(請安裝Taigi Unicode字形，配合Firefox瀏覽器來讀)
作者：王美書（台南神學院傳道師）
啥物寫約伯 ê 牽手？這是因為我讀 tio̍h 一張伊寫 ê 批，ǹg-bāng 為伊講幾句話。Chit 張批 án-ni 講：
「親愛 ê 讀者，容允我自我介紹。我是約伯 ê 太太。我無家己 ê 名。我佇聖經內面出現，總是無名，是別人 ê 太太。……恁知約伯記這本冊，亦讀過一開始怎樣講我。約伯記起頭就講我 ê 先生約伯真好額，後來就是伊失去一切。……接續，約伯記證明我猶活 teh，但是我無啥重要。事實上，我不斷互濟濟講故事 ê 人提起，總是講 tio̍h 我 ê 人，大部分攏講我是撒但 ê 同伴，出名 ê 教父奧古斯丁講我 sī 撒但 ê 仝路人，長老會 ê 會祖加爾文講我是魔鬼 ê 工具，連《台灣教會公報》3482期 mā 仝款。我 teh 想，我 nā liōng-chá 死去，就 m̄-bián互世間人看做是約伯 ê 歹太太……。確實，我 ê 丈夫真有靈性，當然，伊也反叛。而且，伊甚至攻擊上帝……。現在，是女性好人膽出聲音 ê 時代，我寫批互恁，對恁講出佇歷史上無名 ê 婦人人 ê 聲。我 m̄-nā 為家己講話，也為著佇聖經佮歷史中消失 ê 人講話，因為，互人聽見阮 ê 聲是阮 ê 權利。阮 ǹg-bāng 其他婦女追隨阮 ê 模範。」
Chiap-tio̍h 批以後，我想欲好好認捌伊，真可惜伊無名，只好尊稱伊「約伯 ê 牽手」。歸本約伯記內，她 kan-ta 親身出現一擺，佇2章9節講一句：「你 iáu-kú 執守你 ê 純全 mah？ Tio̍h 棄絕上帝來死。」
信心 ê 約伯娶 tio̍ h 愚戇 ê 婦人人？
約伯 ê 牽手 m̄-nā 話少，講 ê 話 mā bē 聽 chit。約伯講：「妳講話是親像 hiah-ê 戇 ê 婦人人所 teh 講 ê。怎樣 nih？咱 tùi 上帝受福氣，kiám 無 tùi 伊受災厄 mah？」（2章10節）約伯太太 ùi 約伯 hia 承受大大 ê 受氣。M̄ -koh，咱 m̄-thang bōe-kì，約伯太太失去十個親生 ê gín-á，佇極大 ê 苦痛中，伊 ê 翁婿破病到極，脾氣足䆀。伊 ê 痛苦 m̄-nā 咱 ò͘-tit 體會，連 siōng 親 ê 尪 iā 無 hoat-tō͘。
約伯直接 kā 太太 kiāu，講伊道德有欠缺，m̄ 捌信仰真理。約伯表達出厭 òⁿ，無法度忍受。約伯一點 á 攏 bōe 孤單，因為佇伊後面濟濟信仰 gâu 人攏 kā 伊贊聲。
約伯對朋友講伊 ê 太太「厭賤我嘴 ê 氣味」，棄嫌伊身軀 ê 臭味。約伯 ê 嘴佮伊嘴所出 ê，對 in 某來講，無論是有形或無形，真正攏臭。約伯欲為 tio̍h 家己 ê 義辯駁 ê 時，用伊 ê 太太作咒誓 ê 對象：「我 ê 心若 hō͘ 婦女引誘去，á-sī 我匿佇厝邊 ê 門 teh 等；就願我 ê 婦人人hō͘ 人挨磨（oe-bō），別人也 kap 伊同房。」（31章9～10節）約伯 ê 咒誓真歹聽，意思就是：「我絕對無去睏別人 ê 某，若有，我 ê 某就互別人睏。」這款思考，反映出 hit-ê 時代 ê 文化佮價值觀。若伊真正有行姦淫，照法律處理就好，為啥物牽拖家己 ê 某？當然，可能佇艱苦中，約伯已經烏白講話，總是，約伯無 chiù-chhàm 上帝，約伯 ê 完全正直、無犯罪，受到真嚴格 ê 考驗。
咱會使延續約伯佮信仰前輩 ê 想法，m̄-koh，佇經文中間，耶和華並無贊同約伯 ê 意見。當上帝責備約伯 ê 朋友 ê 議論不如約伯精確 ê 時，上帝對約伯 ê 太太並無任何責備，甚至互伊成做約伯受重建時 siōng 重要 ê 同伴。咱有必要斟酌知影，約伯太太到底 teh 講啥。
約伯先生佮約伯太太 ê 難題
約伯 ê 太太到底講啥物？「你 iáu-kú 執守你 ê 純全mah？Tio̍h 棄絕（barak）上帝來死。」（2章9節）這句話前半句是重複上帝佇2章3節講過 ê 話：「伊猶原執守伊 ê 純全。」後半句親像是同意撒但佇1章11節佮2章5節講 ê 話：「Taⁿ 你若伸你 ê 手，磕 tio̍h 伊攏總所有 ê，伊的確當面 barak 你。」「就伊欲當面 barak 你。」
所以，約伯太太其實是重複上帝佮撒但 ê 話，而且閣加一個新要素──死。約伯太太講 ê 話，佇意義頂面有討論空間，因為伊 m̄-nā 使用上帝佮撒但講 ê 話。
希伯來文 barak 通常是祝福，這字佇舊約出現289擺，286擺攏翻譯作祝福、賜福、頌讚等，親像上帝祝福伊所創造 ê 動物、飛鳥、人、安息日、亞伯拉罕。約伯記出現八擺 barak，五擺翻譯做祝福，親像約伯記序言中，「伊 ê 手所做 ê，你賜福（barak）伊，伊 ê 家業也 tī 地裡加添 chōe-chōe。」（1章10節）約伯講：「我 thǹg-theh 出老母 ê 胎，也 beh thǹg-theh tò 去 hia；耶和華賞賜，耶和華 the̍h 去，tio̍h o-ló（barak）耶和華 ê 名。」（1章21節）佇這兩个所在，barak 翻譯做祝福、謳咾。
仝款 sī barak，聖經翻譯大部分攏將約伯記1章5、11節佮2章5節這三擺 ê barak 解讀做咒詛，á-sī 講 ǹg 上帝講再會（kám-sī 親像台灣人講 ê「愛你袂著，祝你幸福」？）。約伯驚伊 ê 囝佇心內 ǹg 上帝講再會、撒但主張約伯佇經驗一切 ê 痛苦了後，約伯就會 ǹg 上帝講再會。巴克禮譯本、和合本攏翻譯作棄絕；現代中文譯本翻作侮慢得罪、咒罵，一寡英語聖經翻譯作 curse，意思是咒讖、詈罵。詛咒佮棄絕上帝是歸佇仝類 ê 詞。
約伯 ê 太太是欲採用 barak ê tó 一種意思？第一種可能是伊建議先生詛咒 á-sī ǹg 上帝講再會。當約伯 án-ni 做，自然會互上帝棄捒，而且死亡。這款解說 sī 根據1章5、11節佮2章5節。第二種是建議伊 ài 祝福上帝，然後佇祝福上帝 ê 時死去；因為照約伯性命損害 ê 範勢，死亡可能也近矣（1章10、21節）。根據約伯互 in 太太 ê 回應，兩種解說攏會通。M̄ -koh，約伯拒絕 in 太太 ê 提案。無論怎樣，伊無欲詈罵上帝，也無願意死去，伊 koh khah 無愛祝福上帝，因為祝福 bōe-lòe–khi。
佇歷史頂面，認為約伯 ê 牽手建議約伯「詈罵、棄絕上帝」ê 解說是主流。只是，這種講法忽略2章9節其實 佮上帝佇3節「執守伊的純全」呼應。所以，咱需要保留這種曖昧不明，兩種解釋攏有可能。
勇敢 ê 婦人人：問對 ê 問題
約伯太太對先生約伯講 ê 話有啥物效果？咱來比較約伯太太講話前佮講話後，約伯如何回應兩遍 ê 打擊。
1章21～22節：耶和華賞賜，耶和華 the̍h 去，tio̍h o-ló 耶和華 ê 名。Tī 這一切 ê 事，約伯並無犯罪，也無掠上帝做無合。
2章10節：咱 tùi 上帝受福氣，kiám 無 tùi 伊受災厄 mah？Tī 這一切 ê 事，約伯並無 tùi 伊 ê 嘴來犯罪。
無仝 ê 所在：
一、第一擺約伯講話 ê 時，約伯稱呼上帝 ê 名──耶和華；第二擺，佇伊 ê 太太講話了後，約伯用「彼位神明」（ha-elohim）來稱呼上帝，稱呼顯出上帝離伊遐遙遠。第一擺是約伯向上帝講話，第二擺是約伯講起關係上帝 ê 代誌。
二、約伯佇1章21節稱頌耶和華。約伯佇2章10節無講起祝福，只是承認人對上帝得到一切 ê，m̄-nā 好 ê 也有歹 ê。這是約伯第一擺承認對上帝 hia 得到歹事。M̄ -koh 約伯無照太太 ê 建議，約伯無祝福也無咒讖上帝。
三、約伯代先 ê 回應是正面肯定，m̄ -koh 佇最後卻問問題。伊原本 ê 肯定漸漸互無確定來替換。
四、2章10節佮 1章21節 ê 差別就佇約伯 ê 嘴。所以有人懷疑約伯雖然無用嘴來祝福 á-sī 咒讖上帝，總是佇約伯 ê 心內可能已經無仝。
五、最大 ê 差別是約伯講話 ê 角度。佇約伯太太講話以前，約伯是用天頂 á-sī 神 ê 角度講話。佇2章10節，約伯是用地上 á-sī 人 ê 角度講話。「咱 tùi 上帝受福氣，kiám 無 tùi 伊受災厄 mah？」
約伯太太佇故事中 ê 角色真特殊，伊完全互約伯蓋過，親像佮這个故事無啥 tī-tāi；另外一方面，伊講 ê 話互約伯有反應，雖然約伯責備伊是戇 ê 婦人人，總是，約伯太太講 ê 話真有效果。畢竟約伯是頭一擺受著死亡 ê 威脅，而且伊 ê 太太將兩種選擇排佇伊面前：barak 祝福 á-sī barak 向上帝講再會。對照約伯 ê 太太佇「生 ê 過麻油香，生袂過四塊枋」ê 過程中，已經面對過十擺 ê 選擇。約伯這霎開始，將兩個做法攏 khǹg 佇邊仔。約伯 ê 太太 chiong 死亡紹介互約伯。約伯無 koh 遐 nih 確定，伊開始問問題，開始用地上 ê 觀點 lâi 辯論，無 koh 將家己用神明 ê 觀點來看代誌當做必然。約伯 ê 太太扮演關鍵 ê 角色，通過伊，約伯才有機會 ùi 固守本身所知 ê 信徒變做欲重新認捌上帝 ê 人。就是佇這个生死 ê 關頭，因為太太 ê 話，約伯佇憢疑中欲開始生出信仰。
約伯太太：受苦 ê 陪伴受苦 ê
佇約伯記 ê 序言中，上帝已經講起，「佇上帝面前確實有無因端 ê 敬虔」。M̄ -koh，就人來講，佇上帝面前無因端 ê 敬虔是一種可能 ê 選擇。天頂佮地面 ê 觀點是天差地遠。約伯通過佮朋友長長 ê 討論，伊漸漸明白。
Chiū 親像上帝佮撒但 ê 討論，佇約伯猶未明白進前，約伯 ê 牽手已經講出天頂會議 ê 兩種觀點，以及人 ê 選擇。約伯 ê 牽手用真實 ê 問題佮建議互伊 ê 翁婿，雖然受著翁婿 ê 責備，以及所有歷代以來解說 ê 攻擊。總是，伊靜靜無出聲佇約伯 ê 身軀邊，陪伴約伯度過佮朋友長長 ê 對話，最後佇約伯得著上帝 ê 回應、更新 ê 人生路程以後，猶原佮約伯做伙，建立新 ê 生活。
約伯太太佇家己苦痛 ê 時陣，陪伴苦痛 ê 約伯。In 佇苦難中無 barak 上帝、無 ǹg 上帝講再會、無家己去死。In 放棄原底佇心中 ê 答案，佇 in 對上帝 ê 認捌受轉換 ê 時，認捌創造 ê 媠，直到家己 koh 經驗復原 ê 新生活。所以，約伯 ê 牽手，是勇敢 ê、是智慧 ê、是恬恬陪伴受苦–ê。
佇現代 ê 台灣，女性漸漸受重視，咱 tio̍h 紀念伊，千千萬萬佇咱生活中、逐所在，有血有肉有眼屎 ê 約伯太太，咱 ê 名字，上帝攏知。
