(請安裝Taigi Unicode字形，配合Firefox瀏覽器來讀)
作者：陳清俊
後來阮爸爸 tī 珍珠灣事件發生前退役，離開日本海軍，平安 tńg 到厝內。Tī 爸爸做兵 ê 時，只有媽媽 kah 阮 gín-á（大姊 kah 大兄；我 iáu 未出世）tī 厝內。禮拜日真自由 thang 去做禮拜，上主日學。總是好景無真久，阮 ê 媽媽忽然大破病，她得 tio̍h 嚴重 ê 腸 á iām（赤痢 Chi-bú-sú）。
阮 ê 媽媽入院 tī 馬偕病院。Tī hia 入院超過100工。當嚴重 ê 時，阮 ê 媽媽一直講她 iáu 未領洗禮，就是正式 tī 眾人 ê 面前承認耶穌做救主，正式加入教會 ê 意思。陳泗治安慰講：「你 ê 病會好起來，後來 beh tī 教會，khiā tī 眾人 ê 面前來領洗禮。M-nā án-ni，你 ê 丈夫 kah gín-á 也 lóng beh 領洗禮。這也是你 ê 任務，chhōa in 信主。」
媽媽破病 ê 時，阮 gín-á 有阿伯 kah 外家厝來照顧。亦 koh 有陳泗治先生 ê 關心 kah 幫贊。阮 ê 媽媽受上帝 ê 照顧，真正有活起來，總是瘦到 chhun 皮包骨。（腸 á 病，hit 時治療 ê 方法就是餓，一、二十工無食，只有 tam 一屑 á 水，保持活命）。Tī 媽媽破病無外久，爸爸 tú 好 in ê 軍艦停 tī 基隆港，到厝 chiah 知媽媽大破病，當危險。總是，in ê 船 tio̍h-ài koh 出發，bōe-thang tī 病院 tàu 照顧。爸爸亦知除了有厝內 ê 親 chiâⁿ 幫忙以外，亦有教會 ê 人士 tàu 關心 kah 探訪。所以當爸爸做兵 tńg 來了後，就無 koh 擋媽媽去禮拜。
後來因為戰爭 ê 關係，阮全家暫時搬 tńg 去北投。Tī hia，媽媽 kah 阮 gín-á 禮拜日 lóng 有去教會（北投基督長老教會）禮拜。過了一年，二次大戰 soah，阮就 koh 搬轉求士林。Hit 時，陳泗治傳道師猶原 tī 士林傳道。無 gōa 久，陳泗治離開士林，到淡江中學任職，亦受封做牧師。陳惠南牧師來士林教會接續傳道 ê 工作。阮 ê 媽媽就 tī 陳惠南牧師帶領下，受洗禮，正式成做教會 ê 一分子。
Tī 1948年，就是陳惠南做士林教會牧師 ê 時，有鼓舞主日學學生來暗念金句 ê 事。Ài 主日學 ê 學生會暗念一年52句 ê 金句。若會曉完全暗念出來 ê 學生，就會送伊一本白話字聖經。阮 ê 媽媽就鼓勵阮 ê 阿姊（hit 時小學五年）來做 chit-ê 暗念 ê 事。Chit-ê 冬天每暗，媽媽 ná 刺膨紗，阿姊 ná teh 背金句。我 hit 時是小學一年級。Tī 媽媽 ê 勞碌下，阿姊真正會背出52句（全年）ê 金句。伊得 tio̍h 一本全新 ê 新舊約聖經做獎品。阮 khah 細漢 ê 小弟，加減也會記得一 kóa 金句 ê 話句。Koh-khah 感受 ê 是每一暗有 hit 號快樂溫暖 ê 時 chūn。
1949年年底，阮 ê 內媽過身。1950年4月，阮全家搬轉去北投 ê 祖厝。Tī 北投，阮每禮拜 lóng 去教會做禮拜，阮 ê 媽媽 lóng 會 hō͘ 阮每一個人一個銀角 á，特別吩咐 he 是 beh 做奉獻 hō͘ 教會 ê 路用，m̄ 是 sì-siù-á 錢。這是 ài 阮 gín-á 知影奉獻 ê 意義，這是每一個信徒所應該盡 ê 本分。
1951年，阮 ê siōng 細漢 ê 小弟出世。翻 tńg 年，siōng 細漢小弟（大約滿一歲）有 tú-tio̍h 嚴重 ê 破病。（腦膜炎，若是我 ê 阿姊講是出癖、百日嗽 kah 腦膜炎三種病同時發生。）就 tī 台大病院入院。阿姊料理全家 ê 食物，每日她 kōaⁿ 飯到病院 hō͘ 媽媽食，chiah 去學校上課。約有兩禮拜，病症並無 khah 好；媽媽一人決定退院，tùi 台北坐三輪 á 車，tńg 到北投。伊講：我 beh 專心靠上帝來醫治伊，是活是死由上帝做主意。就 tī 厝裡暝日祈禱，這是對阮媽媽 ê 一個大考驗。真正上帝有聽阮媽媽 ê 祈求，小弟有活起來。M-nā 活起來，koh 是正常，頭腦無受傷害。真正是奇跡，上帝 ê 作為。Hit-tiap 了後，媽媽 ê 信仰更加堅強。真正 tī 現在，神蹟 iáu teh 發生，tio̍h 確信，就會 tī 咱身上出現。
關係耶穌 ê 教示講：「當有人 siàn 你倒 pêng ê 嘴 phé，你也 tio̍h oat 出正 pêng hō͘ 伊 siàn。」阮 ê 媽媽講 chit-ê 道德標準真 koân，咱 gín-á á 是普通人若是達 bōe 到，就 tio̍h 人若 phah 你，你 m̄-thang 回手，行離開，m̄ -thang hō͘ 伊 koh 繼續 hō͘ 伊 phah。伊 ê 意思是，m̄ 是耶穌 ê 教示 m̄ -tio̍h，是咱人 ê 軟弱，達 bōe 到，chiah 採取咱會 thang 忍受、接受 ê 變通做法。因為我 lóng ài kah 人相 phah，phah 輸就會哭 tńg 來，媽媽常常講走 tńg 來是對我 siōng 好 ê 方法。
我 khah 大漢 ê 時，北投教會 tī 一遍 ê 風颱中，圍牆倒。為 tio̍h ài 將所倒壞 ê 磚 á koh 再用，阮少年人就到教會「摃磚 á」。就是一塊一塊 ê 磚 á，kā tiâu-tī 磚 á 頂 ê 紅毛土敲掉。阮媽媽 lóng 鼓勵阮去做 chit-ê 工。她講：「上帝工加減做，m̄ 是空空。」所以 hit-ê 暑假大部分 ê 時間是 tī 教會敲磚 á。
媽媽 ê 教示 án-nī 講：「我無財產留 hō͘ lín，我 beh 留 hō͘ lín ê，比世上 ê 財產 koh-khah 好，koh-khah 寶貝。就是信耶穌 ê 信仰傳 hō͘ lín。Lín tio̍h 一生信靠耶穌。」「我無可能一世人 kah lín tī-teh，耶穌 kah 聖神會時時刻刻 kah lín 一世人 tī-teh。無論 lín tī 啥物所在，伊 lóng 會保護 lín。做 lín 一生 ê óa 靠。」〈待續〉
