(請安裝Taigi Unicode字形，配合Firefox瀏覽器來讀)
作者：姚志龍
元宵暝 真趣味
過年 欲過–去
戲棚頂 有人咧做謎
大埕 鬧熱 chhih-chhih
鼓仔燈 圓圓圓
蠟條煞 插攲攲
點著 光爍爍
夯咧 走相覕
囡仔姊 囡仔兄 上歡喜
鼓仔燈 盪盪hìⁿ
阿吉–阿 無注意
煞 燒燒去
驚一下 半小死
好佳哉 人攏無代誌
再會啦 鼓仔燈
阿美–阿 汗㴙㴙滴
強欲 喘袂離
明年 我會閣來揣你
Goân-siau-mî chin chhù-bī
Kòe-nî beh kòe–khì
Hì-pêⁿ téng ū lâng leh chò bī
Tōa-tiâⁿ nāu-jia̍t chhih-chhih
Kó͘-á-teng îⁿ-îⁿ-îⁿ
La̍h-tiâu soah chhah khi-khi
Tiám to̍h kng-sih-sih
Giâ leh cháu sio bih
Gín-á-ché gín-á-hiaⁿ siōng hoaⁿ-hí
Kó͘-á-teng tōng-tōng-hìⁿ
A-kiat–a bô chù-ì
Soah sio-sio–khì
Kiaⁿ chi̍t-ē pòaⁿ-sió-sí
Hó-kai-chài lâng lóng bô tāi-chì
Chài-hōe–lah kó͘-á-teng
A-bí–a kōaⁿ chha̍p-chha̍p-tih
Kiông beh chhoán bē lī
Mê-nî góa ē-koh lâi chhōe lí
