我 ê 老母 kah 信仰(上)

(請安裝Taigi Unicode字形,配合Firefox瀏覽器來讀)

作者:陳清俊

我 ê 老母名叫做黃妲,出世 tī 1913年12月30日 tī 台灣 ê 樹林,屬七星郡(就是現在 ê 新北市 ê 樹林)。Tī 1933年4月30日 kah 陳添居結婚。Tī 2007年10月15日 tī 美國德州 ê 休士頓過身。一生 ê 歲壽滿93歲(óa 94歲)。自細漢心中決定信耶穌到過身,信耶穌 ê 心堅定無疑。

伊是 tī 陳家 kah 黃家中頭一個信主 ê 人。除了伊引 chhōa 全家 lóng 信主以外,受伊 ê 影響直接間接來信主 ê 人也 bōe 少。下面就我所知 ê 一 kóa tāi-chì,來 kah 大家分享伊 ê 信仰過程。

當我老母出世 ê 時,樹林 ê 所在 iáu bōe 有基督教 ê 教會。Tī 伊細漢 ê 時,只有設立一間佈道所。Chit 間佈道所 tú-tú 是 tī 阮老母所 khiā 起 ê 厝 ê 斜對面。橫過一條圳溝 kah 路就到。若是樹林鎮 ê 信徒 beh 去禮拜就 tio̍h 去板橋 á 是新莊。

因為佈道所 tī in ê 厝對面,佈道所附近 ê gín-ná chōe 少會入 tī 佈道所聽故事 á 是吟詩、唱歌。阮 ê 媽媽也是其中 ê 一個。伊有一個兄哥、兩個小妹。Siōng 無伊 ê 一個小妹也有 tī 佈道所聽道理,總是無進一步 ê 追求信仰。Tī hia,阮 ê 媽媽有得 tio̍h 一個真重要 ê 信息,就是「上帝是無起頭,無續尾。」Thang 講:上帝是無生日,也無死 ê 時。伊想,若是天公是正月初九生,án-ni 正月初一到初八就 iáu 無天公。所以上帝是比天公 khah 大 ê 神。Beh 信就 tio̍h 信 khah 大 ê 神。所以 tī 伊 ê 心中產生對基督教 ê 好奇 kah 追求。

當伊小學畢業以後,無去讀中學,就 tī 厝裡幫忙做 seng-lí,顧店。一直到結婚 chiah 離開樹林。所以 tī 細漢 kah 青少年 lóng 有 tī 佈道所出入。當時所學 ê gín-á 歌(聖詩)以及歌謠,一直到八、九十歲 ê 時,iáu 會記得。

阮媽媽常常 ài 吟 ê 一首詩,是 siōng 舊,約 tī 1950年出版 ê 聖詩203首:
1. 至大上帝願祢 chhōa 我,
穩過今世曠野地;
我真軟弱,祢大權能,
用手牽我無犯罪;
天 ê 米糧,天 ê 米糧,
求祢永永養飼我。
2. 活命水源求祢賞賜,
我心嘴乾大欣慕;
火柱、雲柱,求祢顯出,
chhōa 我頭尾行天路;
全能救主,全能救主,
賜我氣力,永保護。
3. 後日行到約旦河墘,
驚惶、僥疑免纏絆;
較贏死失地獄 ê 主,
保我穩到迦南岸;
我就吟詩,我就吟詩,
永遠感謝 o-ló 祢。

伊 ê 一生 ná 親像猶太人 tī 曠野流浪,有一個目標 kah ǹg 望,ài beh 進入迦南地。求主保守我軟弱 ê 心,無犯罪,保護我會進入天堂。

除了 chiah-ê 聖詩常常念以外,亦 bat 念 hō͘ 阮聽。親像 án-ni:

上帝變神通,jio̍k 土造亞當;
亞當睏重眠,脇骨造夫人;……。

伊20歲結婚了後,無 koh tòa tī 樹林,tī 一個偏僻 ê 北港 á 山頭 ê 所在,交通不便 ê 所在,kui 個庄頭看有 chiâⁿ 百戶 nā-tiāⁿ。當然 mā 無教會 á 是佈道所。出庄頭,常常 ài 用輕便車。Koh 再阮 ê 爸爸是對基督教無了解,也反對。所以結婚 ê 前幾 nā 年 lóng 無去 tī 教會 á 是佈道所聽道理,á 是做禮拜。

後來到北投山腳,是 tī 作穡人 ê 大家庭做伙 tòa。穡頭 chōe,大家庭 koh 無人對基督教有趣味 kah 了解,家己一人 m̄ 敢違背 ta-koaⁿ kah ta-ke ê 意思,亦是無出入教會。後來因為阮 ê 爸爸到士林小學教書,就單獨徙到士林。所以就 tī 士林 tòa 落來。我 ê 大姊、大兄 kah 我 lóng 是 tī 士林出世。士林 ê 教會是借 tī 一間人家厝做禮拜。頭前做大廳、禮拜,後面 ê 眠床做主日學 ê 教室。Hit 時,媽媽就有機會去教會做禮拜,阮 gín-á 也有機會去主日學。總是,阮爸爸也常常 chhē 理由來擋伊去禮拜,親像厝內 ài 整理等等 ê 為難;媽媽就一項一項來克服。爸爸無 koh 有其他 ê 理由來擋,就 hō͘ 媽媽 tī 禮拜日 thang 去禮拜。阮 gín-á 當然就 kah 媽媽做伙去禮拜堂。

Chit 時,tī 士林教會 ê 傳道師就是後來做淡江中學 ê 校長陳泗治先生。陳泗治 hit 時是傳道師,iáu 未封做牧師。到 hit 時,阮 ê 媽媽 iáu 無洗禮。過無 jōa 久,爸爸受召 ài 去做日本海軍 ê 通譯官。阮 ê 媽媽 ta̍k 遍 lóng 會 kā 聖經 hē tī 爸爸 ê 行李內。爸爸 ta̍k 遍嫌,ta̍k 遍罵,媽媽 mā 是 ta̍k 遍 hē。大概是親像台灣 ê 廟有人 the̍h 符 á 掛 tī 身上,想講神明會保庇。聖經 tī 身邊,上帝會保庇。Á 是因為阮爸爸真愛看冊,媽媽也希望爸爸也 ōe-thang 看聖經,來了解基督教 ê 道理。真正,爸爸 tī 戰爭中 lóng 得 tio̍h 保護。(這是爸爸對阮 gín-á 講 ê)。〈待續〉

廣告/美好腳蹤368認購

我有話要說