(請安裝Taigi Unicode字形，配合Firefox瀏覽器來讀)
作者：陳清俊
Tī 1967年正月，我 ê 媽媽 beh chhōa 我 ê 阿姊 ê 兩個 gín-á（hit 時是一歲 kah 三歲）到美國我 ê 阿姊、姊夫 ê 所在。阮 lóng 真擔心，阮 ê 媽媽 m̄ -nā 英文 bōe 曉，中國話 mā 是 m̄ -bat。尤其是 koh chhōa 兩個 gín-á，koh 是冬天去美國東北 pêng 寒冷 ê 所在，m̄ 知會好勢無。伊講：有主 thang 靠，主會 chhōa 路。
Hit 時 ê 飛機行程是先到日本東京過一暝，到夏威夷（Hawaii）入關，繼續到洛杉磯（Los Angeles）轉機，到紐約（New York）koh 再轉機，chiah 會到紐約州 ê Albany。東京 ê 部分，阮 ê 媽媽會曉日語，無問題。洛杉磯有阮爸爸朋友 ê kiáⁿ tī hia，我 ê 同學也 tī hia，in 會到機場來幫忙轉機 ê tāi-chì。總是 tī 紐約市 ê JFK機場就無人幫忙 lah。因為 in ài koh 轉飛機到Albany, N.Y.。真正 ài 靠信心。無 phah 算，tī 洛杉磯到紐約 ê 機頂，有一個旅客，講伊有朋友來接伊，thang 拜託 hit-ê 朋友來辦轉機 ê 事。到紐約JFK機場，果然真順利來轉機。其實JFK機場真大，hit 時就有五個出入站（terminals），tùi 一個出入站到另外一個，ài 坐 bá-sú （bus）chiah 會到，若無人來幫忙，對阮媽媽來講，是無法度順利來轉機。真正是上帝 ê 大安排。
無 phah 算，tī JFK機場等 beh 去Albany ê 飛機 ê 時，阮媽媽看時間已經 beh 到，但是 lóng 無人 kā 伊講 ài 上機 ê 事，就去櫃台 ê 工作人員 hō͘ 伊看機票 kah 一個條 á，內面有阮姊夫 ê 住所 kah 電話號碼。Hit 人就 kā 條 á 提去敲電話，條 á soah 無還 hō͘ 阮媽媽。時間到，iáu 無上飛機，阮媽媽有小 khóa 煩惱，m̄ 知是啥物 tāi-chì。就祈禱上帝，hō͘ 她會順利到阿姊、姊夫 hia。
有 hiah 久 á，工作人員 chiah 叫阮媽媽 kah 兩個 gín-á 上飛機，原來是飛機慢分。（Hit 時是冬天，一月），飛機常常會因為氣候慢分，甚至停開。飛機真順利到Albany。阮姊夫、阿姊 lóng tī 機場 teh 等 à。上帝 ê 帶領，平安到Albany。阮媽媽後來回想，心內 iáu-kú 會 chhiak-一個。若 m̄ 是上帝 ê 帶領，是無可能 hiah 順利到位。
Tī Albany，阮媽媽 ta̍k 禮拜 lóng 去做禮拜。阮媽媽 bōe 曉英文，當然聽無，總是伊講：去禮拜，有人聽講道，有人聽詩歌，我是去接受牧師 ê 祝福。牧師 ê 祝禱，就是我 ta̍k 禮拜 ê 期待，亦是生活 ê 原動力。當阮媽媽信主以後，常常講：伊有六個 kiáⁿ，希望有一個 kiáⁿ thang 來做牧師。總是，kiáⁿ 一個一個大漢，無一個去讀神學院。她 iáu 是繼續祈禱、期待。到 tī Albany，她亦是 án-ni 祈禱。
上帝 ê 安排，第四個 kiáⁿ，我 ê 小弟清芳，tī Albany做藥劑師，同時亦主持台語、華語 ê 查經班。Án-nī 過了相當 ê 時間。有時有林三綱兄弟來幫忙主理、帶領。清芳感覺需要有一個全職 ê 牧師來帶領 chiah 會進步，來設立教會。後來伊就決意去讀神學院。Hit 時，伊已經超過40歲。Tī 1992年，清芳受設立做牧師 ê 時，阮爸爸、媽媽特別 tùi 休士頓到Albany，紐約州（Albany，New York）來參加。（Hit時，阮爸爸身體已經無真好。）In siōng 歡喜，媽媽 ê 願望達成，心滿意足。上帝大大賜福媽媽 kah 她 ê 全家。到2015年，tùi 媽媽所有 ê 下輩（kiáⁿ 孫），包括夫婦 lóng 遵守她 ê 教示：「一生信耶穌」。真希望「信耶穌」會成做阮 ê「傳家寶」。〈全文完〉
