佈計佇牛尻脊騎 Pò͘-kè tī gû kha-chiah khiâ
個性奸巧人討厭 Kò-sèng kan-khiáu lâng thó-ià
看著貓仔緊逃命 Khòaⁿ-tio̍h niau-á kín tô-miā
二牛骨力犁田兄 Jī-gû kut-la̍t lê-chhân hiaⁿ
為著農民足拍拚 Ūi-tio̍h lông-bîn chiok phah-piàⁿ
賜咱有飯通好食 Sù lán ū pn̄g thang hó chia̍h
身為人類愛感謝 Sin-ûi jîn-lūi ài kám-siā
三虎兇猛閣神祕 Saⁿ-hó͘ hiong-béng koh sîn-pì
虎牙尖尖足稀奇 Hó͘-gê chiam-chiam chiok hi-kî
外形恐怖有霸氣 Gōa-hêng khióng-pò͘ ū pà-khì
踏入樹林愛細膩 Ta̍h-ji̍p chhiū-nâ ài sè-jī
四兔外表真古錐 Sì-thò͘ gōa-piáu chin kó͘-chui
耳仔長長有夠媠 Hīⁿ-á tn̂g-tn̂g ū-kàu súi
生性溫柔有智慧 Seⁿ-sèng un-jiû ū tì-hūi
上驚天頂覓鴞追 Siōng-kiaⁿ thiⁿ-téng la̍h-hio̍h tui
五龍虛幻天頂飛 Gō͘-lêng hi-hoàn thiⁿ-téng poe
彼是古早的神話 He sī kó͘-chá ê sîn-ōe
上山落海無地揣 Chiūⁿ-soaⁿ lo̍h-hái bô-tè chhōe
人間流傳的笑詼 Jîn-kan liû-thoânphunchhiò-khoe
六蛇行動若鬼差 La̍k-chôaⁿ hêng-tōng ná kúi-chhai
來去自如無阻礙 Lâi khì chū-jû bô chó͘-gāi
蹛佇揜貼樹林內 Tòa tī iap-thiap chhiū-nâ lāi
行蹤遍滿全世界 Hêng-chong piàn-móa choân-sè-kài
七馬勇壯予人騎 Chhit-bé ióng-chōng hō͘ lâng khiâ
平時訓練走山坪 Pêng-sî hùn-liān cháu soaⁿ-phiâⁿ
戰爭時陣佇兵營 Chiàn-cheng sî-chūn tī peng-iâⁿ
出生入死真拚命 Chhut-seⁿ ji̍p-sí chin piàⁿ-miā
八羊恬靜顧草埔 Peh-iûⁿ tiām-cheng kò͘ chháu-po͘
溫馴無膽驚風雨 Un-sûn bô-táⁿ kiaⁿ hong-hō͘
需要牧者來保護 Su-iàu bo̍k-chiá lâi pó-hō͘
才袂糊塗行迷路 Chiah bē hô͘-tô͘ kiâⁿ bê-lō͘
九猴成精吊樹頭 Káu-kâu sêng-chiaⁿ tiàu chhiū-thâu
規工閒閒拋拋走 Kui-kang êng-éng pha-pha-cháu
交群結黨烏白鬧 Kau-kûn kiat-tóng o͘-pe̍h nāu
上驚路裡拄著狗 Siōng-kiaⁿ lō͘–nih tú-tio̍h káu
十雞透早叫起床 Cha̍p-ke thàu-chá kiò khí-chhn̂g
主人出門巡田園 Chú-lâng chhut-mn̂g sûn chhân-hn̂g
雞母𤆬囝四界耍 Ke-bó chhōa kiáⁿ sì-kè sńg
早時伴咱到下昏 Chá-sî phōaⁿ lán kàu e-hng
11狗忠實主人疼 Cha̍p-it-káu tiong-si̍t chú-lâng thiàⁿ
親像門神顧門埕 Chhin-chhiūⁿ mn̂g-sîn kò͘ mn̂g-tiâⁿ
勇猛護家真拍拚 Ióng-béng hō͘-ke chin phah-piàⁿ
守護家園全民贏 Siú-hō͘ ka-hn̂g choân-bîn iâⁿ
12豬規工攏閒閒 Cha̍p-jī-ti kui-kang lóng êng-êng
若欲食䊩走進前 Nā beh chia̍h-phun cháu-chìn-chêng
等待大隻祭神明 Tán-thāi tōa-chiah chè sîn-bêng
家庭有豬萬事成 Ka-têng ū ti bān-sū-sêng