記念濟南教會主日學教室修建 kap 宣教中心興建感恩禮拜

(請安裝Taigi Unicode字形,配合Firefox瀏覽器來讀)

作者:Lí Khîn-hōaⁿ

光 kap 鹽 ê 玫瑰窗  Kng kap Iâm ê Mûi-kùi-thang

 

準講刺 phè hō͘ 火燒        Chún-kóng chhì-phè hō͘ hóe sio
咱 ê 教堂猶原袂毀壞        Lán ê kàu-tn̂g iû-goân bē húi-hoāi

準講玫瑰窗 hō͘ 人拍破        Chún-kóng mûi-kùi-thang hō͘ lâng phah-phòa
玫瑰照常開滿教堂        Mûi-kui chiàu-siông khui-móa kàu-tn̂g
開滿信徒 ê 面        Khui-móa sìn-tô͘ ê bīn
開滿會友 ê 心        Khui-móa hōe-iú ê sim

光 kap 鹽 ê 教會        Kng kap iâm ê kàu-hōe
光 uì 玫瑰窗照入來        Kng uì mûi-kùi-thang chiò–ji̍p-lâi
咱 ê 汗曝出鹽        Lán ê khōaⁿ pha̍k-chhut iâm
曝出玫瑰鹽        Pha̍k-chhut mûi-kùi-iâm
Hō͘ 社會有光明        Hō͘ siā-hōe ū kng-bêng
Hō͘ 人心無朽爛        Hō͘ jîn-sim bô hiú-nōa

紅色 ê 三葉草講:        Âng-sek ê saⁿ-hio̍h-chháu kóng:
咱著疼人親像家己        Lán tio̍h thiàⁿ lâng chhin-chhiūⁿ ka-kī
用家己 ê 熱情        Iōng ka-kī ê jia̍t-chêng
好款待出外人        Hó khoán-thāi chhut-gōa-lâng

天藍色 ê 三葉草講:        Thiⁿ-nâ-sek ê saⁿ-hio̍h-chháu kóng:
咱著疼天頂 ê 爸        Lán tio̍h thiàⁿ thiⁿ-téng ê Pē
咱 ê 上帝        Lán ê Siōng-tè
爸囝聖神三位一體        Pē kiáⁿ Sèng-sîn sam-ūi it-thé

草綠色 ê 葉片講:        Chháu-le̍k-sek ê hio̍h-phìⁿ kóng:
上帝會𤆬咱行到        Siōng-tè ē chhōa lán kiâⁿ-kàu
青翠 ê 草埔        Chheⁿ-chhùi ê chháu-po͘
Tī 遐咱無 koh 有驚惶        Tī hia lán bô koh ū kiann-hiâⁿ
伊 ê 槌伊 ê 枴欲安慰咱        I ê thûi I ê koái beh an-ùi lán

水藍色 ê 圓講:        Chúi-nâ-sek ê îⁿ kóng:
上帝會 hō͘ 咱 ê 水池滿滿        Siōng-tē ē hō͘ lán ê chúi-tî móa-móa
Ùi 溪流 ê 活水直直流落來        Ùi khe-liû ê oa̍h-chúi ti̍t-ti̍t lâu–lo̍h-lâi
上帝 ê 話止咱喙焦        Siōng-tè ê ōe chí lán chhùi-ta

上中心 ê 紅點講:        Siōng tiong-sim ê âng-tiám kóng:
耶穌 ê 寶血        Iâ-so͘ ê pó-hoeh
為咱流盡        Ūi lán lâu-chīn
洗清咱 ê 罪過        Sé-chheng lán ê chōe-kòa

核心烏色 ê 六角形講:        Hi̍k-sim o͘-sek ê la̍k-kak-hêng kóng:
大衛之星        Tāi-pi̍t chi chheⁿ
照光全地        Chiò-kng choân-tē
上帝 ê 國欲臨到        Siōng-tè ê kok beh lîm-kàu
伊 ê 旨意得成        I ê chí-ì tit-chiâⁿ
Tī 地裡親像tī天裡        Tī tē-ni̍h chhin-chhiūⁿ tī thiⁿ-ni̍h

柑仔色 ê 傳統花瓣講:        Kam-á-sek ê thoân-thóng hoe-bān kóng:
上帝創造 ê 人世間        Siōng-tè chhòng-chō ê jîn-sè-kan
人世間 ê 國度        Jîn-sè-kan ê kok-tō͘
人世間 ê 權柄 kap 繁榮        Jîn-sè-kan ê koân-pèng kap hoân-êng

中央上蓋顯目 ê 白十字講:        Tiong-ng siōng-kài hiáⁿ-ba̍k ê peh si̍p-jī kóng:
十字架 ê 記號        Si̍p-jī-kè ê kì-hō
耶穌 ê 犧牲 kap 聖潔        Iâ-so͘ ê hi-seng kap sèng-kiat
贏過死亡        Iâⁿ-kòe sí-bông
上帝 ê 光明        Siòng-tè ê kng-bêng
贏過通世間 ê 奢颺        Iâⁿ-kòe thong sè-kan ê chhiaⁿ-iāⁿ

玫瑰窗,色彩繽紛        Mûi-kòe-thang, Sek-chhái pin-hun
宛然一道彩虹        Oán-jiân chi̍t tō chhái-khēng
彩虹是上帝 kap 咱 ê 約        Chhái-khēng sī Siōng-tè kap lán ê iok
行過彩虹橋        Kiâⁿ-kòe chhái-hông kiô
就到天頂祖家        Chiū kàu thiⁿ-téng chó͘-ke


天—-光    Thiⁿ—–Kng

天是 see
光是 saw
天想欲看著光
光想欲看著天
敢若 teh 坐 seesaw
敢若 teh 坐砄硞枋
Khi̍h-khi̍h kho̍k-kho̍k
Khi̍h-khi̍h kho̍k-kho̍k
See kap saw
Saw kap see
天 kap 光
光 kap 天
中央是長長 ê 一條長線
一條長長 ê 磅空

這頭明明都已經 peh 起去
足懸足懸 ê 頂懸
強欲拄著天 ê 跤兜
聽會著清涼 ê 風 teh 吹
鼻會著芬芳 ê 花 teh 開
明明看會著前途 ah
明明看會著美夢 ah

彼頭 ê 現實
毋知咱 ê 輕重
沉重 ê 現實
Hō͘ 咱真重 ê 苦痛
害咱頓落來塗跤
摔一下尻川疼
大聲叫阿娘喂
大聲叫上帝阿爸 pē
雖罔咱人欲看著天光
愛軁過長長 ê 磅空
暗暗 ê 磅空
驚惶 ê 磅空
憢疑 ê 磅空
餒志 ê 磅空
上帝講有天就有天
上帝講有光就有光

只要拑牢上帝
無管磅空偌爾長
無管磅空偌爾暗
咱連鞭會看著光
咱 teh-beh 看著天
咱這時看著天光

Thiⁿ sī see
Kng sī saw
Thiⁿ siūⁿ beh khoaⁿ-tio̍h kng
Kng siūⁿ beh khòaⁿ-tio̍h thiⁿ
Ká-ná teh chē seesaw
Ká-ná teh chē khi̍h-kho̍k-pang
Khi̍h-khi̍h kho̍k-kho̍k
Khi̍h-khi̍h kho̍k-kho̍k
See kap saw
Saw kap see
Thiⁿ kap kng
Kng kap thiⁿ
Tiong-ng sī tn̂g-tn̂g ê chi̍t tiâu tn̂g-sòaⁿ
Chi̍t tiâu tn̂g-tn̂g ê pōng-khang

Chit thâu bêng-bêng to í-keng peh khí-khì
Chiok koân chiok koân ê téng-koân
Kiông beh tú-tio̍h thiⁿ ê kha-tau
Thiaⁿ ē tio̍h chheng-liâng ê hong teh chhoe
Phiⁿ ē tio̍h hun-hong ê hoe teh khui
Bêng-bêng khòaⁿ ē tio̍h chiân-tô͘ ah
Bêng-bêng khòaⁿ ē tio̍h bí-bāng ah

Hit thâu ê hiān-si̍t
M̄-chai lán ê khin-tāng
Tîm-tāng ê hiān-si̍t
Hō͘ lán chin tāng ê khó͘-thàng
Hāi lán tǹg lo̍h-lâi thô͘-kha
Siak chit ē kha-chhng thiàⁿ
Tōa-siaⁿ kiò A-niâ-oeh
Tōa-siaⁿ kiò Siōng-tè A-pah-pē
Sui-bóng lán lâng beh khòaⁿ-tio̍h thiⁿ-kng
Ài nǹg-kòe tn̂g-tn̂g ê pōng-khang
Àm-àm ê pōng-khang
Kiaⁿ-hiâⁿ ê pōng-khang
Giāu-gî ê pōng-khang
Lué-chì ê pōng-khang
Siōng-tè kóng ū thiⁿ chiū ū thiⁿ
Siōng-tè kóng ū kng chiū ū kng

Chí-iàu khîⁿ-tiâu Siōng-tè
Bô-koán pōng-khang jōa-nī tn̂g
Bô-koán pōng-khang jōa-nī àm
Lán liâm-piⁿ ē khòaⁿ-tio̍h kng
Lán teh-beh khòaⁿ-tio̍h thiⁿ
Lán chit-sî khòaⁿ-tio̍h thiⁿ-kng

濟南教會主日學教室修建 kap 宣教中心興建感恩禮拜訂 tī 2020 年 2 月 2 日舉辦。相片取自濟南教會網站。濟南教會主日學教室修建 kap 宣教中心興建感恩禮拜訂 tī 2020 年 2 月 2 日舉辦。相片取自濟南教會網站。

廣告/聖經充滿我-經文填充本

我有話要說