(請安裝Taigi Unicode字形，配合Firefox瀏覽器來讀)
作者：林均賢
伊死了後，不得已送她去這間海邊 ê 安養院。安養院 ê 環境清幽，工作人員專業有疼心。佇附設 ê 禮拜堂，早起 ê 日頭總是準時對玻璃窗仔射落照佇牧師講道 ê 台仔頂，溫暖 koh 莊嚴。一切看起來妥當 sù-sī ，予人hòng-sim。毋過，她敢猶會記得？
自彼擺我確定她已經完全袂記得「伊」了後，這兩三年來，我逐擺去 kā 看，我 lóng 會提「伊」、我 kap 其他親人 ê 相片 ná 比 ná 唸予她聽。有幾張相片是大約30年前，「伊」 kap 她 chhōa 我去海邊 chhit-thô，佇鏡頭內底，阮 lóng 笑 kah 足歡喜。我唸相片 ê 時陣，親像彼寡日頭燦爛 ê 日子，kan-nā 一張相片摸著 ê 距離。
相片唸袂落去 ê 時，海，對安養院三樓遠遠看–去，藍天白雲 kap 海洋連成一 phiàn，逐擺看 lóng 是非常寧靜。毋過，對岸邊行倚近共看，其實海湧真雄，一直咧拍海岸， lóng 無停止。
Hông 袂記得 ê 感覺有講袂出 ê 淒涼，所以我罕得去。Tī 忍足久足久到 tòng 袂牢 ê 時，我會一个人坐長途 ê 車去海邊彼間安養院，坐–落來 kap 她做伙唸20分鐘 ê 相片，koh 看海 chiah 來離開。
最近，我 ê 想法 chiah 改變：「妳袂記得無要緊，至少我猶記得；若準啥物lóng 會記得，是上蓋殘忍 ê 代誌。會使完全袂記得、無煩無惱，是上帝賜福上好 ê 禮物。」兩年外 ê 時間，我 chiah 想有這句話 ê 意義。
Chit-má ê 狀況又 koh 無仝款矣。兩禮拜前去看–她，若準講她啥物人 lóng 袂認得，mā 會使 kap 我鬥陣唸相片。Hiān-chú-sî 欲 koh 再做伙唸幾張相片，已經無遐爾簡單矣。
無論英雄抑是普通人物，所有 ê 一切 lóng-chóng 會漸漸變成過去。毋過道路、真理 kap 活命，親像烏暗中 ê 光，予咱活咧 ê 人，向光明來行，因為遐有滿滿 ê 疼痛、憐憫 kap 永遠 ê 向望。
後記：
我 ê 阿母知影我這兩三年來咧走揣「伊」ê 人影，就對厝裡揣出一張1988年穆牧師替伊洗禮 ê 相片，ùi 新竹親手來台北挈予我。牧師當時 iân-tâu koh phiau-phiat，阮阿母抱阮阿姊 mā 佇邊仔觀禮。
通過社工 kap 教友 ê 協助，知影牧師娘三年前安息主懷，牧師真拄好 mā tòa 佇彼間安養院內面，除了記性差小可，身體猶原勇健。
幾個月前去安養院 ê 時，佇禮拜結束了後，我 ê 目睭四界看，落尾看著一个真面熟 ê 老人坐佇輪椅頂面。我走倚去，正面詳細 koh 看一擺，確定是穆牧師，趕緊自我紹介而且 kā 1988年彼張相片 ùi kha-báng 挈出來予伊看，現場 kā 相片內底 ê 人名一个一个唸予伊聽……。
穆牧師足歡喜， kā 我 ê 手 ân-ân 握咧，對我講：「會記得、會記得……」，雖罔伊 ê 面貌衰老真濟，總是彼个大大 ê 笑容，確實是我細漢幼年 ê 印象中，彼个充滿溫暖 ê 笑神。
用這篇短文，記念 hām 她同齊唸相片 ê 日子，也記念相片中所有美好 ê 日子。
附註：
王維熙先生是一个足有台灣意識 ê 人，我自細漢看伊掛老人目鏡坐佇windows 95電腦前，用台文輸入法拍字，伊 ê 朋友若出版台語文 ê 冊 kap báng-gah，lóng 全力支持。我真愛寫作，毋過毋捌寫過台文，這是我人生中寫 ê 第一篇台文，算講是對伊 ê 記念。嘛感謝長老教會會友、台語教師李英芬女士 ê 指導。
