(請安裝Taigi Unicode字形，配合Firefox瀏覽器來讀)
作者：陳金順
歷史小說無好寫，這通人知。
我本人雖然興寫，不而過，到今攏短篇 ê。
所致，看人寫長篇歷史小說，尚且寫 kah 上腳 ê，咱攏會佇心內為伊拍噗仔。
《羅漢門》出版進前，文學界大概罕得聽過錢真這號人物。伊誠無簡單，初出江湖就挑戰不止仔歹落手 ê 長篇歷史小說，這款勇氣少人有。
歷史小說欲寫 kah 通人謳咾，定著愛共歷史人物佮背景寫予四序、鬥搭，袂使七仔鬥做八仔，才袂予人掠包。
除了真實 ê 歷史人物以外，作者往往會創造一、兩位「虛構」ê 角色，為規篇小說添色加分。
《羅漢門》第一章「山路上 ê 人」代先上場 ê 黃麟佮卓春，大概就是作者虛構 ê 人物，怹雖然無算主角，總是共配角搬演 kah 鮮沢、上腳。煞尾章「時間不曾停止」兩翁某閣出場收煞，這款有頭有尾 ê 鋪排，筆者嶄然仔佮意。
規篇讀透透，作者筆下朱一貴 ê 形象，參本人認定 ê 宛然仔宛然。伊是凡人，當該然有躊躇、軟弱 ê 時陣。毋過，絕對無像官方紀錄 ê 遐爾匪類。設使伊無天生 ê 領袖氣質，哪有法度絞起風雲，予 30 萬人甘願陪綴？！
在來官方文書以成敗論英雄，這無應該是咱 ê 史觀。咱需要以人民 ê 角度，建立家己 ê 新史觀。
朱一貴以外，伊 ê 換帖兄弟黃殿、李勇、吳外、鄭定瑞、陳印……，猶閣有軍師王玉全，來自南路杜君英陣營 ê 翁飛虎，形成義氣相thīn ê 隊陣。
作者發揮伊豐沛 ê 想像力，共遮 ê 人物 ê 個性描繪 kah 不止仔立體有形，連怹 ê 內心世界，嘛不時傱出來參讀者面會。
可比講：羅漢門 ê 頭兄黃殿，照理講愛出來 chhōa 頭，不而過氣魄無夠、觀前顧後，朱一貴毋才有機會坐大位。咱毋知真實 ê 世界，黃殿敢捌後悔？總是，佇小說 ê 中站以後，出現筆者料想袂到 ê 情節，伊無講無呾順其然投降清廷。
作者佇描寫革命大義裡，嘛描寫男兒私情，李勇、鄭定瑞欲現仔毋成現 ê 同性愛，寸尺把握 kah 拄好仔拄好。
另外，小說裡有講著朱一貴 chhōa 頭 ê 革命行動，檢采是軍師王玉全為欲實現家己野心所畫 ê 藍圖。敢是按呢？這，死無對證。
《羅漢門》雖是革命事件小說，毋過罕得出現戰爭場面。朱一貴被掠到受刑 ê 場面，嘛簡單幾筆交代，並本人萬捅字 ê 短篇〈天落紅雨〉寫 ê 較少。
按呢講，毋是批評作者 ê 功力無夠、凊彩準過。每一个創作者，佇創作小說場面佮情節 ê 時，定著有伊 ê 起心動念參要意 ê 重點。
寫朱一貴 ê 冊佮篇章，袂當用「濟」來形容，毋過，近年來一本一本相紲出爐。無論徛踮啥物角度、運用啥款文體書寫，攏值得咱保惜。
朱一貴佮咱仝款是凡人，不而過伊並咱較好膽，敢徛出來攑旗造反。
踮佇 21 世紀現後代 ê 咱，徛旗造反毋是咱 ê 天命。
泡一甌清茶，展開《羅漢門》，勻聊仔讀予透。
