(請安裝Taigi Unicode字形，配合Firefox瀏覽器來讀)
指導老師：郭燕霖
作者：林予揚（苗栗縣苑裡鎮山腳國小六年乙班）
一个透南風 ê 暗暝，彼暝，一个瘦瘦 ê 查埔囝仔，走去籃球場，先占先贏，一个囝仔兄家己 phah 籃球。過一時仔，一位阿伯對伊講：「囝仔兄，我會使 kap 你做伙拍無？」這个囝仔兄躊躇–一下，想想咧 tím 頭講：「好啊！無問題！」阿伯 sûi kho͘ 幾若人，年歲攏50 thóng 歲，拆2隊分組比賽。
第一輪，囝仔兄無機會比，hiah-ê 大人 an-tah 伊講，第二輪一定會予伊比。第二輪開始，hiah-ê 大人無 ka-láu，伊真正有比賽，不過大人看輕伊，認為囝仔兄 tō 是囝仔兄，是肉跤，欲 kap 大人比，滷卵比雞腿，趴咧趴咧才袂著銃啦！所以無認真顧伊，kù-chāi-i 投！囝仔兄知影大人 ê 想法，所以伊 sa 著球了後，sûi 射三分 ê，竟然紅中射入去。喔！烏 kan 仔貯豆油，看袂出來！Hiah-ê 阿伯看 kah 喙開開，毋敢相信！大人鐵齒毋信，刁工予伊 koh 射三分 ê，又 koh 紅中入去準準準，這聲邊仔有噗仔聲 neh，Chiah-ê 大人毋敢看輕小朋友，小朋友 mā 無計較阿伯看輕伊，歡歡喜喜大人囝仔做伙 phah 籃球。
「一人食一半，感情才袂散。」有時陣，咱認為家己 ê 物件干單咱本人會 kha̍p chit，其他 ê 人若 kha̍p 會歹歹去！若是咱有這款想法，實在真可惜、無彩！有一 táu，同學想欲 kap 我耍柴疊仔，我較 ko͘-ta̍k，伊孤不將去揣別人耍。過一 khùn-á，伊疊好適矣，伊疊 ê 物真趣味，看伊 khí-mo͘ 真爽快，這時我才後悔：我 thài 遐爾雞仔腸，鳥仔肚咧！
生活 tō 是愛分張才會快樂，才會溫暖。分享會予咱交著 koh 較濟 ê 朋友，用新 ê 眼光看世界，也予咱 ê 生活 koh khah 豐富多彩！
