(請安裝Taigi Unicode字形，配合Firefox瀏覽器來讀)
作者：阿表
荷蘭薯沙 tùi 歐洲人來講，其實無啥特別。Tùi 我這位馬鈴薯國新婦來講，伊 mā 是無啥特別。毋過，無特別無代表伊無啥物特殊 ê 代誌通記錄 kap 紹介。
阮翁有一个朋友，伊 ê 男朋友是前東德人。有一年伊來台灣𨑨迌借 tòa tī 阮兜。彼時，猶原健在 ê 阿母，想著這位朋友參伊彼个真歹奉待 ê 囝婿仝款是德國人，tō 先去款一堆馬鈴薯轉來囥，kā 我講：「我袂曉做德國料理，這位先生 ê 三頓 tō 攏交你處理。」我講：「咱若有煮 tō 邀請伊做伙食，伊若無佮意，伊家己會去款，免慒心。」「Bē-tàng 遮爾仔毋是款。」阿母講。這位朋友出身 tī 東德，可能往過 ê 環境較無西德遮爾仔好，致到伊 ê 好喙斗 hō͘ 阮阿母捷捷講「平平德國人，喙斗差遐爾仔濟。」
有一日，我放假 tī 厝，阿母講：「無定著伊無佮意我 ê 手路，今仔日 ê 早起頓 hō͘ 你處理。」我看灶跤彼堆特別為伊款 ê 馬鈴薯攏無動一屑屑仔，tō kā 挈來做荷蘭薯沙。這位 tī 前東德大漢 ê 朋友一看著荷蘭薯沙 tō 講：「你知影德國人無 tī 早起頓食這項，著毋著？」「知矣，不而過，你這時毋是 tī 德國，著毋著？」我問。講煞，伊笑 kah 袂振袂動，越一个身行去客廳。「阿母！」伊輕聲講。坐 tī 膨椅看電視 ê 阿母，隨越頭過來問：「按怎，無佮意食是毋是？」這位前東德來 ê 朋友，聽無阿母講 ê 話。開始比手畫跤。聽無伊 teh 講啥，毋過知影伊 teh 比啥 ê 阿母講：「好好好，你欲轉去進前攏我 kā 你攢。彼馬鈴薯無愛食，咱莫食。連鞭阿母來買 kauh pháng（麭） hō͘ 你食好無？」阿母那講那比手畫跤。比兩塊俗麭中間 kauh 一塊肉，閣配二聲 kôⁿ hām mô͘ 來表示豬肉 hām 牛肉攏攢一份。Khiā-tī 後壁看這齣 ê 我，笑 kah 目汁 chhap-chhap 滴。
我古錐 ê 阿母，若毋是生毋著時代，伊這時應該是一位 gâu 人。
