Tio̍h kín-sīn koán-lí kàu-hōe ê chîⁿ-châi.

(Chhiáⁿ an-chong Taigi Unicode jī-hêng, phòe-ha̍p Firefox Browser lâi tha̍k. 請安裝Taigi Unicode字形,配合Firefox瀏覽器來讀)

“Siàu-Liân Sin Gán-Kong” Tâi-gí pán. 2021 nî, 10 goe̍h chhe 5.

Ko-lîm-to hō͘-su 8:18-21

18 Goán lēng-gōa phài chi̍t ê hiaⁿ-tī kap Thê-to chòe-hé khì; chit-ê hiaⁿ-tī tī thoân hok-im ê kang-chok ū siū-tio̍h chèng kàu-hōe ê chheng-chàn. 19 M̄-nā án-ni, i siū chèng kàu-hōe soán-phài chòe goán lú-hêng ê tâng-phōaⁿ, lâi chham-ka goán chit hāng chû-siān ê kang-chok; chit-ê kang-chok sī beh kui êng-kng hō͘ Chú, koh piáu-sī goán hoaⁿ-hí kam-goān teh chòe. 20 Goán hui-siông kín-sīn teh chhú-lí lâng khóng-khài hōng-hiàn ê chîⁿ-hāng, chiah-bián ín-khí lâng ê phoe-phêng. 21 In-ūi goán ê tōng-ki kong-bêng-chèng-tāi, m̄-nā tī Chú ê bīn-chêng, tī lâng ê bīn-chêng mā-sī án-ni chòe.

哥林多後書 8:18-21

18 阮另外派一個兄弟及提多做夥去;此個兄弟佇傳福音的工作有受著眾教會的稱讚。 19 M̄ 若按呢,伊受眾教會選派做阮旅行的同伴,來參加阮此項慈善的工作;此個工作是欲歸榮光互主,閣表示阮歡喜甘願啲做。 20 阮非常謹慎啲處理人慷慨奉獻的錢項,才免引起人的批評。 21 因為阮的動機光明正大,m̄若佇主的面前,佇人的面前嘛是按呢做。

Tio̍h kín-sīn koán-lí kàu-hōe ê chîⁿ-châi

Tio̍h 謹慎管理教會 ê 錢財

Pó-lô phài 3 ê lâng khì Ko-lîm-to kàu-hōe bō͘-khoán. Hū-chek siu-chi̍p bō͘-khoán ê pit-su kha-chhiú chheng-khì, ū kàu-hōe ê siū-koân chiah ē-tàng khì chòe chit-hāng tāi-chì. Nā-bô, tō-ū bō͘-khoán hông thun-chia̍h ê hong-hiám, mā-ū khó-lêng hō͘ pó-koán chîⁿ-châi ê lâng siū-tio̍h bô kong-pîⁿ ê chí-chek. In-ūi kó͘-chá sî-tāi bô gōa-pō͘ chhâ-siàu ê chè-tō͘, tī kàu-hōe bō͘-khoán ê ki-chhó͘ sī sìn-jīm(kî-si̍t, kin-á-ji̍t ê chêng-hêng mā tiāⁿ-tiāⁿ sī án-ni).

保羅派三个人去哥林多教會募款。負責收集募款 ê 必須跤手清氣,有教會 ê 授權才 ē-tàng 去做此項代誌。若無,就有募款 hông 吞食 ê 風險,mā ū khó-lêng hō͘ 保管錢財 ê 人遭遇無公平 ê 指責。因為古早時代並無外部查賬 ê 制度,tī 教會募款 ê 基礎是信任(其實,今仔日 ê 情形 mā 定定是 án-ni)。

Khó͘-khǹg lâng lâi hōng-hiàn, khì bō͘-khoán, lóng-sīūi tio̍h tī kàu-hōe tiong-kan lo̍k-si̍t koan-hoâi, chòe chû-siān sū-kang. Pó-lô ǹg kî-tha kàu-hōe khoa-kháu Ko-lîm-to kàu-hōe ê thiàⁿ-sim, sī teh ǹg-bāng Ko-lîm-to kàu-hōe ê hōe-iú bōe làu-khùi, ǹg-bāng in ê hêng-ûi ē-tàng kap miâ-siaⁿ it-tì.

苦勸人來奉獻、去募款,lóng-sī ūi-tio̍h tī 教會中間落實關懷、做慈善事工。保羅 ǹg 其他教會誇口哥林多教會 ê 疼心,是咧向望哥林多教會 ê 會友 bōe 漏氣,ǹg-bāng in ê 行為會當 kap 名聲一致。

Tī Tâi-oân, ū sin-bûn kóng, “Hô Bêng-tek hêng-siān-thoân” ê thoân-tiúⁿ ang-á-bó͘ hō͘ kiám-hong khí-sò͘, goân-in sī in chhim-chiàm goân-té thoân-oân koan-hiàn beh ēng tī chō-kiô, pho͘-lō͘, chín-chè sòng-hiong-lâng ê 7 ek koan-khoán; chòe-kīn kúi-nî, tī pak-pō͘ ê kàu-hōe tiong-kan mā thoân-chhut chi̍t-tùi chū-chheng sī Ki-tok-tô͘ ê ang-á-bó͘, in lī-iōng hōe-iú kap bo̍k-su ê thiàⁿ-sim sì-kè pián-chîⁿ. Tī Hân-kok, Sûn-hok-im kàu-hōe ê bo̍k-su Cho Yonggi su-té-hā the̍h hōe-iú hōng-hiàn hō͘ kàu-hōe ê kim-chîⁿ 130 ek Hân-goân(iok-lio̍k sī 3.5 ek Sin Tâi-phiò)khì tâu-chu gín-á ê kong-si, tì-kàu hông phòaⁿ-hêng 3 tang í-ki̍p chiap-kīn 1 ek Sin Tâi-phiò ê hoa̍t-kim. Chia–ê lóng hō͘ lán chin-tōa ê thê-chhíⁿ, ài kín-sīn koán-lí ēng-tī kàu-hōe, ēng-tī chû-siān sū-gia̍p ê siàu-ba̍k.

Tī 台灣,有新聞講,「何明德行善團」 ê 團長翁仔某 hō͘  檢方起訴,原因是 in 侵占原底團員捐獻 beh 用 tī 造橋、鋪路、賑濟 sòng-hiong 人 ê 7億捐款;最近幾年,tī 北部 ê 教會中間 mā 傳出一對是自稱基督徒 ê 翁仔某, in 利用會友 kap 牧師 ê 疼心四界騙錢。Tī韓國,純福音教會 ê 牧師趙鏞基私底下提會友奉獻 hō͘ 教會 ê 金錢130億韓元(約略是3.5億新台票)去投資囡仔 ê公司,致到 hông 判刑3冬以及接近1億新台票 ê 罰金。遮的攏 hō͘ 咱真大ê thê-chhíⁿ,ài 謹慎管理用 tī 教會、用 tī 慈善事業 ê 賬目。

Kî-tó 

Chú Siōng-tè, goān lí ê sèng-sîn kám-tōng goán, hō͘ goán chiong châi-bu̍t ēng tī ha̍p lí chí-ì ê lō͘-iōng. Hōng Chú Iâ-so͘ Ki-tok ê miâ kî-tó. A-mén.

祈禱

主上帝,願祢的聖神感動阮,hō͘ 阮歡喜奉獻,hō͘ 阮將財物用佇合祢旨意的路用。奉主耶穌基督的名祈禱。阿們。

我有話要說